FEUILLETON
꧋ꦭꦭꦩ꧀ꦥꦃꦲꦤ꧀ꦤꦶꦥꦸꦤ꧀ꦦꦿꦧꦸ Tristan ꦭꦤ꧀ꦥꦸꦠꦿꦶ Isolde꧉
꧇꧓꧑꧇
꧋ꦯꦁꦥꦸꦠꦿꦶ Isolde ꦱꦱꦩ꧀ꦧꦠ꧀ꦩꦼꦭꦱ꧀ꦲꦂꦱ꧇ꦕꦶꦭꦏꦠꦼꦩꦼꦤ꧀ꦲꦸꦫꦶꦥ꧀ꦲꦶꦁꦱꦸꦤ꧀ꦲꦶꦏꦶ꧉ꦩꦤꦮꦓꦸꦱ꧀ꦠꦶꦄꦭ꧀ꦭꦃꦲꦺꦴꦫꦏꦂꦱꦥꦫꦶꦁꦏꦮꦼꦭꦱ꧀ꦱꦤ꧀ꦩꦫꦁꦲꦶꦁꦱꦸꦤ꧀ꦱꦸꦥꦪꦧꦶꦱꦏꦠꦼꦩꦸꦭꦤ꧀ Tristan ꦩꦤꦺꦃ꧉ꦓꦸꦱ꧀ꦠꦶꦄꦭ꧀ꦭꦃꦔꦂꦱꦏ꧀ꦲꦏꦺꦱꦸꦥꦪꦲꦶꦁꦱꦸꦤ꧀ꦩꦠꦶꦏ꧀ꦭꦼꦊꦧ꧀ꦲꦤꦲꦶꦁꦱꦠꦼꦔꦃꦲꦶꦁꦱꦒꦫꦲꦶꦏꦶ꧉ꦝꦸꦃ꧈Tristan꧈ꦏꦏꦱꦶꦃꦏꦸꦭ꧈ꦩꦤꦮꦶꦏꦸꦭꦱꦒꦼꦢ꧀ꦥꦥꦁꦒꦶꦃꦲꦤ꧀ꦭꦤ꧀ꦥꦢꦸꦏꦱꦥꦶꦱꦤ꧀ꦩꦭꦶꦃ꧈ꦏꦸꦭꦱꦩ꧀ꦥꦸꦤ꧀ꦲꦺꦏ꧀ꦭꦱ꧀ꦝꦠꦼꦁꦒꦼꦱꦁꦏꦸꦭ꧉ꦤꦔꦶꦁꦩꦤꦮꦶꦏꦸꦭꦧꦺꦴꦠꦼꦤ꧀ꦲꦺꦁꦒꦭ꧀ꦱꦒꦼꦢ꧀ꦝꦠꦼꦁꦲꦸꦠꦮꦶꦧꦺꦴꦠꦼꦤ꧀ꦧꦝꦺꦱꦒꦼꦢ꧀ꦝꦠꦼꦁꦲꦶꦁꦱꦭꦩꦶꦤꦶꦥꦸꦤ꧀꧈ꦥꦸꦤꦶꦏꦩꦂꦒꦶꦱꦏꦶꦁꦏꦂꦱꦤꦶꦁꦲꦶꦁꦏꦁꦩꦲꦏꦮꦱ꧉ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦲꦢꦩꦼꦭ꧀ꦱꦶꦱꦃꦏꦸꦭꦲꦶꦁꦏꦁꦠꦤ꧀ꦥꦲꦸꦥꦩꦶꦲꦒꦼꦁꦔꦶꦥꦸꦤ꧀꧉ꦏꦸꦭꦧꦺꦴꦠꦼꦤ꧀ꦩꦲꦺꦭꦸꦝꦠꦼꦁꦥꦼꦗꦃꦏꦸꦭ꧈ꦩꦤꦮꦶꦱꦩ꧀ꦥꦸꦤ꧀ꦏꦂꦱꦤꦶꦥꦸꦤ꧀ꦦꦔꦺꦫꦤ꧀ꦏꦸꦭꦲꦶꦁꦒꦶꦃꦤꦫꦶꦩꦃ꧉ꦤꦔꦶꦁꦏꦸꦭꦥꦶꦠꦢꦺꦴꦱ꧀ꦧꦶꦭꦶꦃꦥꦢꦸꦏꦲꦶꦁꦒꦶꦃꦧꦝꦺꦲꦧꦺꦭꦥꦼꦗꦃ꧈ꦱꦩꦺꦴꦁꦱꦩꦺꦴꦁꦱꦥꦢꦸꦏꦩꦶꦉꦁꦝꦠꦼꦁꦲꦶꦁꦥꦼꦗꦃꦏꦸꦭꦮꦲꦸ꧉ꦲꦮꦶꦠ꧀ꦱꦏꦶꦁꦒꦼꦁꦔꦶꦁꦏꦠꦽꦱ꧀ꦤꦤ꧀ꦥꦢꦸꦏꦝꦠꦼꦁꦏꦸꦭ꧈ꦩꦏꦠꦼꦤ꧀ꦲꦸꦒꦶꦏꦠꦽꦱ꧀ꦤꦤ꧀ꦏꦸꦭꦝꦠꦼꦁꦥꦢꦸꦏ꧉ꦥꦢꦸꦏꦧꦺꦴꦠꦼꦤ꧀ꦧꦝꦺꦱꦒꦼꦢ꧀ꦱꦺꦢꦲꦤꦶꦭꦂꦏꦸꦭ꧈ꦩꦏꦠꦼꦤ꧀ꦲꦸꦒꦶꦏꦸꦭꦧꦺꦴꦠꦼꦤ꧀ꦧꦝꦺꦱꦒꦼꦢ꧀ꦥꦼꦗꦃꦲꦤꦶꦭꦂꦥꦢꦸꦏ꧉ꦏꦸꦭꦏꦼꦥꦺꦔꦶꦤ꧀ꦥꦼꦗꦃꦱꦉꦁꦏꦭꦪꦤ꧀ꦥꦢꦸꦏꦱꦂꦠꦏꦶꦤꦸꦧꦸꦂꦢꦢꦺꦴꦱ꧀ꦱꦠꦸꦁꦒꦭ꧀꧈ꦤꦔꦶꦁꦥꦔꦗꦼꦁꦲꦗꦼꦁꦏꦸꦭꦥꦸꦤꦶꦏꦧꦺꦴꦠꦼꦤ꧀ꦧꦝꦺꦱꦒꦼꦢ꧀ꦏꦊꦏ꧀ꦱꦤ꧀ꦤꦤ꧀꧈ꦲꦮꦶꦠ꧀ꦓꦸꦱ꧀ꦠꦶꦄꦭ꧀ꦭꦃꦩꦉꦁꦔꦏꦼꦤ꧀ꦏꦸꦭꦥꦼꦗꦃꦥꦶꦪꦩ꧀ꦧꦏ꧀꧈ꦏꦊꦊꦧ꧀ꦲꦶꦁꦱꦒꦤ꧀ꦠꦼꦤ꧀꧉ꦧꦺꦴꦏ꧀ꦩꦤꦮꦶꦥꦢꦸꦏꦧꦺꦴꦠꦼꦤ꧀ꦧꦝꦺꦩꦶꦉꦁꦝꦠꦼꦁꦥꦼꦗꦃꦏꦸꦭ꧈ꦱꦂꦠꦠꦤ꧀ꦱꦃꦲꦔꦗꦼꦁꦲꦗꦼꦁꦝꦠꦼꦁꦏꦸꦭ꧉ꦩꦤꦮꦶꦓꦸꦱ꧀ꦠꦶꦄꦭ꧀ꦭꦃꦩꦉꦁꦔꦏꦼꦤ꧀ꦥꦢꦸꦏꦱꦒꦼꦢ꧀ꦲꦸꦒꦶꦮꦭꦸꦪ꧉ꦲꦶꦁꦱꦫꦺꦃꦤꦺꦏꦸꦭꦱꦩ꧀ꦥꦸꦤ꧀ꦥꦼꦗꦃꦥꦢꦸꦏꦧꦝꦺꦠꦽꦱ꧀ꦤꦝꦠꦼꦁꦮꦤꦺꦴꦢꦾꦱꦤꦺꦱ꧀꧈ꦲꦶꦁꦒꦶꦃꦥꦸꦤꦶꦏꦝꦠꦼꦁꦯꦁꦥꦸꦠꦿꦶ Isolde ꦲꦶꦁ Bretagne꧉ꦤꦔꦶꦁꦩꦤꦮꦶꦏꦸꦭꦱꦸꦩꦼꦉꦥ꧀ꦧꦶꦭꦶꦃꦥꦢꦸꦏꦱꦩ꧀ꦥꦸꦤ꧀ꦱꦺꦢ꧈ꦏꦸꦭꦲꦶꦁꦒꦶꦃꦧꦺꦴꦠꦼꦤ꧀ꦧꦝꦺꦭꦩꦶꦒꦼꦱꦁꦩꦭꦶꦃ꧉ꦩꦸꦒꦶꦩꦸꦒꦶꦦꦔꦺꦫꦤ꧀ꦲꦶꦁꦏꦁꦩꦲꦏꦮꦱꦏꦂꦱꦲꦔꦧꦸꦭ꧀ꦭꦏꦼꦤ꧀ꦥꦤꦸꦮꦸꦤ꧀ꦏꦸꦭ꧈ꦱꦸꦥꦢꦺꦴꦱ꧀ꦏꦸꦭꦱꦒꦼꦢ꧀ꦚꦫꦱ꧀ꦱꦏꦼꦤ꧀ꦒꦼꦫꦃꦥꦢꦸꦏ꧈ꦲꦸꦠꦮꦶꦏꦸꦭꦭꦤ꧀ꦥꦢꦸꦏꦱꦒꦼꦢ꧀ꦢꦮꦁꦱꦸꦭ꧀ꦝꦠꦼꦁꦲꦶꦁꦗꦩꦤ꧀ꦏꦭꦁꦒꦼꦁꦔꦤ꧀ꦱꦱꦉꦁꦔꦤ꧀꧉
꧋ꦲꦶꦁꦱꦭꦩꦶꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦔꦶꦤ꧀ꦲꦒꦼꦁꦒꦁꦱꦭ꧀ꦢꦶꦤ꧀ꦠꦼꦤ꧀ꦭꦩꦶꦤꦶꦥꦸꦤ꧀꧈ꦯꦁꦥꦸꦠꦿꦶꦠꦤ꧀ꦱꦃꦱꦱꦩ꧀ꦧꦠ꧀ꦩꦼꦭꦱ꧀ꦲꦂꦱ꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦥꦶꦏꦤ꧀ꦠꦸꦏ꧀ꦒꦁꦱꦭ꧀ꦢꦶꦤ꧀ꦠꦼꦤ꧀ꦥꦿꦲꦫꦏꦺꦤ꧀ꦢꦼꦭ꧀꧉ꦯꦁꦱꦶꦤꦠꦿꦶꦪ Kaherdin ꦧꦶꦔꦃꦱꦔꦼꦠ꧀꧈ꦤꦸꦤ꧀ꦠꦼꦤ꧀ꦝꦮꦸꦃꦲꦩꦱꦁꦭꦪꦂꦥꦼꦛꦏ꧀꧈ꦱꦸꦥꦢꦺꦴꦱ꧀ꦱꦏꦶꦁꦏꦠꦼꦧꦶꦃꦲꦤ꧀ꦦꦿꦧꦸ Tristan ꦱꦒꦼꦢ꧀ꦲꦩꦿꦶꦏ꧀ꦱꦤ꧀ꦤꦶꦧꦶꦭꦶꦃꦧꦲꦶꦠꦤꦶꦥꦸꦤ꧀ꦝꦠꦼꦁ꧉ꦏꦭꦱꦩꦤ꧀ꦠꦼꦤ꧀ꦥꦱꦶꦱꦶꦂꦫꦶꦁꦤꦒꦫꦶ Bretagne ꦱꦩ꧀ꦥꦸꦤ꧀ꦏꦠꦶꦔꦭ꧀꧈ꦤꦔꦶꦁꦧꦲꦶꦠꦤꦶꦥꦸꦤ꧀ꦧꦺꦴꦠꦼꦤ꧀ꦥꦶꦏꦤ꧀ꦠꦸꦏ꧀ꦲꦔꦶꦤ꧀꧈ꦠꦤ꧀ꦱꦃꦏꦩ꧀ꦥꦸꦭ꧀ꦏꦩ꧀ꦥꦸꦭ꧀ꦲꦶꦁꦠꦼꦔꦃꦲꦶꦁꦱꦒꦤ꧀ꦠꦼꦤ꧀꧉ꦱꦉꦁꦥꦶꦏꦤ꧀ꦠꦸꦏ꧀ꦠꦶꦒꦁꦢꦶꦤ꧀ꦠꦼꦤ꧀ꦠꦶꦒꦁꦢꦭꦸ꧈ꦯꦁꦦꦿꦩꦺꦱ꧀ꦮꦫꦶꦚꦸꦥꦼꦤꦩꦁꦏꦸꦱꦶꦫꦃꦲꦶꦁꦲꦤ꧀ꦝꦥ꧀ꦥꦤ꧀ꦲꦒꦼꦁꦲꦶꦁꦏꦁꦒꦸꦥꦏ꧀ꦲꦼꦫꦃ꧉ꦲꦺꦫꦃꦲꦶꦥꦸꦤ꧀ꦲꦔꦺꦔꦶꦔꦶꦲꦒꦼꦩ꧀ꦲꦒꦼꦩ꧀ꦩꦤ꧀ꦤꦶꦥꦸꦤ꧀ꦱꦁꦥꦸꦠꦿꦶ꧉ꦯꦁꦥꦸꦠꦿꦶꦩꦔꦼꦂꦠꦺꦴꦱ꧀ꦧꦶꦭꦶꦃꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦧꦺꦴꦠꦼꦤ꧀ꦧꦝꦺꦩꦼꦤꦁꦔꦶꦱꦺꦢꦤꦶꦥꦸꦤ꧀ꦦꦿꦧꦸ Tristan꧉
꧋ꦏꦕꦫꦶꦪꦺꦴꦱ꧀ꦦꦿꦧꦸ Tristan ꦱꦩ꧀ꦥꦸꦤ꧀ꦏꦥꦶꦤ꧀ꦝꦃꦲꦏꦼꦤ꧀ꦩꦭꦶꦃꦱꦏꦶꦁꦥꦱꦔꦿꦃꦲꦤ꧀ꦲꦶꦁꦥꦱꦶꦱꦶꦂꦝꦠꦼꦁꦲꦶꦁꦏꦫꦠꦺꦴꦤ꧀ Carhaix ꦲꦮꦶꦠ꧀ꦒꦼꦫꦃꦲꦶꦥꦸꦤ꧀ꦱꦤ꧀ꦠꦼꦂꦱꦔꦼꦠ꧀꧉ꦱꦧꦼꦤ꧀ꦢꦶꦤ꧀ꦠꦼꦤ꧀ꦠꦤ꧀ꦱꦃꦩꦸꦮꦸꦤ꧀꧈ꦲꦔꦗꦼꦁꦲꦗꦼꦁꦝꦠꦼꦁꦔꦶꦥꦸꦤ꧀ꦱꦁꦦꦿꦩꦺꦱ꧀ꦮꦫꦶ꧉ꦱꦂꦠꦠꦤ꧀ꦱꦃꦲꦱꦱꦩ꧀ꦧꦠ꧀ꦩꦼꦭꦱ꧀ꦲꦱꦶꦃ꧉ꦲꦺꦚ꧀ꦗꦶꦁꦔꦶꦥꦸꦤ꧀ꦧꦲꦶꦠꦲꦶꦁꦏꦁꦠꦤ꧀ꦱꦃꦏꦸꦩꦩ꧀ꦥꦸꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦠꦼꦔꦃꦲꦶꦁꦱꦒꦤ꧀ꦠꦼꦤ꧀ꦥꦶꦏꦤ꧀ꦠꦸꦏ꧀ꦲꦔꦶꦤ꧀꧈ꦧꦺꦴꦠꦼꦤ꧀ꦲꦤ꧀ꦠꦮꦶꦱ꧀ꦢꦔꦸꦭꦩ꧀ꦥꦃꦲꦶꦥꦸꦤ꧀ꦱꦩ꧀ꦥꦸꦤ꧀ꦲꦚꦼꦭꦏ꧀ꦏꦶꦥꦱꦶꦱꦶꦂꦲꦶꦁ Bretagne꧈ꦭꦪꦂꦫꦶꦥꦸꦤ꧀ꦱꦩ꧀ꦥꦸꦤ꧀ꦏꦠꦶꦔꦭ꧀ꦱꦏꦶꦁꦝꦫꦠ꧀ꦠꦤ꧀꧉ꦯꦁꦥꦸꦠꦿꦶ Isolde ꦲꦶꦁ Bretagne ꦱꦸꦩꦼꦢꦾꦲꦩꦊꦱ꧀ꦲꦮꦺꦴꦤ꧀ꦝꦠꦼꦁꦲꦶꦁꦏꦁꦫꦏꦦꦿꦧꦸ Tristan ꦲꦶꦁꦏꦁꦲꦔꦥꦸꦱ꧀ꦱꦶꦝꦠꦼꦁꦱꦫꦶꦫꦤꦶꦥꦸꦤ꧀꧉ꦯꦁꦥꦸꦠꦿꦶꦤꦸꦤ꧀ꦠꦼꦤ꧀ꦭꦸꦩꦼꦧꦼꦠ꧀ꦲꦶꦁꦏꦩꦂꦫꦶꦥꦸꦤ꧀ꦦꦿꦧꦸ Tristan ꦱꦂꦠꦲꦚꦏꦼꦠ꧀ꦠꦶꦥꦱꦫꦺꦪꦤ꧀ꦤꦶꦥꦸꦤ꧀꧈ꦭꦗꦼꦁꦩꦠꦸꦂ꧇ꦝꦸꦃ꧈Tristan꧈ꦒꦸꦫꦸꦭꦏꦶꦏꦸꦭ꧈ꦧꦲꦶꦠꦤꦶꦥꦸꦤ꧀ꦏꦏꦁꦩꦱ꧀ Kaherdin ꦱꦩ꧀ꦥꦸꦤ꧀ꦏꦠꦶꦔꦭ꧀ꦝꦠꦼꦁ꧉ꦩꦸꦒꦶꦩꦸꦒꦶꦏꦏꦁꦩꦱ꧀ Kaherdin ꦝꦠꦼꦁꦏꦭꦶꦪꦤ꧀ꦝꦺꦴꦏ꧀ꦠꦼꦂꦲꦶꦁꦏꦁꦱꦒꦼꦢ꧀ꦚꦫꦱ꧀ꦱꦏꦼꦤ꧀ꦒꦼꦫꦃꦥꦢꦸꦏ꧉
꧋ꦦꦿꦧꦸ Tristan ꦏꦒꦺꦠ꧀ꦩꦶꦉꦁꦲꦠꦸꦂꦫꦶꦥꦸꦤ꧀ꦲꦶꦁꦏꦁꦫꦪꦶꦩꦏꦠꦼꦤ꧀ꦥꦸꦤꦶꦏ꧈ꦭꦗꦼꦁꦲꦤ꧀ꦢꦔꦸ꧈ꦥꦔꦤ꧀ꦢꦶꦏꦤꦶꦥꦸꦤ꧀꧇ꦪꦪꦶ꧈ꦲꦥꦚꦠꦥꦿꦲꦸꦏꦁꦱꦶꦫꦥꦿꦶꦏ꧀ꦱꦤ꧀ꦤꦶꦲꦶꦏꦸꦥꦿꦲꦸꦤꦺꦏꦏꦁꦩꦱ꧀ Kaherdin꧈ꦭꦤ꧀ꦩꦤꦺꦃꦏꦥꦿꦶꦪꦺꦮꦂꦤꦤꦺꦭꦪꦂꦫꦺ꧉
꧋ꦯꦁꦥꦸꦠꦿꦶꦩꦠꦸꦂꦩꦭꦶꦃ꧇ꦧꦲꦶꦠꦲꦶꦁꦏꦁꦏꦮꦸꦭꦠꦶꦔꦭ꧀ꦭꦶꦮꦲꦸꦪꦼꦏ꧀ꦠꦺꦴꦱ꧀ꦧꦲꦶꦠꦤꦶꦥꦸꦤ꧀ꦏꦏꦁꦩꦱ꧀ Kaherdin ꦩꦂꦒꦶꦏꦮꦸꦭꦧꦺꦴꦠꦼꦤ꧀ꦱꦩꦂꦝꦠꦼꦁꦮꦸꦗꦸꦢ꧀ꦢꦶꦥꦸꦤ꧀꧉ꦢꦺꦤꦺꦭꦪꦂꦫꦶꦥꦸꦤ꧀ꦕꦼꦩꦼꦁ꧉
꧋ꦱꦉꦁꦩꦶꦉꦁꦲꦠꦸꦂꦫꦶꦥꦸꦤ꧀ꦲꦶꦁꦏꦁꦫꦪꦶꦥꦸꦠꦿꦶ Isolde ꦩꦏꦠꦼꦤ꧀ꦥꦸꦤꦶꦏꦦꦿꦧꦸ Tristan ꦩꦭꦶꦏ꧀ꦲꦁꦒꦺꦤ꧀ꦤꦶꦥꦸꦤ꧀ꦱꦫꦺ꧈ꦩꦗꦼꦁꦝꦠꦼꦁꦲꦶꦁꦠꦺꦩ꧀ꦧꦺꦴꦏ꧀꧈ꦱꦠꦼꦩꦃꦔꦤ꧀ꦢꦶꦏꦩꦏꦠꦼꦤ꧀꧇ꦝꦸꦃ꧈ Isolde ꦏꦏꦱꦶꦃꦲꦶꦁꦱꦸꦤ꧀꧈ꦱꦲꦶꦏꦶꦲꦶꦁꦱꦸꦤ꧀ꦲꦺꦴꦫꦏꦸꦮꦠ꧀ꦲꦤꦲꦤ꧀ꦲꦸꦫꦶꦥ꧀ꦩꦤꦺꦃ꧉
꧋ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦔꦤ꧀ꦢꦶꦏꦩꦏꦠꦼꦤ꧀ꦦꦿꦧꦸ Tristan ꦤꦸꦤ꧀ꦠꦼꦤ꧀ꦱꦺꦢ꧉ꦥꦫꦱꦠꦿꦶꦪꦲꦶꦁꦏꦁꦱꦩꦶꦝꦠꦼꦁꦱꦺꦴꦮꦤ꧀ꦲꦶꦁꦏꦫꦠꦺꦴꦤ꧀ꦱꦩꦶꦤꦔꦶꦱ꧀ꦱꦶ꧈ꦩꦂꦒꦶꦱꦩꦶꦫꦸꦩꦲꦺꦴꦱ꧀ꦏꦺꦕꦭ꧀ꦭꦤ꧀ꦩꦶꦠꦿꦲꦶꦁꦏꦁꦧꦺꦴꦠꦼꦤ꧀ꦒꦩ꧀ꦥꦶꦭ꧀ꦲꦁꦱꦭ꧀ꦭꦶꦥꦸꦤ꧀ꦩꦭꦶꦃ꧉ꦭꦪꦺꦴꦤ꧀ꦤꦶꦥꦸꦤ꧀ꦦꦿꦧꦸ Tristan ꦭꦗꦼꦁꦏꦲꦸꦥꦏꦫꦱꦲꦏꦢꦤ꧀ꦢꦺꦴꦱ꧀ꦱꦤ꧀ꦱꦱꦥꦤ꧀ꦠꦼꦱ꧀ꦱꦶꦥꦸꦤ꧀꧈ꦏꦱꦫꦺꦏ꧀ꦲꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦠꦼꦔꦃꦲꦤ꧀꧉
꧋ꦏꦭꦱꦩꦤ꧀ꦠꦼꦤ꧀ꦧꦲꦶꦠꦤꦶꦥꦸꦤ꧀ꦱꦶꦤꦠꦿꦶꦪ Kaherdin ꦱꦩ꧀ꦥꦸꦤ꧀ꦢꦸꦩꦸꦒꦶꦲꦶꦁꦥꦭꦧꦸꦃꦲꦤ꧀ Bretagne꧉ꦯꦁꦥꦿꦩꦺꦱ꧀ꦮꦫꦶꦤꦸꦤ꧀ꦠꦼꦤ꧀ꦩꦤ꧀ꦝꦥ꧀ꦝꦠꦼꦁꦝꦫꦠ꧀ꦠꦤ꧀ꦱꦲꦲꦺꦁꦒꦭ꧀ꦠꦼꦝꦏ꧀ꦝꦠꦼꦁꦏꦶꦛ Carhaix꧉ꦥꦁꦒꦭꦶꦃꦲꦶꦥꦸꦤ꧀ꦝꦼꦒ꧀ꦝꦼꦒ꧀ꦒꦤ꧀ꦏꦸꦮꦠꦺꦴꦱ꧀ꦧꦶꦭꦶꦃꦦꦿꦧꦸ Tristan ꦱꦩ꧀ꦥꦸꦤ꧀ꦱꦺꦢ꧈ꦲꦮꦶꦠ꧀ꦱꦩꦂꦒꦶꦩꦂꦒꦶꦩꦶꦉꦁꦱ꧀ꦮꦫꦤꦶꦥꦸꦤ꧀ꦠꦶꦪꦁꦱꦱꦩ꧀ꦧꦠ꧀ꦱꦂꦠꦤꦔꦶꦱ꧀꧈ꦥꦸꦤꦥꦩꦭꦶꦃꦭꦺꦴꦚ꧀ꦕꦺꦁꦔꦶꦁꦒꦫꦺꦗꦒꦫꦺꦗꦠꦶꦤꦧꦸꦃꦧꦺꦴꦠꦼꦤ꧀ꦏꦺꦤ꧀ꦢꦼꦭ꧀ꦏꦺꦤ꧀ꦢꦼꦭ꧀꧉ꦯꦁꦥꦿꦩꦺꦱ꧀ꦮꦫꦶꦲꦤ꧀ꦢꦔꦸꦝꦠꦼꦁꦠꦶꦪꦁꦭꦁꦏꦸꦁ꧈ꦥꦸꦤꦥꦲꦢꦺꦤꦺꦲꦶꦁꦒꦫꦺꦗꦠꦶꦤꦧꦸꦃꦠꦼꦔꦫꦤ꧀ꦤꦶꦁꦏꦥꦼꦗꦃꦲꦤ꧀꧈ꦱꦂꦠꦏꦥꦶꦉꦁꦏꦛꦃꦠꦶꦪꦁꦱꦩꦶꦤꦔꦶꦱ꧀꧉
