꧋ꦠꦶꦪꦁꦱꦼꦥꦸꦃꦲꦶꦁꦏꦁꦏꦊꦉꦱ꧀ꦱꦤ꧀ꦕꦼꦭꦏ꧀ꦏꦭꦶꦪꦤ꧀ꦱꦁꦦꦿꦩꦺꦱ꧀ꦮꦫꦶꦩꦠꦸꦂ꧇ꦝꦸꦃ꧈ꦯꦁꦥꦸꦠꦿꦶ꧈ꦲꦶꦁꦱꦥꦸꦤꦶꦏꦠꦶꦠꦶꦪꦁꦲꦶꦁꦖꦂꦲꦲꦶꦲꦼꦱꦩꦶꦤꦤ꧀ꦝꦁꦱꦸꦱꦃ꧈ꦩꦂꦒꦶꦱꦁꦱꦶꦤꦠꦿꦶꦪ Tristan ꦲꦶꦁꦏꦁꦱꦔꦼꦠ꧀ꦢꦶꦥꦸꦤ꧀ꦠꦽꦱ꧀ꦤꦤ꧀ꦤꦶꦢꦺꦤꦶꦁꦠꦶꦠꦶꦪꦁꦲꦶꦁꦱꦤꦒꦫꦶ꧇ꦱꦺꦢ꧉ꦏꦮꦸꦤꦶꦔꦤ꧀ꦤꦯꦁꦥꦸꦠꦿꦶꦱꦶꦤꦠꦿꦶꦪ Tristan ꦤꦭꦶꦏꦱꦸꦒꦼꦁꦔꦶꦥꦸꦤ꧀꧈ꦥꦁꦒꦭꦶꦃꦲꦤ꧀ꦤꦶꦥꦸꦤ꧀ꦱꦲꦺꦱꦔꦼꦠ꧀꧉ꦉꦩꦼꦤ꧀ꦲꦠꦸꦠꦸꦭꦸꦁꦝꦠꦼꦁꦲꦶꦁꦏꦁꦏꦱꦸꦱꦃꦲꦤ꧀ꦠꦸꦂꦏꦼꦏꦼꦤ꧀ꦢꦼꦭ꧀ꦭꦤ꧀ꦤꦶꦥꦸꦤ꧀ꦠꦤ꧀ꦥꦠꦶꦩ꧀ꦧꦁ꧉ꦲꦒꦼꦁꦭꦭꦧꦼꦠ꧀ꦠꦤ꧀ꦤꦶꦥꦸꦤ꧀ꦝꦠꦼꦁꦤꦒꦫꦶ Bretagne ꦩꦏꦠꦼꦤ꧀ꦲꦸꦒꦶꦝꦠꦼꦁꦲꦶꦱꦶꦤꦶꦁꦤꦒꦫꦶꦥꦸꦤꦶꦏ꧉ꦥꦿꦩꦶꦭꦏꦸꦭꦱꦢꦪꦱꦩꦶꦱꦸꦱꦃ꧉
꧋ꦱꦉꦁꦯꦁꦦꦿꦩꦺꦱ꧀ꦮꦫꦶ Isolde ꦩꦶꦉꦁꦲꦠꦸꦂꦫꦶꦥꦸꦤ꧀ꦏꦏꦶꦏꦏꦶꦮꦲꦸ꧈ꦤꦸꦤ꧀ꦠꦼꦤ꧀ꦔꦺꦁꦒꦭ꧀ꦭꦏꦼꦤ꧀ꦠꦶꦤ꧀ꦢꦏ꧀ꦏꦶꦥꦸꦤ꧀꧈ꦲꦔꦼꦤꦼꦂꦏꦫꦠꦺꦴꦤ꧀ Carhaix꧈ꦭꦸꦩꦼꦧꦼꦠ꧀ꦠꦶꦥꦸꦤ꧀ꦝꦠꦼꦁꦲꦶꦁꦏꦫꦠꦺꦴꦤ꧀ꦠꦤ꧀ꦥꦭꦫꦥ꧀ꦥꦤ꧀꧈ꦲꦚ꧀ꦗꦸꦗꦸꦒ꧀ꦲꦶꦁꦥꦁꦒꦺꦤ꧀ꦤꦤ꧀ꦤꦶꦁꦭꦪꦺꦴꦤ꧀ꦤꦶꦥꦸꦤ꧀ꦦꦿꦧꦸ Tristan꧈ꦩꦂꦒꦶꦯꦁꦱꦶꦤꦠꦿꦶꦪ Kaherdin ꦠꦏ꧀ꦱꦶꦃꦏꦤ꧀ꦠꦸꦤ꧀ꦲꦶꦁꦮꦶꦁꦏꦶꦁ꧉ꦏꦭꦱꦩꦤ꧀ꦠꦼꦤ꧀ꦥꦸꦠꦿꦶ Isolde ꦲꦶꦁ Bretagne ꦊꦁꦒꦃꦲꦶꦁꦱꦕꦼꦭꦏ꧀ꦏꦶꦁꦭꦪꦺꦴꦤ꧀ꦱꦂꦮꦶꦩꦸꦮꦸꦤ꧀꧈ꦲꦮꦶꦠ꧀ꦏꦢꦸꦮꦸꦁꦲꦁꦒꦺꦤ꧀ꦤꦶꦥꦸꦤ꧀ꦱꦩ꧀ꦥꦸꦤ꧀ꦤꦤ꧀ꦢꦸꦏ꧀ꦏꦏꦼꦤ꧀ꦮꦮꦊꦱ꧀ꦝꦠꦼꦁꦦꦿꦧꦸ Tristan꧉ꦠꦶꦠꦶꦪꦁꦲꦶꦁ Carhaix ꦱꦩꦶꦒꦸꦩꦸꦤ꧀ꦤꦶꦔꦭ꧀ꦭꦶꦥꦸꦠꦿꦶꦲꦶꦁꦏꦁꦱꦩꦤ꧀ꦠꦼꦤ꧀ꦲꦺꦤ꧀ꦢꦃꦲꦶꦁꦮꦂꦤꦶꦤꦶꦥꦸꦤ꧀ꦥꦸꦤꦶꦏ꧉ꦲꦶꦁꦧꦠꦺꦴꦱ꧀ꦱꦩꦶꦥꦶꦠꦏꦺꦤ꧀꧈ꦥꦸꦠꦿꦶꦥꦸꦤꦶꦏꦱꦶꦤ꧀ꦠꦼꦤ꧀꧈ꦲꦸꦠꦮꦶꦠꦩꦸꦱꦏꦶꦁꦥꦸꦤ꧀ꦢꦶ꧉ꦱꦉꦁꦯꦁꦦꦿꦩꦺꦱ꧀ꦮꦫꦶꦲꦶꦁ Cornwallis ꦱꦩ꧀ꦥꦸꦤ꧀ꦢꦸꦩꦸꦒꦶꦲꦶꦁꦥꦁꦒꦺꦤ꧀ꦤꦤ꧀ꦤꦶꦁꦭꦪꦺꦴꦤ꧀ꦭꦗꦼꦁꦔꦤ꧀ꦢꦶꦏ꧇ꦯꦁꦥꦸꦠꦿꦶ꧈ꦩꦸꦒꦶꦏꦂꦱꦲꦗꦸꦩꦼꦤꦼꦁ꧈ꦏꦸꦭꦲꦶꦁꦏꦁꦮꦗꦶꦧ꧀ꦤꦔꦶꦱ꧀ꦱꦶꦱꦠꦿꦶꦪꦥꦸꦤꦶꦏ꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦔꦤ꧀ꦢꦶꦏꦩꦏꦠꦼꦤ꧀꧈ꦯꦁꦦꦿꦩꦺꦱ꧀ꦮꦫꦶꦤꦸꦤ꧀ꦠꦼꦤ꧀ꦩꦗꦼꦁꦩꦔꦺꦠꦤ꧀ꦲꦤ꧀ꦢꦼꦢꦺꦴꦔꦝꦠꦼꦁꦲꦶꦁꦦꦔꦺꦫꦤ꧀꧉ꦤꦸꦤ꧀ꦠꦼꦤ꧀ꦲꦩ꧀ꦧꦶꦏꦏ꧀ꦭꦸꦫꦸꦧ꧀ꦧꦶꦁꦭꦪꦺꦴꦤ꧀꧉ꦭꦪꦺꦴꦤ꧀ꦢꦶꦥꦸꦤ꧀ꦲꦫꦱ꧀ꦱꦶꦲꦩ꧀ꦧꦭ꧀ꦲꦩ꧀ꦧꦭ꧀ꦭꦤ꧀꧈ꦤꦸꦤ꧀ꦠꦼꦤ꧀ꦢꦶꦥꦸꦤ꧀ꦫꦁꦏꦸꦭ꧀ꦱꦂꦠꦲꦤ꧀ꦝꦮꦃꦲꦶꦁꦱꦶꦱꦶꦃꦲꦶꦥꦸꦤ꧀ꦱꦁꦏꦶꦤꦱꦶꦃ꧈ꦤꦸꦤ꧀ꦠꦼꦤ꧀ꦱꦺꦢ꧈ꦩꦂꦒꦶꦧꦺꦴꦠꦼꦤ꧀ꦏꦶꦪꦠ꧀ꦲꦤꦤ꧀ꦝꦁꦏꦱꦸꦱꦲꦤ꧀ꦤꦶꦥꦸꦤ꧀꧉
꧋ꦱꦉꦁꦦꦿꦧꦸ Marc ꦩꦶꦉꦁꦮꦂꦠꦺꦴꦱ꧀ꦧꦶꦭꦶꦃꦲꦶꦁꦏꦁꦥꦸꦠꦿꦦꦿꦧꦸ Tristan ꦠꦸꦮꦶꦤ꧀ꦱꦁꦦꦿꦩꦺꦱ꧀ꦮꦫꦶꦱꦺꦢ꧈ꦭꦗꦼꦁꦠꦼꦝꦏ꧀ꦝꦠꦼꦁꦲꦶꦁ Bretagne ꦱꦮꦢꦾꦧꦭꦤꦶꦥꦸꦤ꧀꧉ꦱꦉꦁꦱꦩ꧀ꦥꦸꦤ꧀ꦢꦸꦩꦸꦒꦶꦲꦶꦁꦏꦫꦠꦺꦴꦤ꧀ Carhaix ꦤꦸꦤ꧀ꦠꦼꦤ꧀ꦝꦮꦸꦃꦲꦢꦩꦼꦭ꧀ꦠꦽꦧꦼꦭꦩꦂꦩꦼꦂꦏꦏꦭꦶꦃ꧈ꦏꦁꦒꦺꦥꦱꦫꦺꦪꦤ꧀ꦭꦪꦺꦴꦤ꧀ꦤꦶꦥꦸꦤ꧀ꦦꦿꦧꦸ Tristan ꦭꦤ꧀ꦱꦁꦥꦸꦠꦿꦶ Isolde꧉ꦱꦉꦁꦱꦩ꧀ꦥꦸꦤ꧀ꦱꦝꦶꦪꦱꦢꦪ꧈ꦯꦁꦦꦿꦧꦸ Marc ꦮꦁꦱꦸꦭ꧀ꦝꦠꦼꦁꦲꦶꦁ Cornwallis꧉ꦭꦪꦺꦴꦤ꧀ꦤꦶꦥꦸꦤ꧀ꦧꦺꦴꦁꦱꦭꦸꦲꦸꦂꦏꦏꦭꦶꦃꦮꦲꦸꦲꦶꦁꦒꦶꦃꦏꦧꦼꦏ꧀ꦠ꧉ꦱꦉꦁꦢꦸꦩꦸꦒꦶꦲꦶꦁꦏꦫꦠꦺꦴꦤ꧀ Tintagel ꦤꦸꦤ꧀ꦠꦼꦤ꧀ꦢꦶꦥꦸꦤ꧀ꦱꦫꦺꦏ꧀ꦲꦏꦼꦤ꧀ꦲꦶꦁꦱꦮꦶꦁꦏꦶꦁꦔꦶꦁꦒꦫꦺꦗ꧉ꦲꦶꦁꦏꦁꦱꦠꦸꦁꦒꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦠꦼꦔꦼꦤ꧀꧈ꦲꦶꦁꦏꦁꦱꦠꦸꦁꦒꦭ꧀ꦭꦶꦥꦸꦤ꧀ꦩꦭꦶꦃꦲꦶꦁꦱꦶꦱꦶꦃꦏꦶꦮ꧉ꦱꦉꦁꦢꦭꦸꦲꦶꦁꦥꦱꦫꦺꦪꦤꦶꦥꦸꦤ꧀ꦦꦿꦧꦸ Tristan ꦛꦸꦏꦸꦭ꧀ꦠꦸꦠꦸꦮꦸꦃꦲꦤ꧀ꦲꦶꦁꦏꦁꦫꦸꦩꦩ꧀ꦧꦠ꧀ꦏꦼꦠꦼꦭ꧀ꦱꦔꦼꦠ꧀꧉ꦠꦸꦠꦸꦮꦸꦃꦲꦤ꧀ꦮꦲꦸꦩꦿꦩ꧀ꦧꦠ꧀ꦝꦠꦼꦁꦥꦪꦺꦴꦤ꧀ꦤꦶꦁꦒꦫꦺꦗꦤꦸꦤ꧀ꦠꦼꦤ꧀ꦩꦤ꧀ꦝꦥ꧀ꦝꦠꦼꦁꦥꦱꦫꦺꦪꦤꦶꦥꦸꦤ꧀ꦱꦁꦥꦸꦠꦿꦶ Isolde꧉ꦲꦺꦚ꧀ꦗꦶꦁꦔꦶꦥꦸꦤ꧀ꦠꦸꦠꦸꦮꦸꦃꦲꦤ꧀ꦮꦲꦸꦢꦶꦥꦸꦤ꧀ꦧꦧꦢ꧀ꦢꦺꦤꦶꦁꦠꦶꦪꦁꦲꦶꦁꦏꦁꦲꦚ꧀ꦗꦒꦶꦒꦫꦺꦗ꧉ꦤꦔꦶꦁꦢꦭꦸꦤꦶꦥꦸꦤ꧀ꦠꦸꦠꦸꦮꦸꦃꦲꦤ꧀ꦮꦲꦸꦛꦸꦏꦸꦭ꧀ꦩꦭꦶꦃ꧉ꦲꦺꦚ꧀ꦗꦶꦁꦔꦶꦥꦸꦤ꧀ꦲꦶꦁꦒꦶꦃꦢꦶꦥꦸꦤ꧀ꦧꦧꦢ꧀ꦩꦭꦶꦃ꧉ꦲꦤꦔꦶꦁꦢꦭꦸꦤꦶꦥꦸꦤ꧀ꦲꦶꦁꦒꦶꦃꦛꦸꦏꦸꦭ꧀ꦩꦭꦶꦃ꧉ꦱꦉꦁꦢꦶꦥꦸꦤ꧀ꦧꦧꦢ꧀ꦔꦤ꧀ꦠꦺꦴꦱ꧀ꦏꦥꦶꦁꦠꦶꦒꦛꦸꦏꦸꦭ꧀ꦏꦺꦩꦮꦺꦴꦤ꧀꧈ꦠꦶꦪꦁꦲꦶꦁꦏꦁꦲꦚ꧀ꦗꦒꦶꦒꦿꦺꦗꦮꦲꦸꦤꦸꦤ꧀ꦠꦼꦤ꧀ꦔꦠꦸꦂꦫꦶꦥꦿꦶꦏ꧀ꦱꦝꦠꦼꦁꦯꦁꦦꦿꦧꦸ Marc꧉ꦯꦁꦦꦿꦧꦸꦝꦮꦸꦃ꧇ꦠꦸꦠꦸꦮꦸꦃꦲꦤ꧀ꦮꦲꦸꦧꦺꦴꦠꦼꦤ꧀ꦏꦥꦉꦁꦢꦶꦥꦸꦤ꧀ꦧꦧꦢ꧀ꦩꦭꦶꦃ꧉
꧋ꦠꦩꦠ꧀꧈
ꦩꦸꦁ ꦩꦸꦁ ꦩꦸꦁ
ꦧꦼꦤ꧀ꦢꦫ ꦧꦼꦤ꧀ꦢꦫ -- ꦠꦸꦮꦤ꧀ ꦠꦸꦮꦤ꧀ -- ꦱꦺꦴꦧꦠ꧀ ꦱꦺꦴꦧꦠ꧀ -- ꦱꦝꦺꦫꦺꦏ꧀ ꦱꦝꦺꦫꦺꦏ꧀
ꦔꦠꦸꦂꦫꦶꦲꦸꦤꦶꦔ꧇
ꦎꦤ꧀ꦠꦸꦁꦧꦼꦱꦂ ꦎꦤ꧀ꦠꦸꦁꦧꦼꦁꦒꦭ ꦎꦤ꧀ꦠꦸꦁꦱꦲꦺꦴꦲꦃ
ꦏꦧꦼꦠꦃꦲꦤ꧀ -- ꦏꦥꦽꦭꦸꦮꦤ꧀ -- ꦱꦲꦏꦱꦼꦤꦼꦁꦔꦤ꧀ꦥꦚ꧀ꦗꦼꦤꦼꦁꦔꦤ꧀꧇
ꦏꦭꦮꦂꦠꦶꦏꦗꦮꦺꦤ꧀꧈ꦮꦼꦢꦭ꧀ꦭꦤ꧀ꦨꦭꦺꦥꦸꦱ꧀ꦠꦏ꧈ꦮꦺꦭ꧀ꦠꦼꦦꦿꦺꦝꦼꦤ꧀꧉
ꦮꦶꦮꦶꦠ꧀ꦗꦤꦸꦮꦫꦶ 1928 ꦧꦝꦺꦩꦼꦢꦭ꧀ꦏꦥꦶꦁꦏꦭꦶꦃ꧈ꦉꦒꦶꦲꦗꦼꦒ꧀꧈ꦠꦶꦒꦁꦮꦸꦭꦤ꧀ f 1.50,- ꦲꦶꦱꦶꦤꦶꦥꦸꦤ꧀ꦧꦝꦺꦭꦁꦏꦸꦁꦱꦲꦺꦭꦤ꧀ꦭꦁꦏꦸꦁꦥꦼꦥꦏ꧀꧈ꦕꦼꦏꦏ꧀ꦏꦶꦥꦸꦤ꧀꧇ꦗꦒꦸꦁꦧꦏꦂꦫꦤ꧀ꦤꦺ ....
ꦠꦁꦒꦸꦁ ... ꦤꦶꦁ ... ꦲꦶꦱꦶꦤꦺ꧉
ꦊꦁꦒꦤ꧀ꦤꦤ꧀ꦲꦺꦁꦒꦭ꧀꧈ꦲꦶꦁꦏꦁꦱꦩ꧀ꦥꦸꦤ꧀ꦲꦩ꧀ꦧꦪꦂ꧈ꦲꦶꦁꦮꦸꦭꦤ꧀ꦝꦺꦱꦺꦩ꧀ꦧꦼꦂꦥꦸꦤꦶꦏ꧇ꦏꦗꦮꦺꦤ꧀ꦠꦤ꧀ꦱꦃꦩꦸꦤ꧀ꦝꦸꦏ꧀ꦩꦸꦤ꧀ꦝꦸꦏ꧀ꦱꦺꦴꦮꦤ꧀ꦱꦫꦤꦭꦭꦲꦤꦤ꧀꧉
