꧋ꦱꦺꦴꦥꦶꦂꦫꦶꦥꦸꦤ꧀ꦠꦸꦮꦤ꧀ ꦪꦺꦴꦲꦺꦁꦏꦩ꧀ꦭꦶꦢ꧀ꦥꦺꦴꦊꦏ꧀ꦱꦼꦫꦢ꧀꧈ꦩꦼꦤ꧀ꦠꦱ꧀ꦏꦫꦩ꧀ꦥꦸꦁꦔꦤ꧀ꦲꦶꦁꦥꦔꦢꦶꦭ꧀ꦭꦤ꧀ꦏꦲꦸꦏꦸꦩ꧀ꦝꦼꦤ꧀ꦝ f 100꧈ꦗꦭꦂꦫꦤ꧀ꦲꦔ꧀ꦭꦩ꧀ꦥꦃꦲꦏꦼꦤ꧀ꦎꦠꦺꦴꦮꦺꦴꦤ꧀ꦠꦼꦤ꧀ꦲꦶꦁꦟꦸꦂꦮꦺꦏ꧀ꦢꦸꦩꦸꦒꦶꦲꦶꦁꦨꦠꦮꦶꦭꦩ꧀ꦥꦃꦲꦶꦥꦸꦤ꧀± 50 KM꧉ꦲꦶꦁꦢꦊꦩ꧀ꦱꦲꦼꦗꦩ꧀꧉ꦤꦭꦶꦏꦥꦸꦭꦶꦱꦶꦤꦼꦝꦱꦼꦫꦠ꧀ꦥꦶꦏꦼꦏꦃꦱꦺꦴꦥꦶꦂ꧈ꦠꦸꦮꦤ꧀ ꦪꦺꦴꦲꦺꦁꦏꦩ꧀ꦲꦏꦺꦤ꧀ꦝꦠꦼꦁꦱꦺꦴꦥꦶꦂꦫꦶꦥꦸꦤ꧀ꦱꦸꦥꦢꦺꦴꦱ꧀ꦲꦔ꧀ꦭꦗꦼꦁꦔꦏꦼꦤ꧀ꦭꦩ꧀ꦥꦃꦝꦠꦼꦁꦏꦤ꧀ꦠꦺꦴꦂꦓꦸꦥꦼꦂꦤꦸꦂ꧉ꦥꦸꦭꦶꦱꦶꦔꦺꦴꦪꦏ꧀ꦱꦏꦶꦁꦮꦶꦁꦏꦶꦁ꧉ꦠꦸꦮꦤ꧀ꦮꦲꦸꦲꦶꦁꦒꦶꦃꦧꦝꦺꦏꦥꦿꦶꦏ꧀ꦱꦲꦶꦁꦪꦸꦱ꧀ꦠꦶꦱꦶ꧈ꦥꦿꦏꦮꦶꦱ꧀ꦧꦺꦴꦠꦼꦤ꧀ꦩꦶꦠꦸꦫꦸꦠ꧀ꦥꦿꦺꦤ꧀ꦠꦃꦲꦶꦁꦥꦸꦭꦶꦱꦶ꧉
꧋ꦲꦶꦁꦧꦧ꧀ꦮꦂꦠꦺꦴꦱ꧀ꦧꦝꦺꦥꦩ꧀ꦧꦸꦕꦭ꧀ꦭꦶꦥꦸꦤ꧀ꦝꦺꦴꦏ꧀ꦠꦼꦂꦕꦶꦥ꧀ꦠꦝꦠꦼꦁꦨꦤ꧀ꦝꦃ꧈ꦲꦶꦁꦏꦁꦱꦥꦸꦤꦶꦏꦠꦏ꧀ꦱꦶꦃꦩꦁꦒꦺꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦎꦗꦸꦁꦨꦿꦸꦁ꧈ꦱꦩ꧀ꦥꦸꦤ꧀ꦢꦶꦥꦸꦤ꧀ꦱꦸꦏꦤ꧀ꦤꦶꦱꦸꦩꦼꦉꦥ꧀ꦲꦶꦁꦥꦸꦭꦶꦱꦶ꧈ꦧꦶꦭꦶꦃꦥꦸꦁꦏꦱꦤ꧀ꦤꦶꦁꦮꦸꦭꦤ꧀ꦥꦸꦤꦶꦏꦧꦝꦺꦏꦧꦶꦝꦭ꧀ꦭꦏꦼꦤ꧀ꦝꦠꦼꦁꦥꦥꦤ꧀ꦥꦢꦸꦤꦸꦁꦔꦤ꧀ꦤꦶꦥꦸꦤ꧀ꦲꦺꦁꦒꦭ꧀꧉ ꧋ꦏꦮꦂꦠꦺꦴꦱ꧀ꦱꦏꦼꦤ꧀꧈ꦥꦏꦼꦩ꧀ꦥꦭ꧀ꦭꦤ꧀ꦩꦸꦃꦲꦩꦢ꧀ꦢꦶꦪꦃꦲꦶꦁꦦꦏꦭꦺꦴꦔꦤ꧀꧈ꦱꦧꦼꦤ꧀ꦩꦊꦩ꧀ꦗꦸꦩꦸꦮꦃꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦝꦺꦧꦠ꧀ꦲꦸꦩꦸꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦤꦶꦥꦸꦤ꧀ R.H. ꦩꦸꦫꦢ꧀ ꦄꦥ꦳ꦤ꧀ꦝꦶ꧈ꦝꦺꦧꦠ꧀ꦮꦲꦸꦤꦩꦸꦁꦧꦧ꧀ꦥꦶꦠꦏꦺꦤ꧀ꦤꦤ꧀ꦲꦒꦩꦶꦆꦱ꧀ꦭꦩ꧀꧉
꧋ꦠꦸꦮꦤ꧀ꦱꦟꦸꦱꦶ꧈ꦭꦤ꧀ꦧꦲꦎꦏꦺꦴꦤ꧀ꦱꦸꦭꦺꦤ꧀꧈ꦱꦩ꧀ꦥꦸꦤ꧀ꦲꦁꦱꦭ꧀ꦥꦭꦶꦭꦃꦱꦏꦶꦁꦦꦩꦫꦺꦤ꧀ꦠꦃ꧈ꦏꦥꦫꦺꦁꦔꦏꦼꦤ꧀ꦲꦔ꧀ꦭꦗꦼꦁꦔꦏꦼꦤ꧀ꦥꦱꦶꦤꦲꦺꦴꦤ꧀ꦤꦶꦥꦸꦤ꧀ꦝꦠꦼꦁꦥꦩꦸꦭꦁꦔꦤ꧀ꦭꦸꦲꦸꦂꦠꦠꦤꦺꦤ꧀ꦲꦶꦁꦮꦓꦼꦤꦶꦔꦼꦤ꧀꧉ꦥꦽꦭꦺꦴꦥ꧀ꦥꦶꦥꦸꦤ꧀ꦏꦥꦺꦠꦁꦮꦺꦴꦤ꧀ꦠꦼꦤ꧀ꦱꦊꦧꦼꦠ꧀ꦠꦶꦁꦠꦲꦸꦤ꧀ 1929꧉
꧋ꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦲꦶꦁꦏꦁꦧꦝꦺꦗꦸꦩꦼꦤꦼꦁꦓꦸꦥꦼꦂꦤꦸꦂꦗꦮꦶꦮꦺꦠꦤ꧀ꦠꦸꦮꦤ꧀ Hardeman ꦉꦱꦶꦝꦺꦤ꧀ꦲꦶꦁꦯꦸꦫꦧꦪ꧉ꦠꦸꦮꦤ꧀ van Gulik ꦉꦱꦶꦝꦺꦤ꧀ꦲꦶꦁꦯꦼꦩꦫꦁ꧈ꦗꦸꦩꦼꦤꦼꦁꦓꦸꦥꦼꦂꦤꦸꦂꦗꦮꦶꦠꦼꦔꦃ꧉ꦢꦺꦤꦺꦠꦸꦮꦤ꧀ꦉꦱꦶꦝꦺꦤ꧀ van der Jagt ꦧꦺꦴꦠꦼꦤ꧀ꦏꦒꦸꦁꦔꦤ꧀ꦥꦔꦗꦼꦁꦲꦗꦼꦁꦗꦸꦩꦼꦤꦼꦁꦓꦸꦥꦼꦂꦤꦸꦂꦲꦶꦁꦱꦗꦮꦶꦲꦶꦁꦏꦫꦗꦤ꧀ꦗꦮꦶ꧉
꧋ꦠꦸꦮꦤ꧀ Kloprogge ꦉꦱꦶꦝꦺꦤ꧀ꦲꦶꦁꦉꦩ꧀ꦧꦁꦧꦝꦺꦮꦁꦱꦸꦭ꧀ꦝꦠꦼꦁꦤꦒꦫꦶꦮꦭꦤ꧀ꦢꦶꦏꦤ꧀ꦛꦶꦥꦺꦤ꧀ꦱꦶꦪꦸꦤ꧀꧉ꦏꦛꦃꦥꦫꦥꦿꦶꦪꦤ꧀ꦠꦸꦤ꧀ꦲꦶꦁꦉꦩ꧀ꦧꦁ꧈ꦠꦸꦮꦶꦤ꧀ꦲꦸꦒꦶꦉꦱꦶꦝꦺꦤ꧀ꦲꦶꦁꦯꦼꦩꦫꦁ꧈ꦱꦩꦶꦩꦂꦠꦸꦮꦶꦲꦶꦁꦢꦊꦩ꧀ꦩꦶꦥꦸꦤ꧀꧈ꦥꦽꦭꦸꦔꦠꦸꦂꦫꦶꦏꦱꦸꦒꦼꦁꦔꦤ꧀ꦧꦝꦺꦏꦺꦴꦤ꧀ꦢꦸꦂꦫꦶꦥꦸꦤ꧀ꦝꦠꦼꦁꦤꦒꦫꦶꦮꦭꦤ꧀ꦢꦶ꧉ꦠꦶꦤ꧀ꦢꦏ꧀ꦏꦶꦥꦸꦤ꧀ꦧꦝꦺꦤꦶꦠꦶꦃꦏꦥꦭ꧀ꦲꦥꦶꦥꦿꦶꦤꦼꦱ꧀ꦝꦺꦂꦟꦺꦢꦼꦂꦭꦤ꧀ꦝꦼꦤ꧀꧉
꧋ꦥꦿꦏꦮꦶꦱ꧀ꦱꦶꦥꦸꦤ꧀ꦥꦫꦱꦼꦠꦸꦝꦺꦤ꧀ꦲꦶꦤ꧀ꦢꦶꦪꦲꦶꦁꦤꦒꦫꦶꦮꦭꦤ꧀ꦢꦶ꧈ꦲꦶꦁꦏꦁꦏꦢꦏ꧀ꦮꦧꦝꦺꦢꦩꦼꦭ꧀ꦒꦺꦒꦺꦂꦫꦤ꧀꧈ꦧꦝꦺꦏꦥꦿꦶꦏ꧀ꦱꦲꦶꦁꦥꦔꦢꦶꦭ꧀ꦭꦤ꧀꧈ꦮꦺꦴꦤ꧀ꦠꦼꦤ꧀ꦲꦶꦁꦠꦼꦔꦃꦠꦼꦔꦃꦲꦤ꧀ꦤꦶꦁꦮꦸꦭꦤ꧀ꦗꦤꦸꦮꦫꦶ꧉
꧋ꦏꦮꦂꦠꦺꦴꦱ꧀ꦱꦏꦼꦤ꧀꧈ꦲꦶꦁꦯꦸꦫꦏꦂꦠꦲꦶꦁꦮꦼꦏ꧀ꦢꦭ꧀ꦥꦸꦤꦶꦏꦤꦸꦗꦸꦲꦸꦱꦸꦩ꧀ꦱꦱꦏꦶꦠ꧀ꦧꦺꦭꦺꦏ꧀꧈ꦩꦺꦃꦲꦶꦁꦱꦧꦼꦤ꧀ꦥꦏꦩ꧀ꦥꦸꦁꦔꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁꦱꦏꦶꦠ꧀ꦩꦿꦶꦥꦠ꧀꧉
꧋ꦥꦿꦺꦴꦥꦒꦤ꧀ꦝꦶꦱ꧀ꦱꦫꦺꦏꦠ꧀ꦄꦩ꧀ꦧꦺꦴꦤ꧀꧈ꦤꦩꦠꦸꦮꦤ꧀ꦦꦠ꧀ꦠꦶ꧈ꦲꦶꦁꦏꦁꦏꦱꦶꦁꦏꦶꦂꦫꦏꦼꦤ꧀ꦝꦠꦼꦁꦨꦼꦁꦏꦸꦊꦤ꧀꧈ꦩꦶꦠꦸꦫꦸꦠ꧀ꦧꦼꦱ꧀ꦭꦶꦠ꧀ꦒꦸꦥꦼꦂꦩꦺꦤ꧀꧈ꦱꦥꦸꦤꦶꦏꦏꦠꦼꦠꦼꦥ꧀ꦥꦏꦼꦤ꧀ꦩꦁꦒꦺꦤ꧀ꦲꦶꦁꦦꦭꦺꦩ꧀ꦧꦁ꧉
꧋ꦥꦚꦸꦮꦸꦤ꧀ꦤꦶꦥꦸꦤ꧀ꦯ꧀꧉ꦯ꧀꧉ꦧꦝꦺꦩꦼꦮꦃꦲꦶꦥꦚ꧀ꦗꦁꦔꦶꦁꦩꦂꦒꦶꦠꦿꦩ꧀ꦏꦿꦮꦁꦫꦺꦔꦱ꧀ꦝꦺꦁꦏ꧀ꦭꦺꦴꦏ꧀꧈ꦢꦸꦩꦸꦒꦶꦨꦠꦸꦗꦪ꧈ꦥꦚ꧀ꦗꦁꦔꦶꦥꦸꦤ꧀꧇꧒꧐꧇ꦑ꧀꧉ꦩ꧀꧉ꦱꦩ꧀ꦥꦸꦤ꧀ꦏꦠꦩ꧀ꦥꦺꦤ꧀꧉
꧋ꦱꦺꦏꦿꦺꦠꦫꦶꦱ꧀ꦒꦸꦥꦼꦂꦩꦺꦤ꧀ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦠꦸꦮꦤ꧀ꦲꦺꦊꦥ꧀ ꦲꦥꦫꦶꦁꦮꦂꦠꦺꦴꦱ꧀ꦝꦠꦼꦁ Indische Pers Comite ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦢꦶꦥꦸꦤ꧀ꦠꦶꦩ꧀ꦧꦁꦠꦶꦩ꧀ꦧꦁꦊꦧꦼꦠ꧀꧈ꦏꦁꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦟꦲꦥꦫꦶꦁꦝꦮꦸꦃꦏꦫꦩ꧀ꦥꦸꦁꦔꦤ꧀꧈ꦧꦶꦭꦶꦃꦚꦸꦮꦏ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦥꦺꦉꦱ꧀ꦏꦺꦴꦤ꧀ꦥꦼꦫꦺꦤ꧀ꦱꦶ꧉ꦲꦤ꧀ꦝꦼꦒ꧀ꦒꦶꦁꦏꦺꦴꦤ꧀ꦥꦼꦫꦺꦤ꧀ꦱꦶꦲꦶꦁꦱꦊꦧꦼꦠ꧀ꦠꦶꦥꦸꦤ꧀ꦥꦉꦥꦠ꧀ꦠꦤ꧀ꦥꦺꦴꦊꦏ꧀ꦱꦼꦫꦢ꧀꧈ꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦱꦸꦢꦤꦶꦁꦮꦶꦒꦠꦺꦴꦱ꧀ꦱꦶꦥꦸꦤ꧀ꦥꦥꦁꦒꦶꦃꦲꦤ꧀ꦮꦲꦸ꧉ꦏꦗꦮꦶꦥꦸꦤꦶꦏꦏꦺꦴꦤ꧀ꦥꦼꦫꦺꦤ꧀ꦱꦶꦮꦲꦸꦲꦶꦁꦒꦶꦃꦧꦺꦴꦠꦼꦤ꧀ꦲꦤꦼꦫꦸꦱ꧀ꦱꦶꦏꦢꦺꦴꦱ꧀ꦱꦫꦲꦺꦴꦱ꧀ꦱꦶꦁꦥꦁꦒꦭꦶꦃꦢꦊꦩ꧀ꦏꦁꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦟ꧉ꦱꦸꦮꦏ꧀ꦏꦤ꧀ꦮꦲꦸꦩꦶꦠꦸꦫꦸꦠ꧀ꦥꦩꦁꦒꦶꦃꦲꦶꦁꦠꦶꦪꦁꦏꦛꦃ꧈ꦔꦶꦤ꧀ꦠꦼꦤ꧀ꦧꦶꦭꦶꦃꦗꦭꦂꦫꦤ꧀ꦱꦏꦶꦁꦧꦺꦴꦠꦼꦤ꧀ꦤꦺꦴꦕꦺꦴꦒ꧀ꦒꦶꦏꦭꦶꦪꦤ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦥꦿꦗ꧉ꦢꦺꦤꦺꦏꦁꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦟꦠꦏ꧀ꦱꦶꦃꦏꦥꦉꦁꦲꦤꦩ꧀ꦥꦺꦤ꧀ꦤꦶꦉꦩ꧀ꦧꦒ꧀ꦒꦶꦁꦥꦺꦉꦱ꧀꧉
꧋ꦏꦮꦶꦱꦸꦝꦢꦢꦺꦴꦱ꧀ꦥꦶꦱꦼꦏꦺꦴꦁꦱꦸꦭ꧀ꦲꦶꦁꦩꦼꦏꦃ꧈ꦫꦢꦺꦤ꧀ꦩꦱ꧀ꦡꦧꦿꦶꦢꦤꦸꦱꦥꦸꦠꦿ꧈ꦗꦏ꧀ꦱꦏ꧀ꦭꦱ꧀ I ꦲꦶꦁꦩꦺꦱ꧀ꦠꦼꦂꦏꦺꦴꦂꦟꦺꦭꦶꦱ꧀꧉ꦱꦥꦸꦤꦶꦏꦱꦩ꧀ꦥꦸꦤ꧀ꦧꦶꦝꦭ꧀ꦝꦠꦼꦁꦩꦼꦏꦃ꧉
꧋ꦩꦶꦠꦸꦫꦸꦠ꧀ꦥꦮꦂꦠꦺꦴꦱ꧀꧈ꦲꦶꦁꦱꦊꦧꦼꦠ꧀ꦠꦶꦥꦸꦤ꧀ꦩꦶꦁꦒꦸꦏꦼꦥꦼꦁꦏꦼꦂ꧈ꦭꦤ꧀ꦢꦿꦢ꧀ꦲꦶꦁꦨꦠꦮꦶꦱꦩ꧀ꦥꦸꦤ꧀ꦲꦔ꧀ꦭꦸꦮꦂꦫꦶꦠꦶꦪꦁꦠꦲꦤ꧀ꦤꦤ꧀ꦧꦺꦴꦁꦱꦏꦺꦴꦩ꧀ꦩꦸꦤꦶꦱ꧀ 50꧉ꦮꦺꦴꦤ꧀ꦠꦼꦤ꧀ 6 ꦲꦶꦁꦏꦁꦧꦝꦺꦏꦥꦿꦶꦏ꧀ꦱ꧉ꦧꦶꦭꦶꦃꦠꦤ꧀ꦥꦥꦩ꧀ꦧꦼꦁꦔꦤ꧀꧈ꦲꦶꦁꦠꦼꦔꦃꦠꦼꦔꦃꦲꦤ꧀ꦤꦶꦁꦮꦸꦭꦤ꧀ꦗꦤꦸꦮꦫꦶꦔꦗꦼꦁꦥꦸꦤꦶꦏ꧈ꦲꦶꦁꦧꦧ꧀ꦥꦿꦏꦮꦶꦱ꧀ꦏꦺꦴꦩꦸꦤꦶꦱ꧀ꦥꦥꦿꦶꦏ꧀ꦱꦤ꧀ꦤꦶꦥꦸꦤ꧀ꦱꦩ꧀ꦥꦸꦤ꧀ꦫꦩ꧀ꦥꦸꦁꦱꦢꦪ꧉ꦠꦶꦪꦁꦏꦺꦴꦩ꧀ꦩꦸꦤꦶꦱ꧀ 70 ꦲꦶꦁꦏꦁꦠꦏ꧀ꦱꦶꦃꦮꦺꦴꦤ꧀ꦠꦼꦤ꧀ꦥꦏꦸꦚ꧀ꦗꦂꦫꦤ꧀꧈ꦲꦶꦁꦏꦁꦱꦧꦒꦺꦪꦤ꧀ꦧꦝꦺꦏꦏꦶꦤ꧀ꦠꦸꦤ꧀ꦤꦏꦼꦤ꧀ꦝꦠꦼꦁꦝꦶꦓꦸꦭ꧀꧈ꦲꦶꦁꦏꦁꦱꦧꦒꦺꦪꦤ꧀ꦩꦭꦶꦃꦢꦺꦫꦺꦁꦏꦫꦩ꧀ꦥꦸꦁꦔꦤ꧀꧉ꦱꦏꦶꦁꦩꦺꦱ꧀ꦠꦼꦂꦏꦺꦴꦂꦟꦺꦭꦶꦱ꧀ꦏꦮꦂꦠꦺꦴꦱ꧀ꦱꦏꦼꦤ꧀꧈ꦮꦺꦴꦤ꧀ꦠꦼꦤ꧀ꦠꦶꦪꦁ 12 ꦲꦶꦁꦏꦁꦧꦝꦺꦏꦧꦶꦝꦭ꧀ꦭꦏꦼꦤ꧀ꦝꦠꦼꦁꦝꦶꦓꦸꦭ꧀꧈ꦠꦸꦮꦶꦤ꧀ 8 ꦲꦶꦁꦏꦁꦧꦝꦺꦏꦥꦿꦶꦏ꧀ꦱ꧉
꧋ꦥꦮꦂꦠꦺꦴꦱ꧀ꦱꦏꦶꦁꦉꦝꦏ꧀ꦱꦶ
꧋ꦊꦁꦒꦤꦤ꧀ꦤꦺꦴꦩꦼꦂ2627꧉ꦥꦿꦪꦺꦴꦒꦶꦥꦶꦠꦏꦺꦤ꧀ꦥꦶꦪꦩ꧀ꦧꦏ꧀ꦝꦠꦼꦁ N.V. Tabakmaatschappij Dobbelman ꦲꦶꦁꦮꦺꦭ꧀ꦠꦼꦦꦿꦺꦝꦼꦤ꧀꧉
꧋ꦊꦁꦒꦤꦤ꧀ꦤꦺꦴꦩꦼꦂ 1204꧉ꦧꦧ꧀ꦒꦩ꧀ꦧꦂꦲꦶꦁꦏꦁꦏꦥꦕꦏ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦭꦮꦂꦠꦶꦏꦗꦮꦺꦤ꧀꧈ꦥꦸꦤꦶꦏꦧꦺꦴꦠꦼꦤ꧀ꦩꦮꦶꦩꦮꦁꦲꦸꦏꦸꦫꦤ꧀ꦤꦶꦥꦸꦤ꧀꧈ꦤꦔꦶꦁꦲꦭꦶꦠ꧀ꦲꦭꦶꦠ꧀ꦠꦶꦥꦸꦤ꧀ꦏꦼꦢꦃ 9x12 c.M.꧉ꦮꦸꦗꦸꦢ꧀ꦢꦶꦥꦸꦤ꧀ꦏꦼꦢꦃꦲꦶꦁꦏꦁꦕꦼꦛ꧈ꦠꦸꦮꦶꦤ꧀ꦲꦶꦁꦏꦁꦭꦤ꧀ꦝꦼꦥ꧀꧈ꦢꦺꦤꦺꦥꦶꦠꦸꦮꦱ꧀ꦱꦶꦥꦸꦤ꧀꧇꧑꧇ꦒꦩ꧀ꦧꦂꦏꦛꦃꦏꦛꦃꦲꦶꦥꦸꦤ꧀ f 2.50꧈ꦧꦧ꧀ꦕꦕꦿꦶꦪꦺꦴꦱ꧀ꦱꦤ꧀ꦤꦶꦥꦸꦤ꧀ꦧꦺꦴꦠꦼꦤ꧀ꦏꦥꦺꦠꦁꦲꦶꦁꦧꦪꦂꦫꦤ꧀꧉
꧋R. ꦱꦱꦿꦱꦸꦩꦂꦠ꧈ꦒꦸꦫꦸꦤꦺꦴꦂꦩꦭ꧀ꦱꦼꦏꦸꦭ꧀ꦲꦶꦁꦦꦿꦧꦭꦶꦁꦒ꧉ꦥꦤꦶꦩ꧀ꦧꦁꦥꦚ꧀ꦗꦼꦤꦼꦁꦔꦤ꧀ꦲꦶꦁꦧꦧ꧀ꦩꦸꦫꦶꦃꦥꦼꦥꦏ꧀ꦠꦸꦮꦶꦤ꧀ꦱꦲꦺꦤꦶꦁꦲꦶꦱꦶꦤꦶꦥꦸꦤ꧀ꦏꦗꦮꦺꦤ꧀꧈ꦏꦸꦭꦠꦩ꧀ꦥꦶꦏꦤ꧀ꦛꦶꦒꦼꦁꦔꦶꦁꦥꦤꦸꦮꦸꦤ꧀꧉ꦥꦸꦤꦶꦏꦤꦺꦴꦕꦺꦴꦒ꧀ꦒꦶꦏꦢꦺꦴꦱ꧀ꦱꦼꦢꦾꦤꦶꦁꦏꦗꦮꦺꦤ꧀꧉
