FEUILLETON
꧋ꦱꦸꦱꦸꦥꦺꦲꦒꦼꦩ꧀ꦩꦶꦥꦸꦤ꧀ꦫꦗꦥꦸꦠꦿꦶꦲꦶꦁꦯꦺꦧ꧉
꧇꧒꧇
꧋ꦱꦸꦱꦸꦥꦺꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦆꦔ꧀ꦒꦿꦶꦱ꧀꧉ ꧋ꦠꦸꦮꦤ꧀ꦏꦥ꧀ꦠꦶꦤ꧀ꦮꦲꦸꦤꦼꦩ꧀ꦧꦺꦮꦁꦱꦸꦭ꧀ꦱꦏꦶꦁꦄꦦꦿꦶꦏꦃꦏꦶꦢꦸꦭ꧀꧈ꦩꦼꦤ꧀ꦠꦱ꧀ꦲꦔ꧀ꦭꦩ꧀ꦥꦃꦲꦶꦠꦸꦩꦸꦠ꧀ꦥꦼꦫꦁ꧉ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦭꦸꦩꦼꦧꦼꦠ꧀ꦝꦠꦼꦁꦒꦺꦴꦭꦺꦴꦁꦔꦤ꧀ꦥꦿꦺꦲꦆꦮꦶꦭ꧀ꦭꦶꦒꦼꦂ꧈ꦧꦒꦺꦪꦤ꧀ꦱꦼꦤꦶ꧉ꦮꦺꦴꦤ꧀ꦠꦼꦤ꧀ꦲꦶꦁꦥꦥꦿꦁꦔꦤ꧀꧈ꦠꦸꦮꦤ꧀ꦏꦥ꧀ꦠꦶꦤ꧀ꦮꦲꦸꦏꦊꦧꦼꦠ꧀ꦲꦶꦁꦒꦺꦴꦭꦺꦴꦁꦔꦤ꧀ꦤꦶꦁꦧꦺꦴꦁꦱꦩꦶꦭꦶꦠꦺꦂꦲꦶꦁꦏꦁꦥꦶꦤ꧀ꦠꦼꦂ꧉ꦏꦗꦮꦶꦱꦢꦪꦲꦶꦁꦏꦁꦱꦩ꧀ꦥꦸꦤ꧀ꦏꦸꦭꦲꦠꦸꦂꦫꦏꦼꦤ꧀ꦮꦲꦸ꧈ꦏꦸꦭꦮꦼꦮꦃꦲꦶꦏꦠꦿꦁꦔꦤ꧀ꦩꦭꦶꦃ꧈ꦧꦶꦭꦶꦃꦱꦏꦶꦁꦥꦩꦁꦒꦶꦃꦏꦸꦭꦥꦱꦼꦩꦺꦴꦤ꧀ꦤꦶꦥꦸꦤ꧀ꦠꦸꦮꦤ꧀ꦏꦥ꧀ꦠꦶꦤ꧀ꦥꦸꦤꦶꦏꦏꦢꦺꦴꦱ꧀ꦠꦶꦪꦁꦲꦶꦁꦏꦁꦤꦤ꧀ꦝꦁꦱꦸꦱꦃ꧈ꦱꦂꦠꦏꦠꦶꦔꦭ꧀ꦧꦶꦭꦶꦃꦧꦺꦴꦠꦼꦤ꧀ꦏꦕꦼꦏꦥ꧀ꦥꦤ꧀꧉ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦲꦤꦸꦮꦸꦃꦲꦏꦼꦤ꧀꧈ꦏꦸꦭꦭꦗꦼꦁꦒꦝꦃꦫꦲꦺꦴꦱ꧀ꦉꦱꦼꦥ꧀ꦝꦠꦼꦁꦥꦶꦪꦩ꧀ꦧꦏ꧀ꦏꦶꦥꦸꦤ꧀꧉ꦧꦺꦴꦏ꧀ꦩꦤꦮꦶꦲꦶꦁꦒꦶꦃꦗꦭꦂꦫꦤ꧀ꦏꦸꦭꦥꦶꦪꦩ꧀ꦧꦏ꧀ꦲꦸꦒꦶꦤꦤ꧀ꦝꦁꦏꦶꦏꦶꦫꦁꦔꦤ꧀ꦱꦩ꧀ꦥꦸꦤ꧀ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦠꦲꦸꦤ꧀ꦭꦩꦶꦤꦶꦥꦸꦤ꧀ꦥꦸꦤꦶꦏ꧉ ꧋ꦏꦕꦫꦶꦪꦺꦴꦱ꧀꧈ꦏꦭꦱꦩꦤ꧀ꦠꦼꦤ꧀ꦠꦸꦮꦤ꧀ Higgs ꦏꦺꦤ꧀ꦢꦼꦭ꧀ꦲꦔꦺꦤ꧀ꦤꦶꦥꦸꦤ꧀ꦤꦶꦔꦭ꧀ꦭꦶꦒꦸꦭꦸꦁꦔꦤ꧀ꦢꦭꦚ꧀ꦕꦁꦲꦸꦠꦮꦶꦧꦫꦁꦱꦤꦺꦱ꧀ꦱꦶꦥꦸꦤ꧀ꦱꦂꦠꦤꦶꦔꦭ꧀ꦭꦶꦏꦸꦭꦔꦢꦼꦒ꧀ꦲꦶꦁꦥꦼꦠꦼꦁꦔꦤ꧀꧈ꦤꦸꦤ꧀ꦠꦼꦤ꧀ꦥꦶꦠꦏꦺꦤ꧀꧈ꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀ꦱꦼꦩꦸꦮꦼꦔꦶꦱ꧀꧈ꦱ꧀ꦮꦫꦤꦶꦥꦸꦤ꧀ꦲꦭꦶꦠ꧀꧈ꦲꦮꦶꦠ꧀ꦩꦤꦮꦶꦤꦼꦥ꧀ꦱꦸꦱ꧀ꦮꦫꦤꦶꦥꦸꦤ꧀ꦥꦚ꧀ꦕꦺꦤ꧀ꦭꦗꦼꦁꦲꦺꦮꦃ꧇ꦱꦩ꧀ꦥꦺꦪꦤ꧀ꦥꦸꦤꦶꦏꦱꦶꦤ꧀ꦠꦼꦤ꧀꧈ꦠꦸꦮꦶꦤ꧀ꦮꦺꦴꦤ꧀ꦠꦼꦤ꧀ꦏꦂꦱꦱꦩ꧀ꦥꦺꦪꦤ꧀ꦥꦸꦤꦥꦫꦮꦸꦃꦲꦶꦁꦔꦿꦶꦏꦶ꧉
꧋ꦠꦶꦪꦁꦤꦺꦤꦺꦩ꧀ꦩꦤ꧀ꦲꦶꦁꦏꦁꦭꦶꦁꦒꦶꦃꦮꦺꦴꦤ꧀ꦠꦼꦤ꧀ꦲꦶꦁꦱꦕꦼꦭꦏ꧀ꦏꦶꦥꦸꦤ꧀ꦤꦸꦤ꧀ꦠꦼꦤ꧀ꦮꦶꦕꦤ꧀ꦠꦼꦤ꧀꧇ꦏꦭꦮꦲꦸꦲꦧ꧀ꦢꦶꦥꦚ꧀ꦗꦼꦤꦼꦁꦔꦤ꧀ꦲꦺꦱ꧀ꦠꦿꦶꦱꦩ꧀ꦥꦸꦤ꧀ꦩꦠꦸꦂ꧈ꦧꦶꦭꦶꦃꦮꦺꦴꦤ꧀ꦠꦼꦤ꧀ꦩꦶꦠꦿꦥꦚ꧀ꦗꦼꦤꦼꦁꦔꦤ꧀ꦲꦶꦁꦏꦁꦏꦼꦥꦺꦔꦶꦤ꧀ꦏꦥꦁꦒꦶꦃꦏꦭꦶꦪꦤ꧀ꦥꦚ꧀ꦗꦼꦤꦼꦁꦔꦤ꧀꧉
꧋ꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂ꧇ꦊꦉꦱ꧀ꦩꦶꦠꦿ꧈ꦏꦸꦭꦏꦼꦱꦸꦥꦺꦤ꧀꧈ꦤꦔꦶꦁꦏꦸꦭꦧꦺꦴꦠꦼꦤ꧀ꦲꦺꦔꦼꦠ꧀꧈ꦱꦶꦤ꧀ꦠꦼꦤ꧀ꦩꦶꦠꦿꦏꦸꦭꦲꦶꦁꦏꦁꦮꦂꦤꦶꦱꦲꦒꦺꦴꦝꦺꦒ꧀ꦠꦸꦮꦶꦤ꧀ꦗꦺꦁꦒꦺꦴꦠ꧀ꦠꦶꦥꦸꦤ꧀ꦏꦢꦺꦴꦱ꧀ꦩꦺꦤ꧀ꦢꦧꦺꦫꦺꦴꦏ꧀ꦥꦸꦤꦶꦏ꧉ꦱꦸꦮꦮꦶꦚꦏꦼꦠ꧀ꦩꦿꦶꦏꦶ꧈ꦩꦶꦠꦿ꧉ꦱꦩꦶꦮꦶꦭꦸꦗꦼꦁꦫꦮꦸꦃꦱꦩ꧀ꦥꦺꦪꦤ꧀ꦲꦶꦁꦔꦿꦶꦏꦶ꧉
꧋ꦏꦸꦭꦤꦸꦤ꧀ꦠꦼꦤ꧀ꦚꦏꦼꦠ꧀ꦱꦂꦠꦏꦱꦺꦴꦫꦺꦴꦠ꧀ꦠꦤ꧀ꦲꦶꦁꦥꦝꦁꦔꦶꦁꦭꦩ꧀ꦥꦸꦭꦶꦱ꧀ꦠꦿꦶꦏ꧀꧉
꧋ꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂꦮꦶꦕꦤ꧀ꦠꦼꦤ꧀ꦩꦭꦶꦃ꧇ꦱꦶꦤ꧀ꦠꦼꦤ꧀꧈ꦠ꧈ꦱꦩ꧀ꦥꦺꦪꦤ꧀ꦥꦸꦤꦶꦏꦑꦸꦭꦠꦼꦏꦏꦼꦱꦸꦥꦺꦤ꧀꧈ꦩꦤꦮꦶꦩꦺꦩ꧀ꦥꦼꦂꦩꦺꦩ꧀ꦥꦼꦂꦫꦶꦥꦸꦤ꧀ꦏꦢꦺꦴꦱ꧀ꦝꦺꦴꦏ꧀ꦠꦼꦂ Adams꧈ꦤꦔꦶꦁꦩꦺꦴꦏꦭ꧀꧈ꦲꦮꦶꦠ꧀ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦱꦩ꧀ꦥꦸꦤ꧀ꦱꦢꦱꦠꦲꦸꦤ꧀ꦥꦸꦤꦶꦏꦠꦶꦭꦂꦢꦺꦴꦚ꧉ꦏꦸꦭꦩꦶꦉꦁꦏꦧꦂ꧈ꦝꦺꦴꦏ꧀ꦠꦼꦂꦄꦢꦩ꧀ꦏꦕꦼꦥꦼꦁꦢꦺꦤꦶꦁꦥꦫꦏꦭꦶꦥꦃ꧈[*]ꦥꦿꦩꦶꦭꦱꦩ꧀ꦥꦺꦪꦤ꧀ꦭꦗꦼꦁꦏꦂꦱꦲꦮꦭꦺꦃ꧈ꦤꦩꦱꦩ꧀ꦥꦺꦪꦤ꧀ꦱꦶꦤ꧀ꦠꦼꦤ꧀
꧋ꦏꦸꦭꦩꦁꦱꦸꦭꦶ꧇ꦎ꧈ꦠꦸꦮꦤ꧀ꦲ꦳ꦶꦒ꧀ꦒ꧀ꦱ꧀ꦏꦸꦭꦧꦺꦴꦠꦼꦤ꧀ꦥꦽꦭꦸꦚꦼꦧꦸꦠ꧀ꦤꦩꦏꦸꦭ꧈ꦩꦂꦒꦶꦱꦩ꧀ꦥꦸꦤ꧀ꦥꦚ꧀ꦗꦼꦤꦼꦁꦔꦤ꧀ꦥꦔꦤ꧀ꦢꦶꦏꦏ꧀ꦲꦏꦼꦤ꧀꧉ꦏꦸꦭꦧꦺꦴꦠꦼꦤ꧀ꦥꦔ꧀ꦭꦶꦁꦝꦠꦼꦁꦥꦚ꧀ꦗꦼꦤꦼꦁꦔꦤ꧀꧈ꦲꦮꦶꦠ꧀ꦫꦺꦩꦥꦚ꧀ꦗꦼꦤꦼꦁꦔꦤ꧀ꦧꦺꦴꦠꦼꦤ꧀ꦢꦢꦺꦴꦱ꧀ꦥꦼꦛꦏ꧀ꦏꦢꦺꦴꦱ꧀ꦫꦩ꧀ꦧꦸꦠ꧀ꦏꦸꦭ꧉
꧋ꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂ꧇ꦎ꧈ꦱꦫꦶꦫꦩꦸꦲꦶꦏꦸꦗꦼꦧꦸꦭ꧀ꦠꦸꦮꦤ꧀ Adams꧈ꦧꦼꦤꦼꦂꦥꦔꦤ꧀ꦢꦶꦏꦩꦸꦲꦶꦏꦸ꧈ꦫꦩ꧀ꦧꦸꦠ꧀ꦏꦸꦲꦧꦁꦧꦔꦼꦠ꧀꧈ꦩꦸꦭꦤꦺꦲꦺꦴꦫꦧꦶꦱꦲꦺꦁꦒꦭ꧀ꦢꦢꦶꦥꦸꦠꦶꦃ꧉ꦲꦠꦶꦏꦸꦧꦸꦔꦃꦧꦔꦼꦠ꧀ꦧꦶꦱꦏꦠꦼꦩꦸꦩꦤꦺꦃꦏꦫꦺꦴꦱꦫꦶꦫꦩꦸꦲꦶꦏꦶ꧉ꦏꦗꦧꦲꦶꦏꦸꦏꦧꦼꦤꦼꦂꦫꦤ꧀ꦧꦔꦼꦠ꧀꧈ꦲꦮꦶꦠ꧀ꦱꦫꦶꦫꦩꦸꦲꦺꦴꦫꦏꦂꦱꦩꦁꦱꦸꦭ꧀ꦭꦶꦭꦪꦁꦏꦸꦏꦁꦱꦸꦫꦱꦤꦺꦚꦸꦮꦸꦤ꧀ꦏꦠꦿꦁꦔꦤ꧀ꦱꦏꦔꦼꦤ꧀ꦢꦶꦲꦁꦒꦺꦴꦤ꧀ꦩꦸꦲꦺꦴꦭꦺꦃꦲꦼꦕꦥ꧀ꦲꦼꦕꦥ꧀ꦲꦶꦁꦗꦩꦤ꧀ꦲꦶꦁꦩꦼꦯꦶꦂꦩꦶꦮꦶꦠ꧀ꦠꦶꦲꦤꦏꦫꦗꦤ꧀ꦲꦶꦏꦸ꧈ꦗꦭꦂꦫꦤ꧀ꦲꦏꦺꦃꦮꦺꦴꦁꦏꦁꦲꦺꦴꦫꦥꦿꦕꦪꦩꦤꦮꦲꦼꦕꦥ꧀ꦲꦼꦕꦥ꧀ꦩꦲꦸꦠꦸꦭꦺꦤ꧀꧉
꧋ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀ꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂꦤꦸꦤ꧀ꦠꦼꦤ꧀ꦚꦤ꧀ꦝꦏ꧀ꦠꦔꦤ꧀ꦏꦸꦭꦱꦂꦠꦚꦸꦏꦤ꧀ꦤꦶꦠꦧꦶꦏ꧀ꦏꦭꦶꦪꦤ꧀ꦧꦶꦔꦃ꧉ꦱꦠꦼꦩꦃꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂꦤꦶꦔꦭ꧀ꦭꦶꦱꦸꦱꦸꦥꦺꦲꦶꦁꦏꦁꦏꦸꦭꦲꦁꦒꦺ꧈ꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀꧇ꦲꦭꦶꦲꦭꦶꦲꦥꦏꦁꦏꦺꦴꦲꦒꦼꦩ꧀ꦲꦶꦏꦸ꧈ꦩꦼꦤꦮꦲꦭꦶꦲꦭꦶꦏꦁꦲꦤꦺꦃ꧈ꦤꦔꦶꦁꦧꦼꦕꦶꦏ꧀ꦏꦺꦠꦼꦫꦁꦤꦩꦼꦁꦏꦺꦴꦧꦲꦺꦱꦮꦶꦱ꧀ꦱꦺꦝꦲꦂ꧉ꦱꦲꦶꦏꦶꦲꦤꦼꦥꦸꦁꦤꦏꦫꦺꦴꦩꦶꦠꦿꦏꦸꦠꦸꦮꦤ꧀ꦏꦥ꧀ꦠꦶꦤ꧀ Orme꧈ꦲꦶꦏꦶꦩꦔꦽꦠꦺꦴꦱ꧀ꦲꦸꦒꦧꦱꦄꦫꦧ꧀꧈ꦱꦩꦼꦁꦏꦺꦴꦔꦂꦱꦏ꧀ꦲꦏꦺꦮꦶꦮꦶꦠ꧀ꦱꦶꦤꦲꦸꦧꦱꦩꦼꦯꦶꦂ꧉
꧋ꦏꦥ꧀ꦠꦶꦤ꧀ Orme ꦤꦸꦤ꧀ꦠꦼꦤ꧀ꦚꦏꦼꦠ꧀ꦠꦶꦏꦸꦭꦱꦂꦠꦚꦸꦏꦤ꧀ꦤꦶꦲꦸꦂꦩꦠ꧀ꦱꦫꦤꦲꦤ꧀ꦝꦶꦁꦏꦸꦭ꧀ꦭꦏꦼꦤ꧀ꦧꦢꦤ꧀ꦤꦶꦥꦸꦤ꧀ꦱꦮꦠꦮꦶꦱ꧀꧈ꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀꧇ꦏꦸꦭꦠꦸꦮꦤ꧀ Orme꧉
꧋ꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂꦚꦼꦭꦤ꧀ꦤꦶ꧈ꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀꧇ꦧꦼꦤꦼꦂꦥꦔꦤ꧀ꦢꦶꦏꦩꦸꦲꦶꦏꦸ꧈ꦠꦸꦮꦤ꧀ Orme ꦲꦸꦠꦮꦏꦥ꧀ꦠꦶꦤ꧀ Orme꧈ꦲꦶꦏꦸꦥꦝꦧꦲꦺ꧉ꦢꦺꦤꦺꦏꦂꦱꦤꦺꦠꦸꦮꦤ꧀ꦏꦥ꧀ꦠꦶꦤ꧀ꦲꦶꦏꦸꦲꦤꦺꦭꦏ꧀ꦲꦏꦺꦪꦺꦤ꧀ꦱꦫꦶꦫꦤꦺꦲꦺꦴꦫꦲꦤꦲꦶꦁꦱꦗꦿꦺꦴꦤꦶꦁꦝꦶꦤꦼꦱ꧀ꦩꦶꦭꦶꦠꦺꦂꦏꦁꦠꦼꦠꦼꦥ꧀꧈ꦱꦤꦗꦤ꧀ꦱꦫꦶꦫꦤꦺꦲꦸꦒꦩꦺꦭꦸꦥꦼꦫꦁꦤꦁꦒꦸꦭꦁꦔꦶꦧꦺꦴꦁꦱꦧꦸꦂꦔꦤ꧀ꦠꦶꦠꦼꦏꦤ꧀ꦲꦶꦁꦮꦼꦏꦱ꧀ꦱꦤ꧀ꦤꦶꦁꦥꦥꦿꦁꦔꦤ꧀꧈ꦱꦂꦠꦔꦤ꧀ꦠꦶꦤꦤ꧀ꦝꦁꦠꦠꦸꦏꦥꦶꦁꦠꦼꦭꦸ꧉ꦭꦃ꧈ꦲꦶꦏꦸꦲꦁꦒꦺꦴꦤ꧀ꦤꦺꦱꦝꦶꦪꦝꦲꦂꦱꦺꦴꦥ꧀ꦮꦶꦱ꧀ꦫꦩ꧀ꦥꦸꦁ꧉ꦚꦺꦴꦚꦃ Reid ꦱꦝꦶꦪꦲꦥꦶꦫꦶꦁꦱꦶꦗꦶꦩꦤꦺꦃ꧉ꦲꦏꦸꦮꦶꦱ꧀ꦭꦸꦮꦺꦧꦔꦼꦠ꧀꧈ꦱꦠꦼꦩꦼꦤ꧀ꦤꦺꦲꦺꦴꦫꦲꦤꦥꦒꦮꦺꦪꦤ꧀ꦏꦁꦧꦶꦱꦲꦚ꧀ꦗꦭꦂꦫꦶꦒꦼꦭꦶꦱ꧀ꦭꦸꦮꦺꦏꦪꦲꦩ꧀ꦧꦸꦏꦏ꧀ꦏꦶ mummie꧈ꦩꦂꦒꦥꦚ꧀ꦕꦺꦤ꧀ꦫꦢꦉꦏꦱ꧉ꦲꦪꦺꦴꦩꦶꦠꦿꦩꦶꦠꦿꦥꦝꦝꦲꦂꦝꦶꦱꦶꦏ꧀꧈ꦩꦼꦁꦏꦺꦴꦱꦮꦶꦱ꧀ꦱꦺꦝꦲꦂꦲꦩ꧀ꦧꦚ꧀ꦗꦸꦂꦫꦏꦺꦔꦤ꧀ꦢꦶꦏꦤ꧀ꦩꦤꦺꦃ꧉
꧋ꦏꦸꦭꦭꦤ꧀ꦩꦶꦠꦿꦩꦶꦠꦿꦏꦸꦭꦮꦲꦸꦤꦸꦤ꧀ꦠꦼꦤ꧀ꦱꦩꦶꦤꦼꦝꦱꦺꦴꦥ꧀꧉ꦠꦸꦮꦤ꧀ Higss ꦲꦁꦒꦺꦤ꧀ꦤꦶꦥꦸꦤ꧀ꦤꦼꦝꦏꦛꦃꦥꦶꦪꦩ꧀ꦧꦏ꧀꧈ꦲꦶꦁꦏꦁꦩꦏꦠꦼꦤ꧀ꦮꦲꦸꦏꦸꦭꦧꦺꦴꦠꦼꦤ꧀ꦒꦸꦩꦸꦤ꧀꧈ꦩꦂꦒꦶꦩꦤꦮꦶꦤꦼꦝꦱꦭꦩꦶꦤꦶꦥꦸꦤ꧀ꦥꦚ꧀ꦕꦺꦤ꧀ꦏꦛꦃ꧈ꦧꦺꦴꦏ꧀ꦩꦤꦮꦶꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦧꦺꦴꦠꦼꦤ꧀ꦥꦸꦫꦸꦤ꧀ꦔꦸꦚ꧀ꦗꦸꦏ꧀ꦲꦶꦤꦸꦩ꧀ꦩꦤ꧀ꦥꦸꦤꦶꦏ꧉ꦱꦧꦶꦧꦂꦫꦶꦥꦸꦤ꧀ꦝꦲꦂꦠꦸꦮꦤ꧀ Higgs ꦭꦗꦼꦁꦔꦶꦱꦺꦤ꧀ꦤꦶꦥꦶꦥꦤꦶꦥꦸꦤ꧀ꦥꦚ꧀ꦗꦁ꧈ꦏꦭꦶꦪꦤ꧀ꦱꦠꦲꦶꦁꦏꦁꦏꦮꦝꦃꦲꦤ꧀ꦲꦶꦁꦠꦶꦭꦱ꧀ꦮꦝꦃꦗꦤ꧀ꦠꦸꦁꦔꦶꦥꦸꦤ꧀ꦱꦭꦃꦱꦠꦸꦁꦒꦶꦭ꧀ꦭꦶꦁꦠꦶꦪꦁꦩꦼꦯꦶꦂ꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦔꦶꦱꦺꦤ꧀ꦤꦶꦥꦶꦥꦤꦶꦥꦸꦤ꧀꧈ꦠꦸꦮꦤ꧀ Higgs ꦤꦸꦤ꧀ꦠꦼꦤ꧀ꦮꦶꦕꦤ꧀ꦠꦼꦤ꧀꧈ꦠꦼꦩ꧀ꦧꦸꦁꦔꦶꦥꦸꦤ꧀꧇ꦠꦸꦮꦤ꧀ Adams꧈
ꦏꦭꦶꦥꦃꦥꦸꦤꦶꦏꦥꦔꦒꦼꦁꦔꦶꦁꦧꦺꦴꦁꦱꦏꦨꦶꦭ꧀ꦲꦶꦁꦄꦦꦿꦶꦏꦃꦱꦶꦱꦶꦃꦭꦺꦂꦲꦸꦠꦮꦶꦲꦶꦁꦩꦫꦺꦴꦑꦺꦴ꧉
