꧋ꦱꦲꦶꦏꦶꦱꦫꦶꦫꦩꦸꦢꦏꦠꦸꦂꦫꦶꦤꦼꦫꦁꦔꦏꦺꦏꦥꦿꦶꦪꦺꦩꦸꦭꦧꦸꦏꦤꦺ꧈ꦢꦺꦤꦺꦧꦶꦱꦧꦭꦶꦩꦿꦺꦤꦺꦲꦶꦏꦶ꧉
꧋ꦏꦸꦭꦤꦸꦤ꧀ꦠꦼꦤ꧀ꦲꦔ꧀ꦭꦺꦴꦭꦺꦴꦱ꧀ꦱꦸꦱꦸꦥꦺꦱꦏꦶꦁꦲꦶꦁꦢꦫꦶꦗꦶꦏꦸꦭ꧈ꦲꦶꦁꦏꦁꦠꦤ꧀ꦱꦃꦢꦶꦥꦸꦤ꧀ꦲꦮꦱ꧀ꦱꦏꦼꦤ꧀ꦢꦺꦤꦶꦁꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂꦥꦸꦤꦶꦏ꧉ꦱꦼꦱꦸꦥꦺꦮꦲꦸꦲꦼꦩ꧀ꦧꦤ꧀ꦤꦤ꧀ꦤꦶꦥꦸꦤ꧀ꦲꦼꦩꦱ꧀ꦱꦂꦠꦏꦤ꧀ꦢꦼꦭ꧀꧈ꦏꦢꦺꦴꦱ꧀ꦱꦸꦱꦸꦥꦺꦲꦶꦁꦏꦁꦭꦶꦩꦿꦃꦏꦲꦁꦒꦺꦲꦶꦁꦠꦶꦪꦁꦲꦺꦱ꧀ꦠꦿꦶ꧉ꦩꦿꦶꦥꦠ꧀ꦠꦶꦥꦸꦤ꧀ꦱꦺꦭꦧꦶꦫꦸ(safier)ꦩꦮꦶꦱꦶꦤꦼꦫꦠ꧀ꦠꦤ꧀ꦲꦶꦁꦲꦏ꧀ꦱꦫꦏꦶꦤ꧉ꦏꦸꦭꦤꦼꦢꦃꦲꦏꦼꦤ꧀ꦱꦼꦫꦠ꧀ꦠꦤ꧀ꦮꦲꦸꦝꦠꦼꦁꦠꦸꦮꦤ꧀ Higgs ꦱꦂꦠꦥꦶꦠꦏꦺꦤ꧀ꦥꦸꦤꦥꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦱꦒꦼꦢ꧀ꦩꦲꦺꦴꦱ꧀꧉
꧋ꦠꦸꦮꦤ꧀ Higgs ꦩꦁꦱꦸꦭ꧀ꦭꦶꦱꦂꦠꦩꦼꦤ꧀ꦝꦼꦠ꧀ꦱꦸꦂꦪꦏꦺꦴꦤ꧀ꦛ꧈ꦠꦼꦩ꧀ꦧꦸꦁꦔꦶꦥꦸꦤ꧀꧇ꦩꦼꦱ꧀ꦛꦶꦧꦲꦺꦲꦏꦸꦧꦶꦱꦩꦕꦠꦸꦭꦶꦱ꧀ꦱꦤ꧀ꦲꦶꦏꦶ꧉ꦲꦥꦱꦫꦶꦫꦩꦸꦲꦺꦴꦫꦥꦿꦶꦏ꧀ꦱ꧉ꦎ꧈ꦲꦶꦏꦶꦧꦱꦪꦲꦸꦢꦶꦏꦸꦤ꧈ꦩꦸꦭꦤꦺꦏꦁꦱꦫꦶꦫꦲꦶꦪꦲꦺꦴꦫꦱꦒꦼꦢ꧀ꦩꦲꦺꦴꦱ꧀꧈ꦱꦲꦶꦏꦶꦲꦏꦸꦮꦼꦫꦸꦃ꧉
꧋ꦠꦸꦮꦤ꧀ Higgs ꦤꦸꦤ꧀ꦠꦼꦤ꧀ꦩꦲꦺꦴꦱ꧀꧈ꦲꦸꦔꦼꦭ꧀ꦭꦶꦥꦸꦤ꧀ꦩꦏꦠꦼꦤ꧀꧇ꦒꦚ꧀ꦗꦂꦫꦤ꧀ꦱꦏꦶꦁꦟꦨꦶꦯꦸꦭꦺꦩꦤ꧀꧈ꦫꦗꦤꦶꦁ -ꦎ꧈ꦲꦺꦴꦫꦩꦁꦏꦺꦴꦤꦺꦴꦥꦁꦒꦼꦝꦺꦤꦶꦁꦧꦺꦴꦁꦱꦆꦱꦿꦲꦆꦭ꧀꧈ꦏꦏꦱꦶꦃꦲꦶꦁꦄꦭ꧀ꦭꦃ꧈ꦩꦫꦁ Maqueda꧈ꦫꦗꦥꦸꦠꦿꦶꦲꦶꦁꦯꦺꦧ꧈ꦥꦸꦠꦿꦶꦠꦸꦫꦸꦤ꧀ꦤꦶꦁꦥꦫꦫꦠꦸ꧈ꦥꦸꦠꦿꦶꦠꦸꦫꦸꦤ꧀ꦤꦶꦁꦥꦫꦮꦶꦕꦏ꧀ꦱꦤꦭꦤ꧀ꦲꦺꦤ꧀ꦢꦃꦲꦶꦁꦮꦂꦤ꧉
꧋ꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂ꧇ꦩꦼꦁꦏꦺꦴꦤꦺꦴꦲꦸꦤꦶꦤꦺꦠꦸꦭꦶꦱ꧀ꦱꦤ꧀ꦏꦁꦠꦶꦤꦸꦭꦶꦱ꧀ꦲꦶꦁꦲꦭꦶꦲꦭꦶꦲꦶꦏꦶ꧈ Adams꧉ꦱꦠꦼꦩꦼꦤꦺꦲꦭꦶꦲꦭꦶꦲꦶꦏꦶꦧꦒꦸꦱ꧀ꦧꦔꦼꦠ꧀꧉ꦫꦗꦥꦸꦠꦿꦶꦲꦶꦁꦯꦺꦧ꧈Bath-Melachin ꦠꦼꦒꦼꦱ꧀ꦱꦺꦥꦸꦠꦿꦶꦠꦸꦫꦸꦤ꧀ꦤꦶꦁꦥꦫꦫꦗ꧈ꦱꦂꦠꦚꦠꦪꦺꦤ꧀ꦧꦫꦁꦏꦸꦤꦠꦼꦩꦼꦤ꧀ꦤꦤ꧀꧉
꧋ꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂ꧇ꦭꦗꦼꦁꦲꦤ꧀ꦢꦶꦭꦠ꧀ꦲꦼꦩ꧀ꦧꦤꦤꦶꦁꦱꦸꦱꦸꦥꦺꦥꦸꦤꦶꦏꦩꦮꦶꦢꦶꦥꦸꦤ꧀ꦒꦼꦒꦼꦢ꧀ꦱꦏꦼꦝꦥ꧀꧈ꦱꦠꦼꦩꦃꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧇ꦲꦼꦩ꧀꧈ꦱꦏꦔꦼꦤ꧀ꦢꦶꦱꦫꦶꦫꦩꦸꦲꦺꦴꦭꦺꦃꦲꦭꦶꦲꦭꦶꦠꦶꦫꦺꦴꦤ꧀ꦏꦁꦒꦮꦺꦪꦤ꧀ꦤꦺꦧꦒꦸꦱ꧀ꦧꦔꦼꦠ꧀ꦲꦶꦏꦶ꧈ꦝꦺꦴꦏ꧀ꦠꦼꦂ꧉ ꧋ꦏꦸꦭꦩꦁꦱꦸꦭ꧀ꦭꦶꦏꦭꦪꦤ꧀ꦒꦸꦩꦸꦗꦼꦁ꧇ꦲꦁꦒꦺꦴꦤ꧀ꦏꦸꦲꦺꦴꦭꦺꦃꦲꦭꦶꦲꦭꦶꦲꦶꦏꦶꦏꦭꦮꦤ꧀ꦒꦩ꧀ꦥꦁꦧꦔꦼꦠ꧀꧈ꦪꦲꦶꦏꦸꦲꦁꦒꦺꦴꦤ꧀ꦏꦸꦠꦸꦏꦸꦱꦏꦱꦮꦶꦗꦶꦤꦶꦁꦮꦺꦴꦁꦲꦶꦁꦩꦼꦯꦶꦂ꧈ꦉꦒꦠꦼꦭꦸꦁꦥꦸꦭꦸꦃꦫꦸꦥꦶꦪꦃ꧉
꧋ꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂ꧇ꦲꦥꦠꦼꦩꦼꦤ꧀ꦤꦤ꧀ꦥꦔꦤ꧀ꦢꦶꦏꦩꦸꦲꦶꦏꦸ꧈ꦝꦺꦴꦏ꧀ꦠꦼꦂ꧈ꦲꦮꦶꦠ꧀ꦉꦒꦤꦺꦩꦿꦶꦥꦠ꧀ꦠꦺꦧꦲꦺ꧈ꦱꦤꦗꦤ꧀ꦱꦏꦲꦒꦼꦭꦱ꧀ꦥꦶꦱꦤ꧀꧈ꦩꦼꦏ꧀ꦱꦭꦸꦮꦶꦃꦱꦏꦱꦩꦺꦴꦤꦺꦴ꧈ꦩꦂꦒꦥꦁꦒꦫꦥ꧀ꦥꦶꦁꦠꦸꦭꦶꦱꦤ꧀ꦤꦺꦥꦺꦤꦶꦧꦔꦼꦠ꧀꧉ꦱꦠꦼꦩꦼꦤꦺꦱꦫꦶꦫꦩꦸꦲꦉꦥ꧀ꦲꦔ꧀ꦭꦺꦴꦫꦺꦴꦧ꧀ꦧꦏꦺꦲꦏꦸ꧉ꦏꦶꦫꦏꦸꦱꦫꦶꦫꦩꦸꦱꦲꦶꦏꦶꦮꦶꦱ꧀ꦱꦼꦥꦸꦃꦱꦂꦠꦮꦶꦱ꧀ꦩꦔꦽꦠꦺꦴꦱ꧀꧈ꦩꦤꦮꦲꦺꦴꦫꦧꦏꦭ꧀ꦧꦶꦱꦲꦔ꧀ꦭꦺꦴꦫꦺꦴꦧ꧀ꦧꦏꦺꦲꦏꦸ꧉ꦲꦭꦶꦲꦭꦶꦲꦶꦏꦶꦚꦠꦪꦺꦤ꧀ꦠꦶꦫꦺꦴꦤ꧀꧈ꦤꦔꦶꦁꦱꦥꦏꦁꦲꦤꦸꦭꦶꦱ꧀ꦧꦱꦪꦲꦸꦢꦶꦏꦸꦤꦲꦶꦁꦩꦿꦶꦥꦠ꧀ꦠꦺꦲꦶꦏꦸ꧉ꦱꦠꦼꦩꦼꦤ꧀ꦤꦺꦮꦺꦴꦁꦏꦁꦲꦤꦸꦭꦶꦱ꧀ꦲꦶꦏꦸꦥꦚ꧀ꦕꦺꦤ꧀ꦮꦺꦴꦁꦥꦶꦤ꧀ꦠꦼꦂ꧉
꧋ꦏꦸꦭꦩꦁꦱꦸꦭ꧀ꦭꦶ꧇ꦏꦁꦩꦁꦏꦺꦴꦤꦺꦴꦩꦲꦸꦲꦏꦸꦲꦺꦴꦫꦮꦼꦫꦸꦃ꧈ꦮꦼꦫꦸꦃꦏꦸꦩꦤꦮꦠꦸꦭꦶꦱ꧀ꦱꦤ꧀ꦏꦁꦲꦤꦲꦶꦁꦲꦭꦶꦲꦭꦶꦲꦶꦏꦸꦧꦱꦪꦲꦸꦢꦶꦏꦸꦤ꧈ꦲꦶꦪꦱꦮꦶꦱ꧀ꦱꦺꦱꦫꦶꦫꦩꦸꦩꦲꦺꦴꦱ꧀ꦩꦲꦸ꧉ꦲꦏꦸꦩꦸꦁꦱꦸꦩꦸꦫꦸꦥ꧀ꦩꦤꦮꦲꦭꦶꦲꦭꦶꦲꦶꦏꦸꦏꦒꦸꦁꦔꦤ꧀ꦤꦶꦁꦱꦮꦶꦗꦶꦤꦶꦁꦮꦤꦶꦠꦧꦺꦴꦁꦱꦭꦸꦲꦸꦂ꧈ꦲꦱ꧀ꦩꦤꦺ Walda Nagasta꧈ꦠꦸꦫꦸꦤ꧀ꦤꦶꦁꦟꦨꦶꦯꦸꦭꦺꦩꦤ꧀ꦭꦤ꧀ꦫꦗꦥꦸꦠꦿꦶꦲꦶꦁꦯꦺꦧ꧉ꦲꦭꦶꦲꦭꦶꦲꦶꦏꦸꦢꦶꦱꦩ꧀ꦧꦸꦠ꧀ꦠꦏꦺꦩꦫꦁꦲꦏꦸ꧉
꧋ꦠꦸꦮꦤ꧀ Higgs ꦤꦸꦤ꧀ꦠꦼꦤ꧀ꦩꦼꦤ꧀ꦝꦼꦠ꧀ꦱꦸꦱꦸꦥꦺꦮꦲꦸꦱꦲꦢꦶꦥꦸꦤ꧀ꦠꦶꦔꦭ꧀ꦭꦶꦩꦭꦶꦃ꧈ꦱꦠꦼꦩꦃꦢꦶꦥꦸꦤ꧀ꦊꦧꦼꦠ꧀ꦠꦏꦼꦤ꧀ꦲꦶꦁꦏꦤ꧀ꦛꦺꦴꦁꦔꦤ꧀ꦤꦶꦁꦫꦺꦴꦩ꧀ꦥꦶꦤꦶꦥꦸꦤ꧀ꦱꦂꦮꦶꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧇ꦩꦶꦠꦿ꧈ꦲꦏꦸꦲꦺꦴꦫꦧꦏꦭ꧀ꦩꦲꦶꦢꦺꦴꦥꦔꦤ꧀ꦢꦶꦏꦩꦸꦲꦶꦏꦸ꧈ꦱꦲꦸꦥꦩꦏꦁꦕꦫꦶꦠꦲꦶꦏꦸꦢꦸꦢꦸꦱꦫꦶꦫꦩꦸ꧈ꦮꦶꦱ꧀ꦩꦼꦱ꧀ꦛꦶꦢꦏ꧀ꦲꦫꦤꦶꦒꦺꦴꦫꦺꦃ꧈ꦩꦂꦒꦱꦧꦼꦤ꧀ꦧꦺꦴꦕꦃꦱꦏꦺꦴꦭꦃꦧꦶꦱꦮꦼꦫꦸꦃ꧈ꦪꦺꦤ꧀ꦠꦼꦩ꧀ꦧꦸꦁ꧇ Walda Nagasta ꦲꦶꦏꦸꦧꦱ Ethiopisch ꦠꦼꦒꦼꦱ꧀ꦱꦺ꧇ꦠꦸꦫꦸꦤ꧀ꦤꦶꦁꦥꦫꦫꦠꦸ꧈ꦥꦝꦭꦤ꧀ꦠꦼꦩ꧀ꦧꦸꦁ꧇ Bath-Melachin ꦲꦶꦁꦧꦱꦪꦲꦸꦢꦶꦏꦸꦤ꧉
꧋ꦱꦉꦁꦠꦸꦮꦤ꧀ꦏꦥ꧀ꦠꦶꦤ꧀ꦎꦂꦩꦺꦩꦶꦉꦁꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀ꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂꦲ꦳ꦶꦒ꧀ꦒ꧀ꦱ꧀ꦲꦶꦁꦏꦁꦩꦏꦠꦼꦤ꧀ꦮꦲꦸꦭꦗꦼꦁꦒꦸꦩꦸꦗꦼꦁꦭꦠꦃ꧈ꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀꧇ꦩꦶꦠꦿ꧈ꦲꦁꦒꦺꦴꦤ꧀ꦩꦸꦩꦫꦶꦔꦶꦏꦠꦿꦁꦔꦤ꧀ꦩꦸꦁꦒꦸꦃꦲꦶꦁꦠꦼꦒꦼꦱ꧀ꦱꦺꦧꦱꦧꦱꦔꦩꦺꦴꦚ꧀ꦕꦲꦶꦏꦸꦏꦪꦕꦫꦤꦺꦮꦺꦴꦁꦲꦭꦱ꧀ꦱꦤ꧀ꦏꦁꦩꦶꦒꦸꦤꦏ꧀ꦲꦏꦺꦮꦢꦸꦁꦮꦠꦸ꧉ꦩꦸꦭꦤꦺꦲꦤꦲꦶꦁꦏꦭꦁꦔꦤ꧀ꦤꦶꦁꦥꦫꦲꦃꦭꦶꦧꦫꦁꦧꦫꦁꦏꦸꦤꦱꦫꦶꦫꦩꦸꦲꦺꦴꦫꦥꦠꦶꦏꦺꦴꦤ꧀ꦝꦁ꧉
꧋ꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂ꧇ꦏꦥ꧀ꦠꦶꦤ꧀ Orme꧈ꦭꦸꦮꦶꦃꦧꦼꦕꦶꦏ꧀ꦱꦫꦶꦫꦩꦸꦏꦺꦤ꧀ꦢꦼꦭ꧀ꦭꦧꦲꦺ꧈ꦠꦶꦤꦶꦩ꧀ꦧꦁꦭꦤ꧀ꦠꦸꦩꦸꦠ꧀ꦲꦸꦫꦸꦤ꧀ꦉꦩ꧀ꦧꦸꦒ꧀ꦏꦁꦲꦤꦺꦭꦏ꧀ꦲꦏꦺꦏꦕꦶꦁꦏꦿꦁꦔꦤ꧀ꦤꦶꦁꦱꦼꦱꦼꦉꦥ꧀ꦥꦤ꧀ꦩꦸꦲꦶꦏꦸ꧉ꦲꦮꦶꦠ꧀ꦮꦺꦴꦁꦏꦁꦮꦶꦱ꧀ꦩꦶꦒꦸꦤꦏ꧀ꦲꦏꦺꦮꦢꦸꦁꦮꦠꦸꦲꦸꦠꦮꦒꦒꦩꦤ꧀ꦮꦠꦸꦭꦶꦪꦤꦺꦲꦶꦏꦸ꧈ꦮꦶꦱ꧀ꦲꦺꦴꦫꦤꦸꦁꦒꦭ꧀ꦗꦩꦤ꧀ꦏꦫꦺꦴꦮꦺꦴꦁꦲꦭꦱ꧀ꦱꦤ꧀꧉ꦲꦸꦮꦺꦴꦁꦲꦸꦮꦺꦴꦁꦲꦶꦏꦸꦮꦶꦱ꧀ꦭꦸꦮꦶꦃꦥꦶꦤ꧀ꦠꦼꦂꦱꦂꦠꦮꦶꦱ꧀ꦲꦭꦸꦱ꧀ꦧꦸꦧꦸꦢꦺꦤ꧀ꦤꦺ꧉ꦱꦏꦥꦤꦼꦩꦸꦏꦸ꧈ꦭꦸꦮꦶꦃꦧꦼꦕꦶꦏ꧀ꦝꦺꦴꦏ꧀ꦠꦼꦂ Adams ꦢꦶꦪꦠꦸꦂꦫꦶꦲꦩ꧀ꦧꦚ꧀ꦗꦸꦂꦫꦏꦺꦲꦁꦒꦺꦴꦤ꧀ꦤꦺꦕꦫꦶꦪꦺꦴꦱ꧀꧈ꦱꦮꦶꦱ꧀ꦱꦺ꧈ꦱꦫꦶꦫꦩꦸꦧꦚ꧀ꦗꦸꦂꦱꦒꦼꦢ꧀ꦲꦁꦒꦭꦶꦃꦩꦫꦁꦏꦁꦢꦶꦕꦫꦶꦪꦺꦴꦱ꧀ꦱꦏꦺꦩꦲꦸ꧉
꧋ꦏꦸꦭꦤꦸꦤ꧀ꦠꦼꦤ꧀ꦮꦶꦕꦤ꧀ꦠꦼꦤ꧀꧇ꦧꦺꦴꦏ꧀ꦩꦤꦮꦶꦠꦸꦮꦤ꧀ꦏꦥ꧀ꦠꦶꦤ꧀ꦧꦺꦴꦠꦼꦤ꧀ꦏꦂꦱꦩꦶꦉꦁꦔꦏꦼꦤ꧀ꦢꦺꦴꦔꦺꦁꦲꦶꦁꦏꦁꦧꦝꦺꦏꦸꦭꦕꦫꦶꦪꦺꦴꦱ꧀ꦱꦏꦼꦤ꧀ꦥꦸꦤꦶꦏ꧉
꧋ꦠꦸꦮꦤ꧀ꦏꦥ꧀ꦠꦶꦤ꧀꧇ꦠꦸꦮꦤ꧀ꦝꦺꦴꦏ꧀ꦠꦼꦂ꧈ꦩꦤꦮꦶꦥꦚ꧀ꦗꦼꦤꦼꦁꦔꦤ꧀ꦧꦺꦴꦠꦼꦤ꧀ꦲꦁꦒꦭꦶꦃꦫꦶꦏꦸꦃꦱꦂꦠꦥꦶꦠꦢꦺꦴꦱ꧀ꦝꦠꦼꦁꦏꦸꦭꦏꦢꦺꦴꦱ꧀ꦏꦥꦶꦠꦢꦺꦴꦱ꧀ꦱꦤ꧀ꦥꦚ꧀ꦗꦼꦤꦼꦁꦔꦤ꧀ꦝꦠꦼꦁꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂ꧈ꦏꦸꦭꦲꦶꦁꦒꦶꦃꦏꦼꦥꦺꦔꦶꦤ꧀ꦩꦶꦉꦁꦔꦏꦼꦤ꧀꧉
꧋ꦏꦸꦭꦧꦺꦴꦠꦼꦤ꧀ꦲꦺꦁꦒꦭ꧀ꦲꦚ꧀ꦗꦮꦧ꧀ꦮꦁꦱꦸꦭ꧀ꦭꦤ꧀ꦤꦶꦥꦸꦤ꧀ꦠꦸꦮꦤ꧀ꦏꦥ꧀ꦠꦶꦤ꧀ꦮꦲꦸ꧈ꦤꦔꦶꦁꦩꦮꦶꦩꦤꦃꦩꦤꦃꦱꦏꦼꦝꦥ꧀꧈ꦗꦭꦂꦫꦤ꧀ꦮꦺꦴꦤ꧀ꦠꦼꦤ꧀ꦱꦧꦧ꧀ꦧꦶꦥꦸꦤ꧀ꦲꦁꦒꦺꦤ꧀ꦏꦸꦭꦧꦺꦴꦠꦼꦤ꧀ꦥꦶꦠꦢꦺꦴꦱ꧀ꦝꦠꦼꦁꦠꦶꦪꦁꦱꦤꦺꦱ꧀꧈ꦏꦗꦮꦶꦝꦠꦼꦁꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂꦲꦶꦁꦏꦁꦱꦼꦠꦾꦥꦸꦤꦶꦏ꧉ꦤꦔꦶꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦠꦸꦮꦤ꧀ꦏꦥ꧀ꦠꦶꦤ꧀ Orme꧈ꦩꦏꦠꦼꦤ꧀ꦲꦸꦒꦶꦩꦿꦶꦥꦠ꧀ꦠꦶꦥꦸꦤ꧀ꦲꦶꦁꦏꦁꦲꦢꦩꦼꦭ꧀ꦱꦸꦩꦺꦃꦲꦶꦁꦥꦺꦴꦭꦠ꧀ꦠꦤ꧀ꦤꦶꦥꦸꦤ꧀ꦮꦲꦸ꧈ꦲꦤꦫꦶꦏ꧀ꦩꦤꦃꦏꦸꦭꦱꦂꦠꦤꦸꦏꦸꦭ꧀ꦭꦏꦼꦤ꧀ꦏꦥꦶꦠꦢꦺꦴꦱ꧀ꦱꦤ꧀ꦏꦸꦭꦝꦠꦼꦁꦥꦶꦪꦩ꧀ꦧꦏ꧀ꦏꦶꦥꦸꦤ꧀꧈ꦱꦠꦼꦩꦃꦏꦸꦭꦩꦁꦱꦸꦭ꧀ꦭꦶꦩꦏꦠꦼꦤ꧀꧇ꦠꦸꦮꦤ꧀ꦏꦥ꧀ꦠꦶꦤ꧀꧈ꦏꦮꦺꦴꦤ꧀ꦠꦼꦤ꧀ꦤꦤ꧀ꦥꦚ꧀ꦗꦼꦤꦼꦁꦔꦤ꧀꧈ꦱꦲꦲꦁꦒꦺꦤ꧀ꦥꦚ꧀ꦗꦼꦤꦼꦁꦔꦤ꧀ꦩꦶꦩꦶꦠꦿꦤ꧀ꦏꦭꦶꦪꦤ꧀ꦠꦸꦮꦤ꧀ꦥꦿꦺꦴꦥꦺꦱ꧀ꦱꦺꦴꦂꦥꦸꦤꦶꦏ꧈ꦱꦩ꧀ꦥꦸꦤ꧀ꦱꦒꦼꦢ꧀ꦢꦩꦼꦭ꧀ꦛꦸꦏꦸꦭ꧀ꦭꦶꦁꦏꦥꦶꦠꦢꦺꦴꦱ꧀ꦱꦤ꧀ꦏꦸꦭꦝꦠꦼꦁꦥꦚ꧀ꦗꦼꦤꦼꦁꦔꦤ꧀꧈ꦥꦿꦩꦶꦭꦩꦤꦮꦶꦥꦚ꧀ꦗꦼꦤꦼꦁꦔꦤ꧀ꦏꦂꦱꦠꦸꦩꦸꦠ꧀ꦩꦶꦉꦁꦔꦏꦼꦤ꧀ꦕꦫꦶꦪꦺꦴꦱ꧀ꦲꦶꦁꦏꦁꦧꦝꦺꦏꦸꦭꦥꦿꦠꦺꦭꦏ꧀ꦲꦏꦼꦤ꧀ꦥꦸꦤꦶꦏ꧈ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦥꦩ꧀ꦧꦼꦁꦔꦤ꧀ꦤꦶꦥꦸꦤ꧀꧈ꦤꦔꦶꦁꦥꦚꦸꦮꦸꦤ꧀ꦏꦸꦭ꧈ꦱꦢꦪꦕꦫꦶꦪꦺꦴꦱ꧀ꦲꦶꦁꦏꦁꦧꦝꦺꦥꦚ꧀ꦗꦼꦤꦼꦁꦔꦤ꧀ꦩꦶꦉꦁꦔꦏꦼꦤ꧀꧈ꦱꦩ꧀ꦥꦸꦤ꧀ꦥꦚ꧀ꦗꦼꦤꦼꦁꦔꦤ꧀ꦕꦫꦶꦪꦺꦴꦱ꧀ꦱꦏꦼꦤ꧀ꦝꦠꦼꦁꦠꦶꦪꦁꦱꦤꦺꦱ꧀꧉
꧋ꦠꦸꦮꦤ꧀ꦏꦥ꧀ꦠꦶꦤ꧀꧇ꦱꦩ꧀ꦥꦸꦤ꧀ꦠꦩ꧀ꦠꦸꦏꦺꦩꦮꦺꦴꦤ꧀ꦏꦸꦭꦧꦝꦺꦲꦔ꧀ꦭꦩ꧀ꦥꦃꦲꦶꦏꦢꦺꦴꦱ꧀ꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦏꦂꦱꦏ꧀ꦲꦏꦼꦤ꧀ꦥꦸꦤꦶꦏ꧈ꦝꦺꦴꦏ꧀ꦠꦼꦂ꧉
꧋ꦠꦸꦮꦤ꧀ Higgs ꦤꦸꦤ꧀ꦠꦼꦤ꧀ꦚꦼꦭꦤ꧀ꦤꦶꦉꦩ꧀ꦧꦒ꧀꧈ꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀꧇ꦱꦏꦥꦤꦼꦩꦸꦏꦸꦏꦱꦒꦃꦲꦤ꧀ꦤꦺꦠꦸꦮꦤ꧀ꦏꦥ꧀ꦠꦶꦤ꧀ꦲꦶꦏꦸꦮꦶꦱ꧀ꦕꦸꦏꦸꦥ꧀꧈ꦱꦫꦶꦫꦩꦸꦫꦏ꧀ꦲꦶꦪꦲꦺꦴꦫꦏꦂꦱꦲꦏꦺꦴꦤ꧀ꦱꦸꦩ꧀ꦥꦃꦩꦫꦁꦲꦏꦸꦭꦤ꧀ꦩꦫꦁꦠꦸꦮꦤ꧀ꦏꦥ꧀ꦠꦶꦤ꧀ꦠ꧈ꦝꦺꦴꦏ꧀ꦠꦼꦂ꧈ꦩꦸꦭꦤꦺꦱꦫꦶꦫꦩꦸꦲꦺꦁꦒꦭ꧀ꦏꦂꦱꦲꦕꦫꦶꦪꦺꦴꦱ꧀꧈ꦲꦭꦶꦲꦭꦶꦲꦶꦏꦶꦲꦁꦒꦺꦴꦤ꧀ꦩꦸꦲꦺꦴꦭꦺꦃꦱꦏꦔꦼꦤ꧀ꦢꦶ꧈ꦭꦤ꧀ꦩꦤꦺꦃꦱꦗꦿꦺꦴꦤꦶꦁꦫꦺꦴꦭꦱ꧀ꦠꦲꦸꦤ꧀ꦏꦁꦏꦥꦸꦁꦏꦸꦂ꧈ꦱꦫꦶꦫꦩꦸꦔꦸꦩ꧀ꦧꦫꦩꦼꦚꦁꦔꦼꦤ꧀ꦢꦶ꧈ꦢꦺꦤꦺꦱꦲꦶꦏꦶꦩꦼꦤ꧀ꦠꦱ꧀ꦫꦮꦸꦃꦱꦏꦔꦼꦤ꧀ꦢꦶ?
(ꦧꦝꦺꦏꦱꦩ꧀ꦧꦼꦠ꧀ꦠꦤ꧀)
