खपांतलो २०% खप संश्लेशीत रबराचो आसा. संश्लेशीत रबराच्या वट्ट उत्पादनांतलें ६० टक्क्यांपरस चड उत्पादन टायर उद्देगांत वापरतात. उत्पादनाच्या मानान संश्लेशीत रबराची मागणी चड प्रमाणांत आशिल्ल्यान संश्लेशीत रबर आयात करचें पडटा. सकयल दिल्ल्या कोश्टकांत रबराचे आयातीची आंकडेवारी दिल्या- भारतांतली संश्लेशीत रबराची आयात अशी-
वेगवेगळ्या देशांतली सैमीक आनी संश्लेशीत रबराच्या खपाची १९८१ ची आंकडेवारी अशी आशिल्ली (किग्रा)- अमेरिका ११.६; कॅनडा १२.०; अस्तंत जर्मनी ९.२, ब्रिटन ६.१, फ्रांस ८.५, ऑस्ट्रेलिया ६.७, इटली ६.८, जपान १०.९, भारतांतलो खप फकत ०.३३ कि. ग्रॅ. आशिल्लो.
रबर मंडळः (रबर बोर्ड)- १९४७ च्या रबर अघिनियप्रमाण रबर मंडळाची स्थापना केली. रबर मंडळाचें मुखेल कार्यालय केरळांत कोट्टायम शारांत आसा. ह्या मंडळान प्रयोगशाळेंत आनी रबर मळ्यांनी व्हड प्रमाणांत प्रयोग करून वेगवेळ्या जमनी खातीर साऱ्याचें प्रमाण थारायलां. रबराचें चड उत्पन्न दिवपी झाडां विकसीत केल्यांत. तंत्रीक नदरेन प्रमाणीत रबर तयार करपा खातीर देशी यंत्रसामग्री तयार केल्या. सैमीक रबराच्या वेगवेगळ्या वस्तुंच्या उत्पादना खातीर लागपी तंत्रज्ञानूय मंडळाचे वतीन कारखान्यांक दितात.
कोचीन विद्यापीठांत रबर प्रक्रिया आनी तंत्रविद्या ह्या विशयाचो बी.टॅक पदवेचो अभ्यासक्रम आसून तातूंत रबराची लागवड, दीख काडप, दिखावयली प्रक्या सारकिल्या गजालींचें शिक्षण दितात. गुजरात विद्यापिठान अहमदाबादाक रबर तंत्रविद्या संस्था स्थापन केल्या. खरगपूराक इंडियन इन्स्टिट्युट ऑफ टॅक्नोलॉजी हे संस्थेंत रबर तंत्रविद्या विभाग आसून तातूंत २ वर्सांचो एम. टॅक पदवेचो अभ्यासक्रम आसा. तशेंच, रबर उद्देगाच्या हीतसंबंदांची राखण करपा खातीर मुंबय इंडिया रबर इंडस्ट्रीज ऍसोसिएशन ही संस्था स्थापन जाल्या. इंडियन रबर मॅन्युफॅक्चरर्स रिसर्च ऍसोसिएशन ही संसोधन संस्थाय मुंबय आसा.
रबर मंडळाचे वतीन रबर (म्हयनाळें) रबर स्टॅटिस्टिकल न्यूस (म्हयनाळें), रबर बोर्ड बुलेटीन (त्रैमासीक) आनी इंडयन रबर स्टॅटिस्टिकल (वर्सुकी) हीं नेमाळीं प्रसिद्द करतात.
मलेशिया, इंडोनेशिया, श्रीलंका आनी विएतनाम ह्याय देशांनी रबर संशोधन संस्था म्हत्वाचें कार्य करीत आसून त्यो तंत्रीक लेख आनी शेतकाऱ्यांक उपेगी अशी म्हायती दिवपी पुस्तिकाय प्रसिद्द करतात.
कों.वि.सं.म.
रमजानः मुसलमान वर्साचो णववो म्हयनो, हो मुसलमानांचो उपास करपाचो म्हयनो. रम्ज म्हळ्यार भाजप. उपासान सगळीं पापां जळून वतात, म्हणून ह्या व्रताक हें नाव मेळ्ळें आसुयें. ह्या व्रताक पाळो दिवप हो तांच्या धर्माचरणाच्या पांच नेमांमदलो एक. ह्या उपासान सर्ग मेळटा आनी पाप नश्ट जाता, अशें महंमदाचें वचन आसा. म्हणून मुसलमान लोक हें व्रत पाळटात.
हें व्रत एक म्हयनोभर करप. उपासाच्या काळांत सुर्यउदेंता सावन तो अस्ताक वच मेरेन कांयच खावप-पियेवप ना. कांय लोक र्कीय गिळिनात. कश्ट करप्यांक दीस उजवाडाचे पयलीं जेवपाची मेकळीक आसता. भोंवडेकार, दुयेंत, म्हाताऱ्यांक, कुड्ड्यांक, गुरवार बायलांक आनी भुरग्यांनी हो उपास केलोना जाल्यार जाता. भोंवडेकार आनी दुयेंत लोकांनी वेळ मेळटा तेन्ना उपास करूंक जाय. हाका कज्ञा म्हळ्यार भरपाय अशें नांव आसा.
घर्मीक वृत्तीचे मुसलमान ह्या म्हयन्याचे कांय दीस मशिदींत सारतात. थंय परत परत प्रार्थना करप, कुराण वाचप हे कार्यक्रम करतात. रमजानाचे सत्ताविसावे रातीं स्वर्गांत पुराय कुराण ग्रंथ तयार जालो अशें महंमदान म्णिल्लें आसा. फकत उपास आनी प्रार्थना करून पुण्य लागना; त्या वेळार सत्यभाशण सद्दविचार आनी सदाचार हांकां म्हत्व आसता अशें महंमदाचें वचन आसा.
कों.वि.सं.म.
रमजान ईदः मुसलमानांची एक व्हड परब. हो सण म्हळ्यार रमजान उपासाचें पारणें आसता. शव्वाल हो तांचो धावो म्हयनो आसून, ताच्या पयल्याच दिसा हें पारणें करपाचें आसता म्हणून ताका ‘ईद – ऊल- फित्र’ अशें म्हण्टात. ह्या ईदापरस बकरी ईदाचें म्हत्व चड शिल्ल्दयान ताका ईद आनी हाका धाकलो ईद अशें म्हण्टात. ह्या दिसा खूब दानधर्म करतात म्हणून ताका इदुस्सदका अशेंय नांव आसा.
