पूण गरजेपरस उत्पादन उणें आशिल्ल्यान तांदूळ आनी हेर धान्यांची आयात करची पडटा. शेतवडीक जोड आशिल्लो पशुपालन वेवसाय दक्षिणेकडच्या मैदानी प्रदेशांत आनी नॉय, बांगहिआंग आनी डॉन न्हंयांच्या देगणांनी नेटान चलता. रानांतली येणावळय देशाचे अर्थवेवस्थेक हातभार लायता. घर बांदकामाक उपेगी पडपी लांकूड हें देशांतलें म्हत्वाचें उत्पादन. ताची निर्यात व्हड प्रमाणांत जाता. लाओसाचे भुंयेंत तरेकवार खनिजां आसून तातूंत मुखेलपणान कथील, पॉटॅश, जिप्सम, सैंधव, खनीज तेल, तांबें, भांगर, जस्त, शिंशें, मँगनीझ, पायरायट आनी गंधक हांचो आस्पाव जाता. पूण भांडवलाच्या उणावाक लागून हीं मिनां खूब उण्या प्रमाणांत काडटात.
उद्देगीक नदरेनय लाओस हो अविकसीत देश. देशाच्या वट्ट राश्ट्रीय उत्पादनांत उददेगीक उत्पादनांचो वांटो खूब उणो. देशांतल्या वट्ट कामगारांतले फकत 1% परसूय उणे लोक उद्देगांत घुस्पल्यात. उद्देगधंदे मुखेलपणान रान आनी शेतकी उत्पादनांचेर प्रक्रिया करप, हस्तवेवसाय आनी मूलभूत उपयोग्य वस्तू निर्माण करप ह्या प्रकारचे आसात. खणकाम, लांकडी कोळसो निर्मिती, शिमीटडाच्यो विटो करप, तंबाकूचेर प्रकिया, भात कांडप, फर्निचर लांकूड चिरप, सूत, कापड, च्या आनी काफयेचेर प्रक्रिया हे उद्देग ल्हान व्हड प्रमाणाचेर चलतात. विज्ञान आनी तंत्रगिन्यानाचे बाबतींत लाओसाक परदेशी तज्ञांचेर आदारून रावचें पडटा.
किप हें देशाचें अधिकृत चलन. नॅशनल बँक ऑफ लाओस ही देशांतली मध्यवर्ती बँक. बँक ऑफ इंडोचायना ही थंयची सगळ्यांत व्हडली वेपारी बँक.
दोंगरी भूंय, खूब देगणां आनी घोग्यांनी पडपी पावसाक लागून येरादारीच्या मळारूय हो देश फाटीं आसा. देशांतली 90% म्हाल येरादारी आनी 80% प्रवासी येरादारी रस्त्यांवयल्यान जाता. व्हिएतनाम झुजा तेंपार अमेरिकेन केल्ल्या बाँब हल्ल्यांनीय खूब रस्त्यांची नासधूस जाली. देशांतलीं म्हत्वाचीं शारां हवाई मार्गान जोडल्यांत. व्ह्यँत्यान शारांत आंतरराश्ट्रीय विमानतळ आसा. रशियेच्या आदारान 1976त लाओ एविएशनची स्थापणूक केल्या. लाओसांत रेल्वेमार्ग ना. मॅकाँग आनी तिच्या फांट्यांतल्यान उदका येरादारी चलता. रेडिओ आनी दूरचित्रवाणी हांची वेवस्था थंय आसा. पूण दूरचित्रवाणीवयल्यो कार्यावळी व्हिएतनामांतल्यान प्रसारीत जातात.
लोक आनी समाजजीण : लाओसांतले चडशे लोक हिनयान पंथी बौध्दधर्मी आसात. हांगाच्या दर एका गांवांत आनी शारांत बौध्द देवळां दिश्टी पडटात. व्ह्यँत्यान आनी ल्वांगप्राबांग शारांनी बुध्दाचीं खूब देवळां आशिल्ल्यान तांकां सिटीस ऑफ थाउझंड्स ऑफ टँपल्स अशें म्हण्टात. लाओ हो देशांतलो मुखेल वंशीक पंगड. देशांतले 50% वयर लोक ह्या पंगडांतले. भास, संस्कृताय आनी सुवातेवयल्यान लाओ लोकांचे मुखेलपणान चार पंगड केल्यात ते अशे : लाओ-ताई, लाओ-थेऊंग आनी लाओ-सोऊंग. हेर लोकांमदीं व्हिएतनामी, चीन युरोपी, भारतीय आनी पाकिस्तानी लोकांचो आस्पाव जाता. लाओ लोकांच्या चारूय पंगडांभितर पोटजाती आसात. लाओ ही देशाची अधिकृत भास. मेकाँग देगणांत लोकांची दाटाय चड आसा. हांगा जल्म प्रमाणाच्या मानान मरणाचें प्रमाण अर्दें आऐशिल्ल्यान लोकसंख्यां खूब उणी आसा. हंगाच्या लोकांचें जिवीतमान उण्या दर्ज्याचें आशिल्ल्यान मोटारगाड्यो खूब उण्यो आसात. सायकल आनी रेडिओ ह्यो थंयच्या लोकांच्यो चैनीच्यो वस्तू. हांगा पियेवपाच्या उदकाची वेवस्था बरी ना. देखून हांगा वेगवेगळ्या पिडांच्यो धामी पातळटात. लाओसाचे चडशे लोक लांकडी वा कोंड्यांच्या घरांनी रावतात. तांचें पाखें मुखेलपणान तणापसून तयार करतात. हीं घरां जमनीसावन 1 ते 2 मी. ऊंच लांकडी खुटांचेर उबारतात. थंय शिक्षणाचो प्रसार नेटान जायत आसा. व्ह्यँत्यान हें देशांतलें सगळ्यांत व्हडलें शार. सावान्नाकेत, पाक्से, ल्वांगप्राबांग, सायबुरी, टाकेक हींय हांगाचीं म्हत्वाचीं शारां.
-कों. वि. सं. मं.
लांकूड : सादारणपणान व्हड आकाराच्या वनस्पतींच्या (झाडांच्या / रुखांच्या) कांडक वा खांदयेक लाकूंड म्हणप जाता. वनस्पती शास्त्राप्रमाण लांकडाचो जो प्रकाश्ठ म्हणून भाग आता ताका लांकूड म्हण्टात. भायली साल आनी भितरलो गर हांचेमदल्या तंतुयुक्त अशा कठीण भागाक लांकूड म्हण्टात. झाडाच्या सगळ्या भागांक सशक्त करपी पेशींच्या (उदक, अन्नरस पावोवपी) समुहाचें मेळून लांकूड जाता. लांकडांत 50-60% सेल्युलोझ, 20-25% लिग्निन आनी 10-20% कार्बोहायड्रेटां आनी खनिज पदार्थ मेळटात. लांकूड ही एक म्हत्वाची सैमीक साधनसंपती.
पुर्विल्ल्या काळांत मनीस घर बांदपाखातीर आनी इंधन म्हणून लांकडाचो उपेग करतालो. उपरांत उदका येरादारीखातीर लागपी व्हडीं, शेतांतलीं अवजारां, वाहनां, खेळपाचें साहित्य, कारखान्याखातीर लागपी कच्चो माल, प्लायवूड, कागद आदी गजालींखातीर लांकडाचो उपेग करूंक लागलो. उद्देगीक क्रांती आनी दुसऱ्या म्हाझुजा उपरांत जायत्या मळांचेर लांकडाचो उपेग जावंक लागलो आनी ताची मागणीय वाडली.
धर्तरेचो 1/3 भाग रानान व्यापिल्लो आसा. भारतांत 6.9 लाख चौ. किमी. म्हळ्यार सुमार 22% भाग रानान व्यापिल्लो आसा. भारतांत सादारण 3600 प्रकारांचीं झाडा अस्तित्वांत आसून तातुंतलीं 200 प्रकारांचीं उपेगी आसात आनी फकत कांय झाडांचें लांकुडच बरें तिगपी आसा. युरोपांत स्विडन, नॉर्वे आनी फिनलंड ह्या देशांची लांकडाखातीर नामना आसा. थंय पायन, स्प्रूस आनी बर्च ह्या झाडांचें लांकूड व्हड प्रमाणांत जाता आनी ताची निर्यात जाता. रशियेचो 1/
