कल्पकमाक आण्वीक शक्ती निर्माण करपी केंद्र आसा. राज्याक 1,000 किमी.दर्यादेग आसा आनी दर्यादेगे वाठारांत नुस्त्या वेवसायाक चड म्हत्व आसा.हांगा नुस्तें मारपी 402 गांव आसात.नुस्तें राखून दवरपी थंड घरां आनी प्रशिक्षण केंद्रां आसात. राज्यांत जायते उद्देग चलतात,तातूंत सुती वस्त्र,साकार,शिमीट आनी यंत्रीक हे मुखेल उद्देग आसात.राज्यांत साबार लुगटो गिरण्यो आसात.कोईमुत्तूर,मद्रास आनी मदुराईक गिरण्यो चड आसात.हांगाचें हातमागावयलें लुगट प्रसिध्द आसा.मद्रासाक कृत्रीम धागे तयार करतात.कोईमुत्तूर,सेलम,निलगिरी,तिरुनेलवलेक रेस्माचें उत्पादान करतात.उत्तर अर्काट,द.अर्काट,तिरुचिरापल्ली आनी मदुराई हांगा साकर कारखाने आसात.सद्या सुमार 4,79,165 मॅ.टन साकार तयार जाता.देशांत शिमीट तयार करपाक तमीळनाडूचो दुसरो क्रमांक लागता.कोईमुत्तूर,मदुक्कराई,तिरुचिरापल्ली,तिरुनेलवेली आनी उत्तर अर्काटाक फस्कांचे कारखाने आसात.रामनाथपुरम,चिंगलपुट,तिरुनेलवली आनी उत्तर अर्काटाक फस्कांचे कारखाने आसात .ते भायर चेन्नई,कोईमुत्तूर आनी मदुराईक लां कापड.कोईमुत्तूराक कवंची,चेन्नई आनी सेलमाक वनस्पती तूप,मेत्तूर आनी चेन्नईक रसायनीक पदार्थ,मद्रासाक मोटार गाडयो आनी कोईमुत्तूराक साकार तयार करपाचे कारखाने आसात.तशेंच सारीं,चिरुट,सिगरेट,रबर,चामडया उद्देग वाडत आसात. हेभायर सार्वजनीक क्षेत्रांत नेयवेली लिग्नायट,इंटीग्रल कवंची फॅक्टरी,हाय प्रॅशर बॉयलर प्लांट,हिंदुसदथान फोटो फिल्म कारखानो,हिंदुस्थान टेलिप्रिंटर्स,मद्रास रिफायनरीस,मद्रास फर्टिलायझर्स,जड वाहनां,संरक्षण सामग्री,शस्त्रक्रिया उपकरण कारखानो,सलेम स्टील प्लांट असले जायते कारखाने थंय आसात.ह्या राज्यांतल्यान चामडया सामान,सुती कापड .सूत,च्या,काफी.मसाले,मोटार,आदी वस्तू निर्यात जातात. पर्यटन राज्यांत इतिहासीक,धर्मीक,शिक्षणीक,उद्देगीक तशेंच सैमीक स्थळां खूब आशिल्ल्यान पर्यटनाक खूब म्हत्व आसा.हांगा कितलींशींच देवळां आनी गोपुरां आसात.पल्लव काळावयलें कांचीपुरम् हांगांचें कैलास देवूळ पळोवपा सारकें आसा.महाबलीपूरमाक सातव्या-आठव्या शतमानांतल्यो सुंदर होंवरी पळोवंक मेळटात.मदुराई,रामेश्वर,कन्याकुमारी,धनुष्कोडी अशा एक म्हत्वाच्या थळांची पर्यटना खातीर नामना आसा.निलगिरी,कुन्नुर,कोडईकानल,ऊटकमंड(ऊटी) अशीं थंड हवेची ठिकाणांय आसात.पर्यटनाकलागून हांगा सवलती सुविधा निर्माण जाल्यात येरादार राज्यांत वट्ट1,21,352किमी.लांबयेचे रस्ते आसात.तातूंत 68,962 किमी.पक्के रस्ते,78,463 किमी.मोटारीचे रस्ते आसात .हातूंत 1,855 किमी.राश्ट्रीय मार्ग आसात.राज्यमार्ग 1,729 किमी.आसात.म्हालांतले रस्ते 13,864 किमी,आसात.नगरपालिका आनी भौशीक बांदकाम खात्या कडचे 7,615 किमी.आसात.मद्रास आनी तुतिकोरीन हीं भारतांतली व्हडलीं बंदरां तशेंच कडलोर,नागापट्टण्म,रामेश्वर,पांबन,किलाकराई हीं ल्हान बंदरां.आंध्र आनी तमीळनाडू ह्या राज्यांतल्यान बकिंगहॅम खारजांतल्यान उदका येरादरी करतात.चेन्नईक दक्षिण रेल्वेचे मुखेल कार्यालय आसा.मद्रासाक मीनाबक्कम हो आंतरराश्ट्रीय विमानतळ आसा.ते भायर तिरुचिरापल्ली,कोईमुत्तूर,रामनाड,तंजावर,वेळळूर हांगाय विमानतळ आसात.कोईमुत्तूर,चेन्नईक विमानउड्डाण करपी संस्था आसात. लोक आनी समाजजीण राज्याची लोकसंख्या 5,56,38,318,(1991).ह्या राज्यांत दर 1000 दादल्यां दाटाय दर चौ.किमी.क428 आसा.उद्देगधंद्यांत वाड जाल्ल्यान शारांत लोकसंख्येचे प्रमाण 30,26 टक्क्यां मेरेन वाडलां.बायलांपरस दादल्यांमदीं बरपाक्षराचें प्रमाण चड आसा.राज्यांत जैन,बौध्द,हिंदू,किस्तांव,मुसलमान,शीख अशें जायते धर्माचे लोक रावतात.आदल्या तेंपार हांगाचे थळावे लोक भूतप्रेत,वनस्पत,नाग हांची पुजा करताले.तंत्र-मंत्र हाचेर तांचो विस्वास आशिल्लो.जनावरांचो बळी देवामुखार दिताले.ते शिवाची पुजा करतात आनी हांगा शिवलिंग पुजेक चड म्हत्व आसा.राज्यांत मक्कळ,देवर आनी नकरर ह्यो तीन मुखेल जमाती आसात.मक्कळ म्हळ्यार शुध्द द्रवीड, देवर म्हळ्यार आर्य ब्राह्मण आनी नक्कर म्हळ्यार रानांत रावपी आदिवासी लोक.तोड,मखर,करुंब,काणिक्कर,उरळी,माडिग ह्यो आदिवासी जमाती हांगा आसात.खेड्यांतल्या घरांचें पाखें तण,पालो,वाली,कोंडे धरुन तयार करतात जाल्यार घराच्यो वण्टी लांकूड,विटो आनी माती भरसून करतात.शारांतली घरां शिमीट आनी कॉक्रिटाचीं आसतात.हांगाच्या लोकांच्या जेवणांत तांदूळ.उडीद,ज्वारी,बाजरी,मेको,तोर हे पदार्थ आसतात.चडशा लोकंचो शेती वेवसाय आशिल्ल्यान रावपाची तर सादी आसता.दादले धव्या कपडयाची लुंगी आनी सदरो घालतात जाल्यार बायलो हातमागर विणिल्ल्यो साडयो आनी पोलको घालतात. राज्यांतलो मुखेल सण पोंगळ हो मकर संक्रांतीचो सण तीन दीस चलता.शेतकामत्यांक ह्या सणाचें चड म्हत्व आसता.शेतांतलें पीक घरांत येतकच तें वापरचे आदीं ताचो निवेद्य दाखयतात.घराघरांनी सूर्य,वायू आनी वास्तूदेव हांची पुजा करतात.देवाक तांदूळ,गोड आनी दूद हांचेपसून तयार केल्ली खीर(पायस)दाखरतात.दुसऱ्या दीसा सत्यलक्ष्मीची आनी तिसऱ्या दिसा गोरवांची पुजा करतात.सांजवेळा गाय ,बैल,हांकां सजोवन तांची मिरवणूक काडटात.वैकुंठ .एकादशी हो हांगाचो दुसरो मुखेल उत्सव मागशीर्श म्हयन्यांत शुध्द एकादशीक जाता.भगवान विष्णु एका असुराचो नायनाट करपाखातीर वैकुंठासावन धर्तरेचेर अवतार घेता म्हणून हे एकादशीक वैकुंठ एकादस वा मुक्कोडी एकादस म्हण्टात.त्या दिसा हांगाचे लोक श्रीरंगमची यात्रा करतात. ते भायर हांगा तिरुकल्याणम्,गजपर्व,कोलुवू ह्यो परबो मनयतात.तिरुमल्याणम हो देवाच्या लग्नाचो सुवाळो.गजपर्व हो एरावताचो उत्सव ते कार्तिकांत करतात.कोलुवू हो नवरात्रांत येवपी बायलांचो उत्सव. तमीळनाडू राज्यांत संगीत आनी नाच ह्यो कला आदल्या तेंपार सावन आसात.तशेंच कुरवंजी हो हांगाचो परंपरीक नाचाचो प्रकार.यामिनी कृष्णमूर्ती,कमला लक्ष्मण,पाद्निनी,रागिणी,हेमामालिनी,ललिता,वैजयंतीमाला आनी कनका ह्यो थंयच्यो नामनेच्यो भरतनाटयम् नाच करपी.संगीतात ह्या राज्यान बरीच प्रगती केल्या.त्यागराज,मुथ्थुस्वामी दक्षिणी वीणा ह्या तंतूवादयाक खाशेंलें म्हत्व आसा.ते भायर घट्म
