ताचों 1991 वर्सा ‘अंतरआयामी’ हो देवनागरी कोंकणी कथा संग्रह उजवाडा आयलां. ताका 1994 वर्साचो साहित्या अकादेमीचो पुरस्कार फावो जाला. 1996 वर्सा कोची हांगा जाल्ल्या अखिल भारतीय कोंकणी लेखक संमेलनाचो तो स्वागताध्यक्ष आशिल्लो. -कों.वि.सं.मं
प्रभू, गोपाळ व्यंकटेश: (जल्म: 23 सप्टेंबर 1930, माशें-काणकोण).
सुटकेझुजारी. ताणीं एस्. एस्.सी मेरेन शिक्षण घेतलें. तेचपरी ताणें राश्ट्रभाशा प्रवीण आनी शिक्षक पदविका घेतली. 1945 मेरेन तो ‘नॅशनल कॉंग्रेस गोवा’ हे संघटनेचो वांगडी आशिल्लो. पत्रका वांटप, पत्रकां लावप, खबरो पावोवप, सुटकेझुजांत वांटो घेवंक लोकांक स्फूर्त द्वप असलीं कामां ते करतालो. 1945-56 ह्या काळांत पोलिसांनी ताका तीन फावटी धरलो. सगळे मेळून तो 18 म्हयनें बंदखणींत आशिल्लो. 15 ऑगस्ट 1972 ह्या दिसा भारत सरकारान ताम्रपत्र दिवन ताचो भोवमान केलो. -कों.वि.सं.मं
प्रभू, नारायण अनंत: (जल्म: 23 जुलय 1933, माशें, लोलयें-काणकोण). सुटकेझुजारीं. तो ‘नॅशनल कॉंग्रेस गोवा’ हे संघटनेचो वांगडी आशिल्लो. 26 जानेवारी 1955 ह्या दिसा लोलयें वाठरांत गोविंद प्रभूदेसाय हाच्या फुडारपणाखाला ताणें सत्याग्रहांत वांटो घेतील्लो. पोलिसांनी ताका धरलो आनी तांका प्रदेशीक लश्करी न्यायलयामुखार उबो करुन आठ वर्सा बंदखणीची ख्यास्त, 2,000 रुपया दंड वा तो भरलोना जाल्यार आनीक दोन वर्सा बंदखणीची ख्यास्त फर्मायली. 15 ऑगस्ट 1972 ह्या दिसा भारत सरकारान ताम्रपत्र दिवन ताचो भोवमान केलो.
प्रभू, श्रीकांत दत्ता : (जल्म: 26 नोव्हेंबर 1935, लोलयें- काणकोण)
सुटकेझुजारी. ताणें एस्.एस्.सी मेरेन शिक्षण घेतलें. 1954 मेरेन तो ‘नॅशनल कॉंग्रेस गोवा’ हे संघटनेचो तो वांगडी आशिल्लो. पत्रकां लावप, सुटकेझुजाऱ्यांक म्हत्वाच्यो बातम्यो पावोवप असलीं कामां तो करतालो.
26 जानेवारी 1955 ह्या दिसा लोंलयें वाठारांत जाल्ल्या सत्यग्रहांत ताणें वांटो घेतील्लो. पोलिसांनी ताका धरलो आनी पांच म्हयने बंदखणींत दवरलो. उपरांत ताका प्रदेशीक लश्करी न्यायालया मुखार उबो करुन धा वर्सा बंदखणीची ख्यास्त दिली. तशेंच पंदरा वर्सांखातीर ताचे राजकीय हक्क काडून घेतलें. ते भायर वीस वर्सांखातीर ताका गोंयाभायर धाडलो. 15 ऑगस्ट 1959 ह्या दिसा बंदखणींतल्यान ताची सुटका जालीं. 1947 वर्सा भारत सरकारान ताम्रपत्र दिवन काचो भावमान केलो. -कों.वि.सं.मं
प्रमाणपत्र: कसल्याय लिखीत मजकुराच्या खरेपणाविशीं प्रमाणीत केल्लें निवेदन म्हळ्यार प्रमाणपत्र. हाका इंग्लीश भाशेंत सर्टिफीकेट (Certificate) अशें म्हणटात. प्रमाणपत्राक खूबदां दाखलो अशेंय म्हणटात. प्रमापत्रांतलो मजकूर सत्य आनी अधिकृत आसा, हाची खात्री प्रमाणपत्रावयल्यान जाता.
प्रमाणपत्रांचे वेगवेगळे प्रकार आसात. देखीक- विक्रीचें प्रमामपत्र, वारसो हक्काचे प्रमाणपत्र, विद्यापीठाच्यो पदव्यो वा पदविका हांचे प्रमाणपत्र आदी. चड करुन त्या त्या विशयांतली प्रमाणपत्रां खाशेले रितीन दिवपाची पद्द्त आसा. देखीक- न्यायलयाच्या कामविशीं आशिल्लीं प्रमाणपत्रां वा विद्यापीठाच्या पदव्याविशींची प्रमाणपत्रां एके खाशेले परिभाशेंत वा नेमून दिल्ल्या प्रपत्रकाप्रमाण आसतात.
वेव्हारांत वेगवेगळे तरेचे लिखीत म्हायतीक अधिकृत म्हूणून certify (प्रमाणीत करप), attest (अनुप्रमाणीत करप),anthenticate (अधिप्रमाण करप) ह्या इंग्लीश उतरांनी संबोधतात. कोणाय व्यक्तीचे वागणूकेविशींय दाखलो वा प्रमाणपत्र दिवंचो पडटा. शासकीय प्रशासनांत वा हेर भौशीक वेव्हारांत कसलेंय निवेदन प्रमाणीत करपाची कार्यपद्दत थरयल्ली आसता, तशेंच खाशेल्या व्यक्तींक वा अधिकाऱ्यांक ते विशींचे अधिकार दिल्ले आसतात.
कायद्याच्या मळार प्रमाणपत्र म्हळ्यार कसलेय गजाली विशींचे सत्यसत्यतेविशीं योग्य व्यक्तीन जाहीर रितीन केल्लें अधिकृत निवेदन. कोणाय व्यक्तीन कसलेंय गजालीविशीं स्वताचे निशाणेसयत दिल्ले लेखी म्हायतीकूय प्रमाणपत्र अशें म्हणटात. एका न्यायालयाच्या अधिकाऱ्यान अधिकृत निवेदन म्हळ्यार प्रमाणीत प्रत(Certified copy) अशें म्हणटात. न्यायालयांत कसलेय गाजालीचे सत्यासत्यचेविशीं पुरावो म्हूणून कोणाय सरकारी अधिकाऱ्यान दिल्ल्या प्रमाणपत्राचो उपेग जावंक शकता.
खंयच्याय वेपारी कंपनीची नव्यान स्थापना करचेली आसता, तेन्ना अशे संस्थेची कायदेशीर नोंदणी करची पडटा. अशें नोंदणे उपरांत कंपनीक वा संस्थेक जें नोंदणीपत्र दितात ताका (Certificate of registration) अशें म्हणटात. हें प्रमाणपत्र अशें कंपनीच्या संदर्भात ते कंपनीच्या कायदेशीर अस्तितवाचो पुरावो म्हूणून वापरतात. (Certificate of deposite) वा ठेवीविशींचे प्रमाणपत्र हे कोणाय बॅंक अधिकाऱ्यान दिल्ले कोणाय व्यक्तीच्या खात्यांतल्या थरावीक रकमेविशींचे प्रमाणपत्र ‘Succession Certificate’ वा वारसो हक्काचे प्रमाणपत्र हें खंयचेय मेल्ले व्यक्तीच्या संबंदांत त्या मनशावरवीं प्राप्त जाल्ल्या अधिकाराचें प्रमाणपत्र अशें मानतात. -कों.वि.सं.मं
प्रयागः
उत्तर प्रदेशांतल्या गंगा – यमुना न्हंयांच्या संगमावयलें तीर्थस्थान. प्रयाग म्हळ्यारुच अलाहबाद. हें यमुनेचे दावे देगेर आसून, आदल्या तेंपारसावन ताका ‘तीर्थराजप्रयाग’ म्हणून वळखतात. हांगा गंगा, यमुना आनी सरस्वती ह्या तीन न्हंयांचो संगम जाला. गंगा-यमुना दिसतात पूण सरस्वती दिसना. ह्या तीनूय न्हंयांच्या संगमाक ‘त्रिवेणी संगम’ म्हणटात.
प्र+यजा= व्हड यज्ञ करप ह्या धातुवयल्यान ह्या स्थानाची व्युत्पत्ती
