बेसबॉल:
एक मैदानी खेळ. दरएकी णव ख्रेळगड्यांच्या दोन पंगडांमदीं पेल्ल आनी बॅट हांच्या आदारान हो खेळ खेळटात. हो अमेरिकेचोराष्ट्रीय खेळ. बेसबॉलाच्या मैदानाचो जो आकार आसता ताचेवयल्यान ताका ‘डायमंड’ अशेंय म्हण्टात. तातूंत थरावीक अंतराचेर ज्यो चार बेसीस म्हळ्यार तळ वा घरां आंखिल्लीं आसतात. तांचेवयल्यान ह्या खेळाक ‘बेसबॉल’ हें नांव पडलें.
एकुणिसाव्या शतमानाचे सुरवेक सावनूच क्रिकेट आनी राउंडर्स हांचे धर्तेवयलो बेसबॉलाचो एक प्रकार रूढ आशिल्लो. तशेंच ताचे आदींय ‘वन ओल्ड कॅट’ ह्या नांवाचो चल्यांचो एक खेळ खेळटाले. ह्या प्रकारांतल्यानूच आर्विल्ल्या बेसबॉलाची निर्मिती जाली. ॲबनर डबलड हाणें १८३९त कूपर्सटाउन, न्यूयॉर्क हांगा हो खेळ सुरू केलो अशें म्हणप जाता. पूण ताच्या एका शतमाना आदीं हो खेळ सामक्या साद्या स्वरूपांत प्रचलीत आशिल्ल्याचे उल्लेख मेळटात. ‘लिटल प्रिटी पॉकेट’ (१७४४) ह्या भुरग्यांच्या पुस्तकांत ‘बेरबॉल’ नांवाच्या एका खेळाचें वर्णन मेळटा. अलेक्झांडर कार्ट रायट हाणें १८४५ च्या सुमाराक ह्या खेळाच्या मैदानाच्या घराचें अंतर २८.४३ मी. अशें निश्र्चीत थरयलें आनी हेन्री चॅडविक हाणें पयलें नेमावळीचें पुस्तक (१८५८) तयार केलें. शिंयाळ्यांतूय हो खेळ खेळूंक मेळचो देखून जॉर्ज हॅनकॉक हाणें १८८७ त शिकागोंत इण्डोर बेसबॉलाचो प्रकार सोदून काडलो. तातूंतल्यानूच फुडें सॉफ्टबॉल हो प्रकार मुखार आयलो.
बेसबॉलाच्या मैदानाचे सादारणपणान तीन भाग जातात. खेळ चड करून जंय चलता तें आंतरमैदान (इनफिल्ड वा डायमंड) मैदानाचे शिमेरेशेमेरेन पातळिल्लें बाम्हमैदान (आऊटफिल्ड हें अंतर उण्यांत उणे ७६.२ मी. आसचें असो संकेत आसा) आनी प्रमाद क्षेत्र (फाउल टॅरिटरी).
