11
kènè' ghoes-bhăghoes, rabina ra-mara sè ètjèpta, panèrat sè djhoel-ngadjhoel otabǎ gèwel, ampèrra pangghoeng sè akèr-okèr, serboeng paokosan, ènterran radjă sadjhăghăddhă, djărèja kabbhi ngadjoen djoennaghi.
Enga'-tengnga'anna bengko sè bănnja' băn atjem-matjem bhoeroe, băḍă sakompolan sè djǎ'-radjǎ'ăn kadhibi' sarta èkolèlèngè paghăr alas. Mètorot panjangkana Gulliver djărèja kaḍhătonna Rato Lillipoet.
BHĂB II.
Tjatjatoranna Gulliver băn Rato Lillipoet, băn apa sè ètemmo saterrossa.
Parappa'na Gulliver mandjheng băs-abăsan, Sang Rato nètè'è djhårån bhǎghoes, pakèanna sarbă ngadhirăp, parlo nètè -parèksa kabăḍă'ănna Gulliver. Bhǎreng Gulliver akalèja', djhărăn katètèanna Sang Rato takerdjhăt, ladjhoe abhoedhi sambi mandjheng, kangsè ngabǎtèrè ḍà' salèrana Sang Rato, amè' dhoengkap laboe pas ètjèttjè'è djhărăn. Gulliver nangalè, djhă' Sang Rato tjè' salpa'na sarta tjè' tjekka'na sè nètè'è djhărăn. Sanaddjhăn èghibă mandjheng, larat otabǎ alettjéng, ghi' tjekka' è pa-kapana bhăi. Băḍă opsir sabătara sè paḍă ngèrèng, njandher, nolongè Sang Rato sè torona ḍări katètèanna.
Sang Rato ladjhoe aparènta ḍă' abdhi paḍhă'ărăn băn ḍă' ka pangradjăna goedăng mènoman, edhikaaghi asaḍijă kakan băn ènomma Gulliver. Mètorot katerranganna abdhi kobhădjăn, raksasa Gulliver djǎrèja kakanna ta' djhăma' bănnja'na. Dhăghing ḍoewǎ polo djikar bǎn anggoer sapolo ettong èpaabi' sakalèng aḍă', andhǎddhiaghi ghettonna Sang Rato.
Sang Rato djhoemenneng sè ngolatè pangakan ban pangènomma Gulliver. Dhin adjoe Rato, para Pangèran bǎn para pottrè sè nom-anom ta' băngal sè asemmaʼa, molana alongghoe è korsè abǎk nambhăn ḍări Gulliver. Saellana Gulliver maabi' kakan bǎn ènoman ghellǎ', bi' Sang Rato ladjhoe èpakon matèḍoeng è bhă-rebbhă, sopadjă Sang Rato ghămpanga sarta palasdhă'ă sè nètè parèksa abăʼna. Sè makon matèḍoeng djărèja Sang Rato ta' kangandhika, tjoma kalabǎn tandhǎ bhăi, băn serrèna ella èghǎli ta' njangghǎ mèsanè polè.
Gulliver atoro' saparèntana Sang Rato, ladjhoe marobbhoe ongghoe; kalabăn mara djărèja, abă'na ngennèng kèja malasdhǎ'aghi robăna Sang Rato. Djhǎoena Sang Rato sè djhoemenneng ḍări Gulliver ra-kèra samèter. Salèrana Sang Rato djărèja ra-kèra lebbi radjă sanjarè ḍări rèng-orèng laènna sè paḍă ngèrèng, olatanna berrit alalanangè, sotjana mantjorong, pannengnga njastrèanè. Saghoelina nandhǎ'aghi kaaghoenganna, joeswăna satengnga toboe. Potonganna ghem-aghemmanna maddjhă, nangèng sè èkaghăbăj bhǎrăng sè tjè' larangnga arghăna kabbhi.
