BǍGIǍN III.
Gulliver alolongan ḍă' naghără lo-polo ngabăng.
BHǍB I
Gulliver aladjar pole sarta èkennèng pègha' bhădjhŭk.
Ra-kèra ollè pa'bhellas arè abiddhǎ Gulliver sè enneng è bengkona, pas katamojan mo-sarmoanna anjama kaptèn William Robinson, kapal sè ètegghoe' kowat băn bhăghoes, radjăna saratos etton.
Bilăn Gulliver ella tao dhăddhi dokter neng-è kapalla kaptèn Robinson djărèja, aladjăr ḍă' tana Tèmor (Asijă). Saabiddhă Gulliver noro' abǎ'na, ta' èangghep bhăbă parèntana, nangèng sarat èako tarètan băn soebăt. Molaè dări băkto djǎrèja orèng kaḍoewǎ bhoeroe, sè aparsobădhăn tjè' rapetta.
Kapten Robinson ella ngèding berta kèja, djhă' Gulliver ella molè dări sè aladjărăn, molana ladjhoe èsapot. Dhinèng parlona ta' tjoma terro tatemmoa băn ngormatana sobăddhă sè ella èangghep matè djărèja, otabă ngèḍingngaghiă kanḍhăna băb katjalaka’ anna bhăi, nangeng bădă pole maksotta sè sirri , ijă arèja Gulliver terro èadjhăghǎ aladjăr polè , èpadhǎddhiă dokter kapal mara bilăn.
Molana semmo segghoet kaptèn djărèja sè èntar ka bengkona Gulliver, sarta nganḍhă'aghi djhă' abă'na asaddjhă èntara aladjăr doewǎ boelǎn abiddhă dă' tana Indijă Tèmor băn kapalla sè anjama De Hoop. Di boeḍina kaptèn ladjhoe talattjar ngotja', ngadjhǎk Gulliver sopadjă noro'a, dhăddhiă dokter kapal polè, dhinèng ghǎdjhina lèpet doewă' dări sè bhăn sabbhånna Neng è kapal djăḍijă Gulliver èangkata dhăddhi opsir sè ghitèngghian è bhăbăna kapten, sarta polè ngabhăbă sèttong dokter kapal băn asistèn kadoewǎ.
Pangadjhǎgghǎ kaptèn bhoeroe la pardjoeghǎ djhă' ètèmbhănga ghoe-ongghoe bi' Gulliver; apa polè Gulliver ella padjhăt sarmo abit dǎ ' kaptèn Robinson sarta ella tao, djhă' abă'na orèng kapal sẽ pènter băn èkennèng tegghoe’ temmen, djhărăghăn kaptèn ghella' băn Gulliver ta' otja'na. Molana pangadjhǎgghǎ ètampèk, bǎn polè pangaterrona aba'na sè ngèterrana djhăghǎt sadjǎnè bhǎrenteng. Sanaddjhăn ella pan-bărămpan kalè sè nemmo kalèr radjă, ijă ghi' ta' djherră. Tjoma sè dhăddhi pakèboena, abă'na sè amèta ka sè binè'.
Sè bine sanjatana tjè' berră'na se èdhina'aghia lakèna polè, nangèng sarrèna djhăndjhina kaptèn Robinson da' lakèna masènjaman tor masè andhăddhiaghi kaontonganna, molana saellana marè èkèr-pèkkèr abit, sè lakè' ijă èbăghi kèja.
