--Sa akong mga pinggan, tasa ug ubán pang mga galamiton nga mangabuák, kinsa man diáy mobayad? Ang akong mga binatonán mangalipay na lamang nga ang mga galamitón nga ilang mabuák pabayran ko kanila sa ingón nianá, ug akó usáb nahimuót kaayo ning paagiha. Dili ko man ugód silá pamunalan; kutihon ko lamang usahay ang ilang ulo, kun panlusion ba ang ilang dalunggan...
--Sundon ko diay kana!-¡Ako usab!!Ug ako!-matud sa mga biyata.
--Apán kon ang pinggan mabuák lamang sa tuló kun upát ka tipík, diyutay day imong madawat? - mipakapin pa gayud ang gahiag ulo nga si Rufa.
--Abál―mitubág si Sipa-papangadyeon ko gihapon ug unyâ ipakola ko ang mga tipík ug sa ingón nianá walâ kitáy mausik.
Si Hermana Rufa walâ na makatingog.
--Aduna untâ akóy ipangutana kaninyo nga akong giduha- duhaan-misulti nga daw nagpanukó ang batan-on nga si Juana. -Kamó, mga kauban ko, nakasabút kaayo kon unsay Langit, unsay Purgatoryo ug unsay Ispidno...; akó intawon, itug-an ko kaninyo, walâ gayuy alamag nianá bisag diyutay.
--Sulti sa buut mo ipangutana!
--Masabúg nakong mabasa sa mga nobina ug sa ubáng mga basahón kining tugon nga mosunod: "tuló ka amahán namó", "tuló ka maghimayà ka María" ug "tuló ka gloria patri"...
--¿Nan?
--Buút unta ako magpakisayud kon unsaon pagpangadye niana: sunodsunurón ba lamang ang tuló ka “amahán namó”, 'tuló ka maghimayà ka María" ug "tuló ka gloria patri"..., kun makatuló ba pangadyea ang "amahán namò", ang "maghimaya ka María" ug ang "gloria patri".
--Ingnon niana: sunudsunuron ang tuló ka "amahán namo"...
--Tabi Hermana Sipa-misagbat si Hermana Rufa-. Sa akong hunáhuná ingnon niini pagpaagi: ang mga laki dilì itipon sa mga bayé; ang “amahán namò" maoy lakí, ang "maghimayà ka María" maóy bayé ug ang "gloria patri" maoy itóy.
