Apán ang mga sultisulti milabí na gayúd dihâ nga sa hapon sa ikatuló na ka adlaw hikit-an nga mikawas siyá sa usa ka salak-yanán tungod sa balay sa iyang pangasaw-onon ug miyukbò sa maayong buót sa parì nga nagapadulong usáb niadtong balaya.
Kang Sisa ug sa iyang mga anák walâ nay nahinumdom. Kon karón mosaká kitá sa baláy ni María Clara, usá ka maanindot salag nga gitaliwala sa mga buongón ug ilang-ilang, hiabután pa natò ang duhá ka batan-on nga nanambò sa tamboanan dapit sa lanaw. Kadtong tamboanan gilandungan sa mga bulak ug mga bagon nga nangapot sa palà-palà nga kawayan ug mga kawat; didto mahanggap ta ang kahumót niadtong mga bulak, kahumót nga nagauban-uban ug gianod-anod sa huyuboy sa hangin.
Sa ilang babà mabati ta mga pulong labí pang makalipayng pamation kay sa hinaganas sa mga dahon sa kahoy ug labí pang mahumót kay sa baho sa mga bulak nga nahisagol sa hangin ug nagalupadlupad sa tanaman ni María Clara. Mao kadtoy takna nga ang mga ingkantohanon nga nanagpuyô sa tubig sa lanaw managpahimulos sa landong sa kahapunon ug mangguhò ang ilang mga ulo taliwalà sa mga balúd arón pagsudong ug pagyukbo sa Adlaw nga hapit na mosalop. Ginaingón nga ang ilang mga matá ug buhók may bulok nga tagumón, nga ang ilang ulo pinurongpurongan nianang mga tanóm nga magkabuhi sa tubig ug may mga bulak nga nanagdalá sa mga bulok nga mapulá ug maputî; ginaingón usab nga usahay ipakità ang ilang lawas ug moguhò taliwalà sa mga bulà sa tubig, lawas nga labing maputî kay sa maóng mga bulà ug nga inigtikyop na gayúd sa kagabhion managsugod na sa ilang mga dulàdulà, ug sa taliwalà niadtong kamingawan sa lanaw mabati ang mga honi nga kahibulongan sama sa honi nga ipanaghoy sa hangin nga mohurós; ginaingón usáb nga... apán balikon ta ang mga batanon nga nanag-akmoy sa tamboanan ug pamation ta ang katapusang mga pulong sa ilang panagsulti.
Si Ibarra miingon kang María Clara.
-Ugmà, unà mohayag sa sidlakán ang banagbanag sa Adlaw, matuman sa gayúd ang imong tinguha. Karóng gabii hikayon ko ang tanan arón walay makulang.
