—Apán, ¿diín man ugód ikáw gikan, parì Salví? —nangutana ang Alferez sa pagtan-aw nga ang nawong sa parí napulòs garás ug ang iyang sotana napunò sa mga dahon ug gagmayng mga sangá nga layâ sa kahoy. —¿Nahulog ba intawon ang parì?
—Walâ, walâ; ¡nahisalaag ako! —mitubág si parì Salví nga midukô arón pagtan-aw sa iyang sotana.
Adunay mga botilya sa limonada nga gipangablihan, mga butóng binuák arón ang gikan sa kaligoanan makainúm sa iyang tubig mabugnaw ug mokaon sa iyang unód nga mahumok, labí pang maputî kay sa gatas; ang mga dalaga gitagan-an usáb ug mga bulak nga tinuhog sa sampagita, sinagolan sa mga rosas ug ilang-ilang nga nakahatag kahumot sa ilang mga buhok dinunghay. Nanglingkod kun nagpauraray sa mga duyan nga gipamitay sa mga sangá sa kahoy, kun magakalingáw ba ug dulà tupád sa usá ka halapád nga bató diín adunay mga baraha nga makitá, mga tablero, mga basahong gagmay, mga sigây ug mga bató nga gamáy.
Gipatuod nila sa kura ang buaya nga nakuhà, apán dagway ang parí walâ lamang makaalinggát ug dihâ na motagád sa giingón na nga kadtong dakúng samád sa tiyán sa mananáp mao ang agi sa kutsilyo ni Ibarra, kinsa miambak sa tubig sa pagtan-aw nga ang piloto nagalisud na. Sa laing bahin, ang bantugan ug walâ hiilhi nga piloto nawalâ lamang unà moabut ang Alferez.
Sa katapusan si María Clara nahiabut gikan sa kaligoanan kuyog sa iyang mga higala, mahapsay ang nawong sama sa rosas nga sa kabuntagon magapuyos sa tun-og nga magagiláwgiláw kon dan-agan na sa Adlaw ingón sa brilyante nga magpangidlap. Ang unang pahiyum sa iyang mga ngabil alang kang Crisostomo, ug ang unang dag-um sa iyang agtang alang kang parì Salví. Kini nakamatngon apán walâ manghupáw.
Miabút ang taknà sa pangaon. Ang kura, ang iyang kuwadhutor, ang Alferez, ang gobernadorcillo ug pipilá pa gayúd ka kapitán ubán sa teniente mayor, nanglingkod sa usà ka talad nga gipangulohan ni Ibarra. Ang mga inahán walâ motugot nga may lalaking mosalmot sa kan-anan sa mga babaye.
