—Karón, Albino, dilì ka na magtumòtumò pagbuhat ug mga
lungag sama sa nahitabô ganina didto sa bangkâ —matud pa ni
Leon.
—¿Unsa? ¿Unsa kanâ? —nangutana ang mga tigulang.
—Ang mga bangkà waláy buslot, ingón nga waláy buslot kining pinggan nga akong gibitbit —mitubág si Leon.
—¡Hesus, saramulyo! —matud ni iya Isabel nga nagpahiyúm.
—¿Duna na ba ikáw ing balità, ginoo Alferez, bahin sa kriminal nga midagmal kang pari Dámaso? —nangutana si parì Salví sa Alferez dihâ nga nangaon na silá.
—¿Sa unsang kriminala, padre kura? —mitubág ang Alferez sa prayle nga iyang gipasilang sa baso nga bag-o niyang giimnan.
—¿Unsa man diay? ¿Kadtong kriminal nga niadtong usáng hapon mibunal kang parì Dámaso didto sa dalan!
—¿Mibunal kang parì Dámasô —nagdungang pagpangutana ang pipilá niadtong nanagsalo pagpangaon.
Ang kuwadhutor ni parì Salví daw nagpahiyúm.
—¡Oo, ug si parì Dámaso nagahigda intawon karon sa baníg! Gituhoan ko nga mao gihapon kanang kriminala ang misalibáy kanimo sa kalapukan, ginoo Alferez. Tungúd sa kaulaw kun sa bino, ang nawong sa Alferez milipaghong pag-ayo.
—Gipakaingón ko kadto —mipadayon si parì Salví nga daw nagbugalbugal —nga nasayud ikaw nianà, kay, sa akó ugód nga hunàhunà, ikáw kay Alferez man sa Guardia Civil...
—Gipahít sa Alfrez ang iyang ngabil ug namalibad. Dinhi, nahitunghà ang usá ka babaye nga maluspad, maniwang ug nagkagidlay; waláy nakakitâ kaniya nga miabút kay nagpakahilum man lamang ug nagahinay uyamut paglakáw nga kong gabii pa, pakaingnon ta dagway untà nga pantasma.
—¡Pakan-a ninyo kanang alaut nga babaye! —matud sa mga tigulang; —¡umariká dirí!
Apan ang babaye mipadayon paglakáw ug miduol sa talad diín magalingkod ang kura; kiní milingì ug sa pagpakailá niya sa babaye, hiluwatan niya ang kutsilyo nga iyang gibitbit.
—¡Pakan-a ninyo kining babaye! —misugò si Ibarra.
—¡Mangitngit ang gabii ug mangawalâ ang mga batà! — nagkanayón ang babaye nga nagkagidlay.
