da, kon dilì hangtud usáb sa mga buróng mga Indio ug sa malalangong mga Insik."
Bisan pa niini, ang masaligong tinugyanan sa mantalaan diriyót mapilit pagpapas sa tanang iyang gisulát. Si parì Dámaso mimulò nga gisip-on ug giubó ug diyutay, sakít nga mitakboy kaniya sukád sa miaging gabii, kay sa pagkahumán niyag awit sa usá ka masadyang awit nga ginganlan petenera, miinóm man tuló ka basong sorbete ug unyà mitambong makadiyót sa dulà. Tungúd niini, buút na untâ siyá mobalibad pagwali, ugaling kay walâ man makakitâ ug laing parì nga nakasag-ulo sa kinabuhì ug mga katingalahan ni San Diego—matuod nga ang kura nasayud niini, apán siyá man maóy magamisa;—ang ubáng mga parì, sa waláy usáng misupak, nagkauyon pag-ingon nga ang tingog ni parì Dámaso walâ gayúd maunsa ug nga anugon kaayo nga dilì niya ipabatì ang matahúm niyang wali nga gisulát ug nasag-ulo na. Busà gihikay siyá sa iyang karaang ama de llaves ug mga limonada, gihidhiran ug tambal ang iyang liog ug dughan, giputós siyá ug panaptong mainit, gihilot, ubp. Si parì Dámaso misuyop pilá ka buók nga itlog hiláw ug kinutawag bino, ug sa tibuok buntag walâ mosulti ug walâ usáb mopainit; igò lamang miinúm usá ka basong gatas ug walâ motiláw sa iyang kinaham nga manók minantikaan ug sa kiso sa Laguna nga iyang naandan buntag tanán, kay pulong pa sa iyang ama, ang manók ug ang kiso may asín ug may tambok busà makapukaw sa ubó.
—¡Kanang tanán giantus intawon sa parì arón lamang natò madangat ang langit ug mahibalik kitá sa matuod nga dalan! — matud sa mga Hermanas de la V. O. T. nga nanghinuklog uyamut sa pagkasayud niining mga tinuyong pag-antus ni parì Dámaso.
—¡Gisilotan siya sa Virgen de la Paz! —nagkanayón ang mga Hermanas del Smo. Rosario, nga nanaglagot kaniya tungúd sa iyang pagkahilig ug pagdapig sa ilang mga kaaway.
Sa ikawaló ug tungâ ang taknà mao ang paggulâ sa pasunding nga miagi ilalum sa atop-atop panapton nga giladlad. Kadtong pasunding sama usáb sa kagahapon, bisan aduna na karón ing lain nga talan-awon: mao ang mga sakop sa V. 0. T. Mga tigulang, babaye ug lalaki, ug pipilá ka mga dalagang
