siya, ug dili kami buút niini kay kami mga tawo man nga dili
mahagugmag samok.
Gipadayon ang pasunding human sa "loa". Si San Juan mipadayon intawon paglakaw sa dalan sa kapaitan.
Sa paghitungod sa Birhen sa balay ni Kapitan Tiyago, usa ka tingog langitnon miawit sa mga pulong ni Arcangel San Gabriel. Maóy usá ka tingog malumó, mananoy, daw nagpakiluoy ug nagaawit nga kahilakón sa "Ave María" ni Gounod, dinuyogan sa piyano nga daw nagaampo usab sama kaniya. Mihilum ang banda sa musika nga mikuyog sa pasunding, nahunong ang mga pangadye ug si pari Salvi nahiurong. Ang tingog makapahinuklog ug makapatulo sa luha: labut pa sa pagyukbo sa Birhen, kadtong tingoga nagpadala usab ug pag-ampo inubanan sa mga mahay.
Si Ibarra namati sa awit sukád sa tamboanan nga iyang giakmoyan ug ang kakulba ug kamingaw milagbas sa iyang kasingkasing. Sa moang awit nasabut niya ang kasak't nga giantus niadtong dalaga ug nahadlok siya nga misukot sa iyang kaugalingon sa hinungdan niadtong kaguól nga gibati sa nagaawit.
Himukdahan siya sa Gobernador Heneral nga naghinuktok ug nagasubo.
-Ubanán mo ako unya sa kan-anan; didto managsulti kita mahatungód nianang mga bata nga nangawala-matud sa Gobernador Heneral.
-Ako ba kaha ang ginikanan? -nagkanayon ang batanon nga mitan-aw apan wala makakita sa Gobernador Heneral ug minunot niini nga daw nagadamgo lamang.
