Page:Noli-Me-Tangere-Cebuano-Visayano-ni-Jose-Rizal-1962-N719c.pdf/35

mga lihok nga hagip-ot kaayo. Usahay magkanayón siyá ka- nakò kon magkahisgot kamí sa ilang mga bingkil: Ginoo Gue- vara, motuo ka nga si Bathala mopasaylo sa usá ka makasasalà, usá ka mamumunò, pananglitan, tungúd lamang sa pagtug-an niya sa iyang salâ sa usa ka pari, nga tawo usáb sama kanatò, nga may katungdanan sa paglilong sa salâ nga isugid kaniya, ug tungúd lamang sa pagkahadlok nga mapaig siyá sa kahiladman sa sulad, nga maó ang ginatawág ug acto de atrición? Pasayluon kahâ ang mamumunò tungúd sa iyang pagkatalawán, waláy ulawng pagpanagana nga dilì hibaslan sa iyang kaaway? Akó adu- nay laing hunàhunà mahitungúd kang Bathalà -giingnon akó niya. Alang kanakò, ang kadaut dili katambalag laing kadaut ug ang salâ dili pasayluon tungúd lamang sa mga hilakhilak ug mga limús nga ihatag sa simbahán. Akó, pananglit, -matud niya —kon makapatay ug usa ka amahán, tawo nga gisaligan sa kinabuhi sa iyang banay, ug tungúd sa pagpatay ko niadtong tawhana, ang iyang banay nahimong alaut kay nabalo ang iyang asawa ug nailo ang iyang mga anák, ¿makabayád ba kahâ akó sa akong salâ sa atubangan ni Bathalà kon akó pabitay, kon isugilon ko ang akong salâ nga nabuhat sa usá ka tawo nga may katungdanan sa paglilong sa salâ nga akong gisugilon kaniya. kon mohatag ako sa mga parì ug limús nga walâ nila kinahang- lana, mopalít ug mga bula² ug magahilak-hilak sa adlaw ug ga- bii? Ang balo ug ang mga ilo intawon? Ang akong tanlag nagaingón kanakò nga kutob sa akong mahimò paninguhaon ko gayúd pagsalili sa amahán nga akong gipatáy, pagpanlimba- sug sa tibuók kong kinabuhí aron pagpangità sa kaayohan niad- tong banay nga akong gihimong alaut; apán bisan pa ngani niini, kinsay makailis sa gugma sa usá ka bana ug pagpanggà sa usá ka amahán? Maó kanâ ang hunàhunà sa imong amahán bahin ning butanga, hunàhunà nga maó kanunay iyang gipasum- ban sa iyang mga buhat, ug tungúd nianà walâ gayúd siyá ma- namastamas kang bisan kinsa, hinunoa naninguhà siyá pagbayad sa mga salâ nga, matud niya, nahimò sa iyang mga apohán, pi- naagi sa mga maayong buhat. Apán balikbalikan ta na man ang iyang mga bingkil kang parì Dámaso: sa nagkadugay na kadto daw nagkangil-ad, na kay sa mga wali sa pari kanunay gayúd siyang pasumbingayan, salamat ngani kay walâ gayúd iluwás

28