ong sa kabulahanan sa Paraíso nga gisaysay kaniya sa iyang
inahan!
Hapit na matapus ang dula sa pagsulod ni Ibarra. Tungud sa iyang paghitungha, ang mga tawo nangaukáy: ang tanan mitan-aw kaniya ug sa kura.
Apan ang batan-on daw wala lamang makaalinggat niadtong tanan, kay sa dakung kalinaw sa buót mihatag man siya ug katahuran kang María Clara ug sa mga higala niini, ug milingkod tupad sa dalaga. Si Sinang mao day misulti.
—Mitan-aw ba ikaw sa bolkán? —nangutana.
—Wala, higala; napilit ako pagkuyog sa Kapitan Heneral.
—Kaanugon! Ang kura miuban kanamo ug iya kamíng gisuginlan mga kaagi sa mga kondenado. Malipay ka ba niana?
Iya intawon kaming gihadlok aron dili makalingawlingaw. Tanawa ra?
Ang kura mitindog ug miduol kang Don Filipo ug daw nakigsulti niini. Ang pari nagasulti nga daw madasigon uyamut, ug si Don Filipo mitubag kaniya sa dakung kalinaw sa buot ug sa tingog mahinày.
—Nasakit ako nga dili makaalagad sa imong tuyo —matud sa "Teniente mayor"; si ginoo Ibarra maoy usa sa mihatag dakung amót ug may katungód siya sa pag-anhi dinhi samtang dili magatugaw sa kalinaw sa kadaghanan.
—Apan dili ba maoy pagtugáw sa kalinaw ang paghatág higayon sa pagpakasala sa mga maayong kristiyanos? Mao kanay pagtugot nga ang usa ka lobo mosulod sa panon sa mga karnero! Ikaw maóy mangako niana sa atubangan ni Bathalà ug sa atubangan sa mga punoan!
—Oo, padre, ako mangako gayud kanunay niadtong mga buhat nga gikan sa akong kaugalingong kabubut-on! —mitubag si Don Filipo nga miyuko ug diyutay; -apan ang akong diyutay nga kagahum walá magatugot kanakò sa pagsalmot niadtong mga butang bahin sa tinuhoan. Kinsa kadtóng dili buút makigduol kang ginoo Ibarra molikáy lamang sa pakigsulti kaniya: siya usab dili man mamugós kang bisan kinsa.
—Apan kini maoy usa ka paghatag higayon alang sa kata-lagman, ug kinsa ngani kadtóng mahigugma sa katalagman adto da usáb mamatay!
