Ang hunahunà sa pari nagapadayon pagdamgo lain pang mga butang . . . , apan kinsay takus makagtukib sa tanan nga mahunahuna sa usa ka kalag nga nagadilaab sa kalayong mainit?
Kaba ang makatukib niini mao da ang tinugyanan sa mantalaan nga, sa pagtibawas niya pag-asoy sa pangilin ug sa nanghitabo niadtong adlawa, miingon:
“Salamat sa makalibo, salamat sa makadaghan uyamut sa pag salmot sa talahuron nga P. Fr. Bernardo Salvi kinsa, sa wala lamay pagkabana sa kadaut nga iyang gidulong, taliwala niadtong mga tawo nga walay punoang gitahud ug nagadilaab sa labihang kaligutgot, wala siyay kalb walay ulisi, gipuypoy niya ang kainit sa ilang mga hunahuna, walay laing gigawi kon dili ang iya dang mga pulong makalukmay sa kasingkasing, ang iyang kaambong ug ang kagahum nga dili gayud makulang sa tinugyanan sa usa ka Tinuhoan nga nagatudlo sa Kahusay. Ang buotan nga pari, sa walay pagtagad sa iyang kaugalingong kaayohan, mibiya sa iyang higdaanan diin siya nahinanok na unta, nianang paghinanok nga kaugalingon sa tawo nga walay buling sa kasingkasing, aron lamang paglikay nga walay mahitabo sa iyang mga sakop bisan diyutay nga kadaut. Walay du haduha, ang mga molupyo sa San Diego dili gayud manghikalimot niining buhat nga katingalahan uyamut sa ilang hamili nga kura ug dagway managtamud sila niini hangtud sa wala nay katapusan!”
