lik.
Didto niadtong tapuka usá da ka tawo ang daw walâ
takdi sa gibati sa tanán niadtong gabhiona: maó ang usá ka
batan-ong parì nga franciscano, maniwang, namiyahok ang nawóng ug lusparón and panit, nagpamináw lamang sukád sa
layo, wala maglihók ug nagsamot tan-aw sa dalaga ug halus ngani dili moginhawa.
Apán si Ibarra walâ makakitâ niadtong tanán: lain ang nakità sa iyang mga matá. Daw nagadamgo siyá, ug taliwalà sa iyang damgo nakita niya ang usa ka lawák nga diyutay ug mahugaw, ug didto niadtong lawák may usá ka lantay diín may tigulang nagahigdà ug naghingutás; kadtong alaut nga tigulang nga nag-usara lamang, nagalisúd pagginhawa, nagautas ug lingi, ug taliwalà sa iyang mga bakhò adunay ngalan nga kanunay giyamyam sa iyang mga ngabil; usahay mabati ang halawóm nga agulò inubanán sa kinagilkil sa mga talikalà. didto sa halayô kaayo nakità ni Ibarra ang usa ka masadyà nga pangilin, diín may usá ka batan-on nga hubóg sa kalipay nagsamot siyagit ug katawa, ug unya ang mga bulak iyang bisi- bisan sa alak taliwalà sa mga suliyaw ug talidhay sa ubáng mga hubóg nga nanag-alirong kaniya. Ang nawóng niadtong tigulang nagahigdà sa lantay maagid-agid sa nawóng sa iyang amahán, ug ang pamayhon niadtong batan-on nga hubóg sama usáb sa iyang pamayhon, ug ang ngalan nga ginayamyam niadtong alaut nga tigulang maó ang iya kang Ibarra!
Maó kanáng tanán ang nakità sa alaut nga batan-on.
Gipamalong na ang mga sugâ sa baláy nga atbang, nahilum na ang kagahub ug ang honi sa mga tulonggon, apán nabati gihapon ni Ibarra ang masulub-ong singgit sa iyang alaut nga. amahán nga nangità ug nagapanawag kaniya dihâ nga naghingutás na.
Ang tibuok Manilà nahilum na ug ang tanan nahikatulog na niadtong taknaa; maó day mabati ta usahay ang tuktugaok sa mga manók nga mahisagol sa bagting sa mga orasán sa mga kampanaryo ug sa mamingawong singgit sa mga bantay sa dalan; ang Bulan migim-aw na sa Sidlakán; ang tanán natulog na, ug si Ibarra nahikatulog usáb, kahâ gikapuyan sa iyang mga masulub-ong hunàhunà ug sa iyang paglakaw-lakaw niadtong adlawa.
