- Mi gozo en un pozo.
Sa atbang sa ganghaan sa tribunal adunay mga sibil nga nanagsuroysuroy, nagbungiut ang nawong ug nanghulga sa kulata sa ilang pusil sa mga batang baslokon nga nanagkinto kun nagsung-ayay aron paglili sa ribas.
Ang panagway sa hawanan dili sa mangaya sama sa paglantugi didto sa tulumanon sa pangilin; karon masulub-on ug makahahadlok siya nga pagatan-awon. Ang mga sibil ug mga kuwadrilyero nga nanagtigum didto lugos lamang managsulti ug ngani pa hinayon gayud ang ilang tingog ug dili daghanon ang mga pulong. Sa ibabaw sa talad nanagsulat ang directorcillo, duha ka manunulat ug pipila ka sundalo; ang Alferez nagsuroysuroy ug usahay motan-aw sa ganghaan sa tinan-awan nga maisug; ang iyang panagway dili hilabwan sa kamapahitas-on sa kang Temistodes sa pagtambong niini sa Juegos Olimpicos human ang gubat sa Salamina. Si Donya Consolacion nagsamot panghuy-ab sa usa ka suók, ug inigbanganga sa iyang baba makita ang iyang tilaok nga maitum ug ang mga ngipon nga nanagtuwas; ang iyang tinan-awan nga makahahadlok gitutok sa ganghaan sa bilanggoan nga nabulit nga sa mga tawo-tawo nga mahilas. Ang iyang bana, nga nagpaminanggaon kaniya tungud sa pagdaug nga iyang nakab-ut sa miaging gabii, mitugot nga motambong siya sa pagsukot sa mga dinakpan ug kaha tugutan siya pagtambong sa pagsakit kanila.
Ang mabangis nga hiena nakabaho sa minatay, nagpanilap ug naglagut nga nalangan ang takna sa pagsakit.
Ang gobernadorcillo nasubó uyamut tungud sa nahitabo: ang iyang dakung siya, kadtong dakung siya nga nahimutang ubus sa hulagway sa Hari, wala lingkori ug daw gitagana alang sa laing tawo.
