lay Bathala alang kanato, walay kalauman, walay gugma sa isigkatawo; mao day naghari sa kalibutan ang katungod sakusog!
Nagpangurog ang tibuok kalawasan ni Ibarra. Nahilabay sila tungod sa palasyo sa Kapitan Heneral ug himatngonan nila nga nagubut ang mga sundalo.
—Hisusihan na ba kaha ang imong pagkalagiw?— matud ni Elias.— Higda hinuon, ginoo, aron tabunan ko ikaw mining kumpay kay moagi kita duol sa Polvorita ug wala kita masayud kon makapahibulong ba sa nagabantay nga duha kitang nangluwan mining sakayan.
Ang bangka nga ilang giluwanan maoy usa ka sakayan nga yagpis ug magaan, ug mosagitsit pagdalagan daw lugos lamang mosapigad sa tubig.
Sumala sa gibanabana ni Elias, gipahunong siya sa bantay ug gipangutana diin gikan.
—Gikan sa Manila, naghatud ug kumpay sa mga oidor ug mga kura— mitubag siya nga misunod sa sinultihan sa tagaPandakan.
Usa ka sarhento migula ug nagsusi sa nahitabo.
—Sulong!— giingon siya sa sarhento;— pasidan-an ko ikaw nga dili ka magpasakayg lain sa imong bangka; may usa ka binilanggo nga mikalagiw dili pa dugay. Kon imong hisakpan ug ihatud nganhi kanako, hatagan ko ikawg maayong gala.
Maayo, ginoo; unsa may iyang mga tilimad-on?
—Nagsul-ob amerikanang taas ug maitum ug maantigong mokinatsila; na, pagbantay baya!
Ang bangka mipadayon. Si Elias milingi ug iyang nakita ang nawong ug ang bayhon sa bantay nga nagabarug sa tampi sa suba.
—Malangan kitag pila ka gutlo— matud niya sa tingog mahinay;-— kinahanglan mosulod kita sa suba sa Beata aron ingnon nga ako taga Peka Francia. Makita nimo ang suba nga giawitan ni Francisco Baltazar.
Dinan-agan sa kahayag sa Bulan, ang lungsod nahinanok taliwala sa kagabhion. Si Crisostomo mitindog aron pagsud-ong sa kalinaw sa Kinaiyahan. Ang suba masigpit ug ang iyang kadaplinan nga napatag gipanamnan ug mga kumpay.
