Sa naghinapús ang bulan sa Oktubre, si Don Santiago de los Santos, nga nailá uyamut sa anggà, nga Kapitán Tiyagò, mihatag usá ka panihapon nga, bisan niadto lamang hapona niya ipahibaló, supak sa iyang nabatasan, maó nay ginahisgotan sa Binondo ug sa ubáng mga balangay hangtud sa Intramuros. Niadtongn panahona si Kapitán Tiagò ginailá nga tawong dilì maantigong modaginot kon magkombirá, ug hibaloán sa tanán nga ang ganghaán sa iyang baláy, sama sa iyang lungsod, binuksan kanunay alang kang bisan kinsa, gawás sa patigayon ug sa mga hunahunang binag-o.
Sama sa kilat, ang balitâ mikaylap pag-usá sa kalibutan sa mga libud-suróy ug mga lagóng gibuhî ni Bathalá, ug, inaghat sa iyang waláy sukód nga kaluoy, iyang gipasanay sa Manilà. Pipilá nangitag pintal alang sa ilang mga sapin, ang ubán mga butonis ug korbata, ug ang tanán nanaglibug ang úlo kon unsaon nila pagyukbò sa tagbaláy, nianang yukbò nga makisanduroton, aron ingnon nga silá karaang mga higala ug, kon ugaling makagayón, pagpangayog pasaylo nga walâ silá mahisayó pag-abút.
Kining panihapona didto idulot sa usá ka baláy nga nahimutáng sa dalan Anloague, ug, sanglit walâ man kamí mahinumdom sa iyang isip, hubiton namò ang iyang panagway aron siyá hiilhan gihapon, kon ugaling walâ man magubâ sa mga linog. Dilì kamí motuo nga gipagubâ sa tag-iya, kay didtong mga dapita masabúg nga kanang buhata pangakuhon lamang ni Bathalà kun sa Kinaiyahan; kinsa may gikasabutan ug ang Kagamhanan paggamâ daghang mga buluhatón nga sama niini ug kahimtang . . . Maóy usaá ka baláy nga may gidak-on, samag panagway sa ubáng mga baláy didto, nahitarok sa dapít nga duol sa usá ka sangá sa
subâ sa Pasig, nga ginatawag sapà sa Binondo. Sama sa ubang mga subâ sa Manilà, kadtong sapaa gigawing kaligoanan, dalig-
