diganan sa tubig, labhanán, pangisdaán, agianan ug hangtud imnanán, kon hihunahunaán sa Insik nga mangangalos. Angay hibaloán nga niining dapita sa balangay diín daghang mangagi ug ang kagahub makabungog, sa gilay-ong hapit mousá ka kilo metro, usá day taytayang kahoy, ug kiníng taytayana sulod sa
tibuok tuig maó gihapon ang iyang kahimtang: ang kaputól gubâ ug ang kaputól dilì kaagián. Sa mga bulan nga ting-inít, ang mga kabayong mangagi niining taytayana mopahimulos pag-ambak sa tubig sa sapâ, sa dakúng kahikurát sa sumasakay nga magaduká sulod sa salakyanán kun magapalandong sa mga kauswagan sa atong panahón.
Ang baláy nga atong gihisgotan hamubô dag tindog ug may pagkahiwî. Dilì kamí makapasalig kinsay tagsalâ niini: ang panday ba nga nagatukod nga walâ kaayo makaalinggat, kun, nahiwì ba tungud sa mga linog ug bagyo. Usá ka halapád nga hagdan nga binakbakan ug may mga tukod sa pasamanos nga pinintalan ug lunhaw, gikan sa silong, nga sinalgan ug baldosang sinaw, napadulong sa itaas. Sa masigkakilid sa hagdan adunay mga tanúm ug mga masitasán nga gipahiluná ug mga tungtonganang gikan sa Tsina nga nabulit sa daghang mga dibuho sa nagkalainlaing mga bulok.
Sanglit walâ may nagabantay sa ganghaán ni mga suluguÓn nga magasusi kon kita dinapit ba, manaka lamang kitá, ¡oh magbabasa, higala kun kaaway!, kon ugaling madaní ikáw sa mga honi sa orkista, sa kahayag sa mga sugâ kun sa hinagtik ba sa mga pinggan ug kubyertos ug buút ka motan-aw unsa ang mga tapok-tapok didto sa ginatawág “Mutya sa Sidlakán”. Arón dilì na akó mahagò kaayo, buút ko untà nga dilì na lamang hubiton ang kahimtang sa baláy, ugaling kay kiní hinungdanon uyamut, kay kitá ugód sama man sa mga pawikan: ang atong bilí magaagád sa bilí sa atong kabhang. Tungúd niini ug sa ubán pang mga hiyas, ang mga molupyò sa Pilipinas sama da usáb sa mga pawikan. — Inigsaká, mahitunghà kitá dayon sa usá ka lawák nga halapád nga ginganlán didtog "kayda", ambút ngano, ug nga ning gabhiona gigawing kan-anán ug lawak alang sa orkista. Sa taliwalà, usá ka hataás nga talad nga dinayandayanan pag-ayo daw nakapatulò sa laway sa mga samokán nga dukiròk ug nakapakitbì sa atáy sa mga dalagang manggiulawon nga sulod sa duhá ka taknà makig-uban sa laing mga tawo nga adunay mga sulti ug
