sinultihang talagsa da nilang hidunggan. Lahi ning mga butang
yutan-on nga ginahikay, makita ta sa mga bungbong ang daghang
mga estampa, sama sa “El Purgatorio”, “El Infierno”, “El Juicio
final”, “La muerte del Justo”, “La del Pecador”, ug sa taliwala,
dinayandayanan sa usa ka maanindot nga marko sa panahon sa
“Renacimiento” binuhat ni Arevalo, matan-aw ang usa ka dakung
estampa diin makita ang duha ka tigulang babaye. Sa maong
estampa mabasa kining mosunod: “Nuestra Señora de la Paz y
Buenviaye, nga ginasimba sa Antipolo, nagpakahimong tigulang,
miduaw sa buotan ug dungganang Kapitana Ines sa diha nga kini
nagmasakiton.” Kadtong estampaha, bisan dili kaayo maayong
pagkapintal, hisabtan uyamut ang iyang kahulogan: ang nawong
sa masakiton maluspad na sama sa usa ka minatay nga nag-anam
nag kadunot; ang mga ilimnan ug ubang mga butang galamiton
sa mga masakiton maayo kaayong pagkapintal, kay ngaru hangtud nanihag ang ilang mga sulod. Inigsud-ong ta ning mga butang among giasoy, dagway adunay makahunahuna nga ang tagbalay nakaila uyamut sa taras sa iyang mga dinapit, ug aron pagtabon-tabon ug diyutay sa iyang tuyo, sa kisami aduna siya'y gipamitay nga mga lamparahan sa Insik, mga hawlang walay langgam, mga lobong bildo nga may mga bulok mapula, lunhaw ug bughaw, mga manan-aw nga laya, mga botete nga pinakaging ug pinaburot ubp., ug dapit sa suba adunay makitang mga arkos nga kahoy nga miawat sa urog sa mga Insik ug sa mga Katsila, ug sa unahan malantaw ang usa ka pantaw diin may mga palapa nga sinug-an ug mga makisdom ug gagmayng parol nga pinintalan sa nagkalain-laing mga bulok.
Didto sa dakung hawanan, taliwala sa dagkung mga salamin ug mga sugang binitay, makita ang mga dinapit nga nanambong sa kan-anan. Pinatong sa usa ka tungtonganan nga kahoy, nagbuntaog ang usa ka maanindot ug mahal nga piyano, nga labi pang mahal niadtong gabhiona kay kaniya wala may usa nga mihikap. Makitik usab didto ang hulagway sa usa ka tawo nga maayog barog, nagatikig sama sa ulisi nga binorlasan nga gibinit sa iyang mga tudlo nga nagbansiwag sa mga singsing. Kadtong hulagwaya daw nagkanayon:
—¡Hjm! ¡tan-awa ninyo ang akong mga saput ug pagkaligdong ko gayud!
