Por respondar a kelka questioni, ni kompletigas la Kroniko di l’ 1-esma numero per la sequanta extraktaji di nia Raporto pri la laboroj di la Komitato (france publikigita) :
« La Komitato, elektita la 23a Junio, kontenis la 12 yena personi : So Manuel C. Barrios, dekano di la Fakultato Medicinala di Lima, prezidanto di la Senato di Peruo; So J. Baudouin de Courtenay, profesoro di linguistiko en l’ Universitato di S. Petersburg; So Emile Boirac, rektoro di l’ Universitato di Dijon; So Ch. Bouchard, membro di l’ Akademio di Cienci di Paris, profesoro en la Medicinala Fakultato; So R. Eötvös, membro di la hungara Akademio di Cienci, prezidanto di la Matematikal e Fizikala Societo di Budapest; So W. Förster, prezidanto de l’ internaciona Komitato di pezili e mezurili, ex-direktanto di l’ Observeyo en Berlin; So G. Harvey, editisto di la North American Review, New-York; So Otto Jespersen, membro di la dana Akademio di Cienci, profesoro di filologio en l’ Universitato di Kjobenhavn; So S. Lambros, ex-rektoro di l’ Universitato di Athinae; So C. Le Paige, direktanto di la Ciencala Klaso di la rejal Akademio di Belgio, administranto-inspektanto di l’ Universitato di Liège; So W. Ostwald, membro di la rejala Societo di Cienci di Saxonio, ex-profesoro di l’ Universitato di Leipzig; So Hugo Schuchardt, membro di l’ imperyal Akademio di Cienci di Wien, profesoro di l’ Universitato di Graz…
« Si Couturat e Leau esis elektita quale sekretaryi di la Komitato; esis decidita (da 239 voti), ke la membri impedita povos vicigar su per riprezentanti (un po singla); plue, la Komitato ricevis la yuro adjuntar a su un o plura membri suplementa. Tale ol adjuntis a su, ante sa kunveno, So Gustav Rados, membro di la hungara Akademio di Cienci (vice So Eötvös, demisinto), e So W. T. Stead, editisto di la Review of Reviews (London); pose, en sa kunsido di 16a oktobro (matene), So G. Peano, Membro di l’ Akademio di Lincei e di l’ Akademio di Cienci di Torino, profesore en l’ Universitato di Torino; fine, en sa kunsido di 22a oktobro (vespere), ol voluntis adjuntar a su sa sekretaryi, Si Couturat e Leau. — So Bouchard riprezentigis su per So Do Paul Rodet, de Paris; So Harvey, per So abato Dimnet, profesoro di vivanta lingui en Paris; e So Stead, per So Paul Hugon, de Letchworth (Anglio). So Boirac, ne povanta asistar omna kunsidi, su riprezentigis per So Gaston Moch, de Paris, qua asistis omna kunsidi de la 17a oktobro vespere…
« Omna decidi facita dum la lasta kunsido esis votita da omna prezenta membri, nome : Si Ostwald, Baudouin de Courtenay, Jespersen, Dimnet, Hugon, Moch, Rodet, Couturat e Leau. »
