bonega. Multa jurnali raportis pri ol : Politiken, National-Tidende, Dagens-Nyheder, Köbenhavns Kommunskole, Agitatoren, Dannebrog ; ta artikli sive esas simpatioza, sive agnoskas adminime, ke problemo protektata da tala e tanta autoritati meritas serioza exameno. En Ekstrabladet (11 aprilo) aparis artiklo malfavoroza a la LI., cetere vulgara ed insultema, en qua on questionis, kad la linguisti ne refutos So Jespersen. To genitis polemiko, quan partoprenis Si Gjerulff e Birkedahl. Li citis la stranjera linguisti, qui anke favoras la LI. ; li refutis la fanfaronadi di l’Esperantisti, qui asertas havar 1 1/2 milion adheranti e 137 revui (!), e montris ke Esperanto vere vivas, progresas e florifas, nam ol parturis… Ido. — Rezume, granda suceso por nia entraprezo ; quale konkluzas Dannebrog, « Ido agitas la menti ».
Grammatisches Lesebuch, da H. Peus, 1 Heft (Dessau, preco : 15 pfennig). — Ica lernolibro, destinata a la propra instrukto (sen docanto), kontenas la reguli di la gramatiko, tre simple e klare formulizita, e single akompanata da mult exempli od exercala frazeti, kun lia germana traduko. To semblas esar tre bona e praktikala lernilo. Ni rimarkas ke l’autoro rezumis la gramatiko en 12 reguli, qui esas tam kompleta e tam suficanta, kam la famoza 16 reguli di Zamenhof. Do, kande l’Esperantisti fanfaronos, segun lia kustumo, pri la gramatiko en 16 reguli, nia amiki povos replikar per sua 12 reguli : to esos nur legitima defenso.
Pri la prezenta stando di la frigorizo-transporto en Ameriko, original artiklo en Ido, da E. F. Mac Pike, Chicago. — Ca broshuro esas aparta imprimuro di artiklo publikigita en Internaciona Pioniro. Multe dissemita, ol pruvos la klareso e komodeso di nia linguo e sa perfekta apteso (mem ante l’aparo di irga teknikala lexiko !) a la ciencala aplikado.
La Langue auxiliaire, organo propaganta di Ido (ex-Espérantiste ; 13a yaro, no 1 : januaro 10). — La kovrilo okpagina portas nun, ultre la generala indiki pri la linguo, la texti komparenda e la listo di la grupi, lernolibri e jurnali ; Specimeno komprenebla sen preparo, quan ni rekomendas a nia franca samideani. — Diversa Dokumenti : Esperantala sucesi, da L. de Guesnet. — Ido en la Komerco. — Kroniko generala : Suedo, Italio, Suiso, Anglio. On citas texti da la Maestro ipsa, qui kontenas tam multa e shokanta aj, oj, ajn, ojn, kam la specimena texti, quin on riprochis a ni « fabrikar ». — Diversaji : A l’infanti, da Lamennais ; La
