fidema o des-fidema ? Se on departas de la verbo fidar, on formacas desfidar (tre naturala : L. diffidere), de qua venas desfidema. Sed se on departas de l’adjektivo fidema (oblivyante o neglijante, ke ol esas derivita de verbo), on povas ya formacar nonfidema, qua equivalos praktike desfidema. Kad on admisos la du ? To esos kauzo di hezitado. Kad on exkluzos non‑ en tala kazi ? To esos kauzo di dubo ed embaraso. — Tala esas la precipua elementi di la questiono nun solvenda da l’Akademio.
So J. de Ljustina preferas triesma lasta a antepenultima, qua esas longa e pedantala (ne klara por omni). Il rimarkas, ke avan-prelasta konvenus nur pri la loko ; pri la tempo on devus dicar ante-prelasta. — Ni adjuntas, ke la sistemo « triesma lasta » esas generaligebla ; on povas dicar : quaresma, kinesma lasta ; kontre ke on ne povus formacar nuva vorti analoga ad antepenultima od anteprelasta[2]
Lektinte ica vorto (No 26, p. 100) So L. de Guesnet judikas ol shokanta. Fakte, ol apartenas nur a la linguo bibliala e religyala. Quale expresar decante ta delikata ideo ? Prostitucatino esas la vorto exakta, sed konvenas nur en la stilo ciencala di la sociologio. Diboch-ulino (‑istino) esas grosa, brutala, preske insultanta. Por tradukar la eleganta perifrazi od eufemismi di nia lingui (F. demi-mondaine exemple), So de Guesnet propozas amistino, qua esas efektive sat justa (« qua facas mestiero di amo »), polita e mem galanta.
Me ne memoras vidir atencata la influo di nia linguo sur la qualeso di humoro di la uzonti ol. Adoptinte malprizanta sufixo (‑ach), ka ni ne bone adoptus anke sufixo prizanta ?
Respondo. — Ni ja rimarkis (Histoire de la Langue universelle, p. 362, noto 2), ke sufixo di estimo semblas min utila kam sufixo di malestimo, « probable pro ke la homi plu tendencas mallaudar kam laudar, o pro ke li havas plu multa okazioni por mallaudo kam por laudo ». Fakte, nia lingui nacionala havas generale sufixi di malestimo, e ne sufixi di estimo. La LI. nur imitas oli. — Ni rimarkas, ke la sufixo ‑ach esas la sola, quan Esperanto anexis a su (e mem ne oficiale !), probable pro ke ol esis propozata da la prezidanto ipsa di la Lingva Komitato. Ol esas la sola frukto di la « natural evoluco » dum 23 yari !
