on insinuas apude la justa radiko adulter. Sed lor, quon divenas la Fundamento ? E la devizo : « Adjuntez, ne chanjez » !
Rezume, Esperantulo de nun tranas su lame dop Ido, proprigante a su, koncie o nekoncie, la vorti o formi de longe trovita ed uzita en nia linguo. To esas la « libera evoluco » ! E la rezultajo esos, ne linguo pura e korekta, sed abomininda mixuro di Esperanto e Ido.
Eventas ofte ke Esperantisti, Neutralisti, Universalisti, e c. kritikas ca o ta detalo di nia linguo, o « konsilas » a ni chanjar ca o ta punto. A ti de nia amiki, quin ta kritiki e konsili povus shanceligar, ni memorigos unesme, ke li venas de partiani di lingui, quin la Komitato di la Delegitaro rejetis, e qui esas evidente min bona kam la nia ; quan autoritaton tala personi havas do por kritikar o por plubonigar Ido ? Duesme, ni questionos, kad ita personi intencas adherar ad Ido, se nur on emendas la difekteti, quin li kredas trovar en ol ? Evidente no : li simple penas trublar l’Idisti per sua insidyema kritiki o konsili, e se ni esus sat naiva por auskultar oli, ni simple demolisus nia linguo sen aquirar per to un adepto pluse. Se la kritikanti volas sincere la « perfektigo » di la L. I., li devas unesme adherar a l’Uniono ; lor ni aceptos lia konsili e lia kunlaborado. Til lor, ni povas konsiderar li nur quale adversi (koncianta o nekoncianta), qui tendencas, ne konstruktar, sed destruktar nia linguo. Praktikala konkluzo : ni devas auskultar ed atencar nula kritiko, nula propozo, qua ne venas de Unionano, t. e. de sincera e devota amiko di nia linguo.
La 9-11 mayo eventis en ca urbo la Mondala Kongreso di L’internaciona Asocii. Ad ol adheris cirke 120 internaciona Asocii, inter qui la Delegitaro e l’Uniono di l’Amiki di la L.I. Ultre la delegiti di nia du asocii, qui esis : Kom. Ch. Lemaire, So J. Jamin, Si Liet. Cardinal e Giminne, asistis So Prof. W. Ostwald, So Waltisbuhl, So Couturat, e So Chalon, sekretaryo di la grupo Pioniro. La questiono di la L.l., kun ta di la ciencala nomizado e terminaro, esis diskutata la 10 posdimeze. Existis tri tezi e « kampeyi » : la partiani di la franca quale L.I., apartenanta a la « Federation internationale pour l’extension et la culture de la langue française » ; la Esperantisti, riprezentata da la mas agema e bruisema parisana chefi ; e la Idisti. La unesma partio esperis,
