grupo di Verdun, pose nia Luxemburgana amiki, e facis du diskursi, en Ulflingen ed en Luxembug, danke nia devota samideano So H. Meier. Reveninta en Bruxelles, il facis diskurso ye la 25a mayo, en la Populdomo, sub la prezido di C. Huysmans, kun la helpo di Kom. Lemaire e di So Chalon. Fine il diskursis ankore en Köln ed en Sagan (Silezio). Il devis en kelka okazioni diskutar kun Esperantisti : sed ek ici, l’uni agnoskas la supereso di Ido ; l’altri konfesas, ke Esp. bezonas plubonigi, sed ricevos oli… pos adopto da la guvernantari. Malfelica fideli, qui ne havas plu forta argumenti ! — Omna nia samideani saveskos kun joyo e gratudo la bela kampanyo di So Peus, qua certe genitos plu o min balde sua frukti. Esus dezirinda, ke nia linguo havez multa propaganti tam fervoroza ed agema, ed oratori tam eloquenta kam So Peus.
Ni saveskas kun granda plezuro, ke Sinioro Koppes, episkopo di Luxemburg, l’unesma alta aprobanto di l’U. S. I., adheris ad ol persone e formale. — La 30a aprilo, So Dudouy diskursis pri Ido en la « Sillon » en Caen, e la 3a mayo en la Katolika Yunaro di la sama urbo. Pos ica diskurso il invitesis da l’audantaro facor balde duesma diskurso pri komparo inter Esperanto e Ido, a qua invitesos docanto di Esp. primitiva. So Dudouy aceptis volunte l’invito. En Carentan (Manche) So Bouillon diskursis dufoye por Ido en la seminaryo. On interesas su ad Ido anke en altra seminaryi.
Ye la 19esma mayo eventis la 25esma chefkunveno di la « Weltspracheverein » Nuernberg fondita en 1885 (Klubo di la Internaciona linguo).
Sro Oettinger, 2esma prezidanto, raportis tre detaloze pri nia laboro en lasta yaro.
Quale prezidanto elektesis unvoce Sro advokato Dr. Esslinger vice la mortinta malnuva pioniro e mondlinguisto Sro Chr. Schmidt. L’altra societestri reelektesis :
Sro Oettinger : 2a prez. ; Sro Sessler : 1a sekr. ; Sro Maass : 2a sekr. ; Dlo Mayer : kasisto ; So Eisen : bibliotekisto ; Sri Senninger e Dumpert : asesori.
Partikulare importanta esas la fakto, ke nia klubo atingis nun sa 25a yarexisto ; ol esas forsan la max malnuva mondlinguoklubo, ed unika per sa travivata fazi : de Volapük ad Esperanto, lor Idiom Neutral e nun Ido, la max bona linguo. Ni decidis pro to exekutar festal kunveno por la 25a yarexisto ca-autune.
En ica okaziono ni volas projektar anke la fondo di sudgermana grupo kun sedo en Nuernberg por propagar « Ido » en ica regiono segun nia devizo : Kun la cienco e per la cienco a la venko.
