La Langue auxiliaire (mayo). — Mondala Kongreso di l’internaciona Asocii. So de Beaufront rimarkigas, ke ti qui pretendis « riprezentar » Esperanto en ta kongreso havis nula yuro, nam esas agnoskita da la chefi Esperantista ipsa, ke Esperanto havas nula legitima autoritato. Fakte, la duktado di la tota « afero » (santa o ne !) esas akaparita da grupeto de Parisani celata sub l’anonima « firmo » Centra Oficejo. — Letro da Couturat e Leau refutanta la Protesto di kelka ex-membri di la Delegitaro, duktata e trompata da la Centra Oficejo, qua igas li subskribar bonfide sua mentii e kalumnii. — Atencinda parolo : tosto di So Gautherot en la katolika Esp. kongreso, asertanta, ke Esperanto nule nocas la patrii e la patriotismi. Quale on koncilias ico kun la stulta pretendo, ke l’Esperantisti konstitucas aparta populo e supernaciono ? — Deklaro, da J. F. Khun. — De quo Esperanto mortos, da L. de Beaufront : pro ke sa facileso esas nur semblanta, pro ke sa gramatiko, qua semblas unesme simpla, celas multa senregulaji e komplikaji, pro ke sa vortifado havas nula regulo, e procedas kapricoze, hazarde e blinde ; fine, pro ke la malsaja fanfaronado di la propaganti preparas a l’adepti necesa decepto. Ol povas konquestar nek la populo, pro sa malfacileso, nek la ciencisti, pro ke ol alteras la ciencala linguo. — Kroniko generala : Italio, Holando, Suedo, Suiso, Britanio. — Bibliografio. — On rimarkos, ke ca jurnalo reganis nun la tardijo, qua nequietigis sa amiki e furnisis a nia adversi pretexto a tendencoza aserti. Quale sempre, ici esis tote malvera, la fakto pruvas to ; nia samideani joyos pri la vivemeso di lia max malyuna jurnalo, e sustenos ol kun sempre kreskanta kurajo e fido.
La Belga Sonorilo (no 128, 29 mayo). — Mondala Kongreso di l’internaciona Asociitari : ni ne recensas ica raporto, nam, quankam tote nedependanta, ol nur konfirmas e kompletigas nia raporto. Un detalo sen importo, sed ne sen signifiko[1] : l’Adjuvilo esis depozata sur la tabli di la sekretaryeyo di la Kongreso da l’agento di la Centra Oficejo. Yen la pruvo di la shaminda taktiko di la fanatiki ! — La semano Ido-Esperantala en Bruxelles : cirke la mondala kongreso. On raportas pri diskurso facita la 8 mayo da eminenta Esperantisto, e quan asistis… nur kindeko de Esperantisti ; pri la paperachi per qui l’Esperantisti penis inundar la kongreso, e per qui li nur donis ad ol ideo di la mento e mori di la supernaciono ; pri la kunveno en la klubo Pioniro. — L’Expozo di la Kongreso. — Kroniko. — Ad Prof. Ostwald ; danko vere meritata ! — Sempre la historyo : la Centra Oficejo audacas asertas en la fidela jurnali, ke Esp. esis aceptata en l’Expozo « quale
- ↑ Rimarkez la difero di importo e di signifiko, quin Esperanto konstante intermixas, per germanismo (Bedeutung).
