— La internaciona kongreso di socialisti (eventos de 28 agosto til 3 sept. en Kopenhago). — Laboristi e patrio, trad. Geo Listens. — Prof. Ostwald kontre Esperanto. — Ek la movado di Ido. — Literaturo di Ido. — Ido-stenografo da Peus. L’autoro explikas, ke sa sistemo, qua esas tre simpla e riprezentas omna literi (soni), ne esas destinata sequar la rapida parolo, sed nur skribar plu rapide e mallonge kam l’ordinara skribado. On savas ya, ke la stenografo-sistemi, qui esas kapabla sequar la parolo, uzas omnaspeca abrejuri komplikita, quin on lernas nur per longa exerco e dechifras nur pos longa praktiko.
Progresido (junio). — La Procesisti, da Racine, trad. da J. B. Pinth. — Paulo e Virginia, trad. da Sno Lelong.— Fidel amiko, da Ne-Poeto. — Nulu bonfacez por propra interesto ; legendo, da J. de Ljustina. — Suplementa parto : diversa informi, aparte pri la mondala kongreso en Bruxelles. — Nuva adresaro dokumentizita : ni 296-330. La konstanta kresko di ta adresaro pruvas ya, ke Ido vivas. Pro to nia adversi, qui dum du yari anuncis, ke Ido ja esas « mortinta », nun predicas nur, ke ol balde mortos ! To esas ya vera progreso ! Sed, danke la fervoro di nia samideani, la duesma aserto esas tam malvera kam l’unesma.
Internaciona Pioniro (no 9. junio).— Nia Literaturo : listo di nia lernolibri, aparte en Esperanto (Waltisbühl) ed en germana. — Uniersala Metodo, 10a leciono. Derivo di l’adjektivo, kompozita vorti, malvera reflektiva verbi ; konjuncioni ; exerco. — Tero o Fairo ? Enterigo o kremaco ? da Do Hermann : bonega artiklo populare-ciencala, sed tre preciza e teknikala. L’autoro expozas aparte la du procedi di putrado (oxoza e senoxa), e montras ke la kremaco havas la sama rezultajo kam la putrado oxoza (nur plu rapide e plu pure) ; sed ke ofte, pro la cirkonstanci, eventas en la tero la putrado senoxa (malbonodoranta). Do la kremaco esas la max bona e sekura moyeno efektigar la finala malkompozo di la homal korpo. L’autoro uzis en ica artiklo la kemiala nomizado propozata da Prof. Ostwald en Progreso ; ed ol aparas tre simpla e klara en ica unesma apliko. — Pri reformo di nia kalendaryo, da P. de Janko. Nia akademiano pledas por ta reformo, qua konsistas esence uniformigar la nombro di la dii di la monati : singla yarquarono kontenus tri monati havanta rispektive 30, 30 e 31 dii ; existus un extra dio (du en la bisextila yari) ; l’ordino di la semanal dii esus la sama en omna yarquaroni (nam 91 7 × 13), qui komencus per lundio e finus per sundio. So P. de Janko propozas nur malgranda modifiko, utila por la komerco, nome : ke la tri monati havez rispektive 30, 31 e 3o dii. — Herkules et sa aventuri, originala novelo da A. Kofman. — Diversajo.
