- 211
linda pay met ket a inawis ti imatang ni Isagani. Ti sao a
cochers inpalagipna kenkuana dagiti pangpanpanagan da
kadagiti bagbagi da met laeng dagiti kolejiala, a pangibagada iti maysa a kita ti ayat.
Idi kuan, nalpasen ti umuna nga akto, ket ti marques innalana a babaunen na da Serpolette ken Germaine, a isuda ti mangipakita iti managbutbuteng a kinalapsat ti troupe, ket innalana met a kochers na ni duldog a Grenicheux. Sipsipat a kasta unay ti namagsubli a namagparang a nagkikibin kadagidi naggiginnura ken nganngani nagkakabil itay di pay nalabes ti lima a darikmat, lugayanda amin dagiti naayat nga agbuya a taga Manila ket dagiti babbai inda pay nakikinnita iti nabagas kadagiti dadduma nga agbuybuya.
Idi ta madama ti apagbiit a ringgor a patauden dagiti agguunna a mapan iti pagaruatan dagiti agipabuya ken kumablaaw kadagiti aktris, ken dagiti pay mapan kumablaaw kadagiti babbai nga adda kadagiti palpalko, addada mangibaga iti pamanunutan da maipanggep iti naipabuya ken kadagiti pay met artista.
—Awan duadua, ni Serpolette iso ti kalaingan,—kinuna ti maysa a kasla mannakaammo.
—Kaykayatko ni Germaine, ti labbasit na nakaay-ayo.
—No awan timek na!
—Ket pagan-anok ti timek na?
—No bagi, daytay natayag!
—Psh!—kinuna ni Ben-Zayb,—awan uray la no maysa a nalaing, awan artista kadakuada.
Ni Ben-Zayb iso ti kritiko ti El Grito de la Integridad, ket ti tignay na a naumsi iso ti mangted iti dakkel a pateg na kadagiti mapneken iti sangkabassit.
—!Awan timek ni Serpolette, ket ni Germaine awan met nasayaat a lingay na; ket dayta, saan a musika, di met arte, di met anial—intuluyna, a makita unay ti lais na.
Tapno makuna a naindaklan datao a kritiko, awan kas ti panangipakita nga awan maay-ayatan. Ti empresa duddua ngamin a tugtugaw ti inggayatna iti pagiwarnak na.
Kadagiti palpalko masalsaludsod no asino ti akinpalko iti daydi awan tao na. Ti akinkukua abakenna amin ida iti kina chic, ta isunto ti maudi a sumangpet.
Di ket ammo no adino ti naggapuan ti sao, ngem kinunada a ni Simoun iso ti akinpalko. Ti damag napaneknekan. Awan nakakita iti joyero iti yan dagiti butbutaka, uray iti pagaruatan dagiti agipabuya, uray sadino.
