Iti daydi a kanito, nagparang iti abot a yan ti agdan ti ulo ni Simoun.
-Ngem ¿sadino ti inus-usukan yo?-inpukkaw ni don Custodio, a nalipatannan a naminpinsan daydi luksaw na;-¡dinadaelyo ti kasayaatan ti panaglayag tayo! -¡Psh-insungbat ni Simoun, idi nakaulin;-nagado a karkarayan kada nasayaat a disdisso a nakitkitakon, ket isuna la a makaawis kaniak dagiti mangipalagip kadagiti sarsarita...
-No sarsarita, addaan met toy Pasig,-insungbat ti Kapitan, a madi a laisenda ti karayan a paglaylayaganna ken pagsapsapulanna iti pagbiag na;-addayta ti maipapan iti Mala pad-na-bato, bantay a bato a napateg idi saan pay a dimteng dagiti kakastila, kas taeng dagiti karkararua; kalpasan na, idi napukawen toy a panangipapan ket sinerreken ti dakes toy a bantay, nagbalinen a umok dagiti agar-arang a manipod iti tuktok na laklakaenda unay nga agawan dagiti nakakaasi a bangbangka a saan la a ti agos ti karayan ti sarangten da, no di pay ket dagiti tattao. Kamaudianan na, ka dagitoy ita nga al-aldaw, numan pay ginasawgasawen ti tao, adda pay la madam- damag a bangka a mapatpattog; ket siak, no iti pagsikkuan, ta diak kuma ipakat dagiti innem a rikriknak, maipuruakak ngata kuma kadagiti bakbakrang na. Adda pay sabali a sarita, ti maipapan iti rukib ni Donia Jeronima, a mabalin a saritaen kadakayo ni Padre Florentino ...
-¡Ammo ti amin a sangalubungan!-kinuna a silalais ni Padre Sibyla. gapo
Ngem ni Simoun, ni Ben-Zayb, ni Padre Irene, ni Padre Camorra saan da nga ammo, ket dinawatda a masarita, dagiti dadduma iti ayat da nga agangaw, ket dagiti dadduma gapo iti napudpudno a gagar da. Daydi apo padi, nga inaramatna ti kasla inaangaw met a panagsao a kas kadagiti dadduma a dimmawat iti panagsarita na, nga arig na ti yaya a pagsaritaen dagiti ububbing, kinunana:
-Adda kan idi maysa nga agad-adal a nangikari a maki-asawa iti maysa a balasang a kailian na, ngem idi kuan, dina met malaglagipen. Daydi balasang, a di ket nagkupas ti ayat na, inna inururay iti bayat dagiti ado a tawtawen; limmabas ti panagkabanuag na, nagbalin a bayog, ket naminsan nga aldaw, nadamagna daydi nangasasawa kenkuana iso ti arsobispo ti Manila. Nagaruat iti kawes ti lalaki, napan, a linasatna ti mangliwengliweng nalawa a taaw, a naglabas idiay Cabo, dimmatag iti arsobispo ket dinawatna a matungpal ti kari na. Ti dawat na saan a mabalin nga annuguten, ket ti arsobispo
