- 65
gusna met la nga inaprusan, ta mabuteng a maakaran: daydi
a relikario, a brilyante ken esmeralda, naggapo iti maysa nga
agkukutel. . . !A! dayta ket din, no agsakit iti kasdi, saan a
makiasawan.
Gapo ta mangrugi nga aglawagen ket gapo ta makitana ni apo na a lakay a nakatugaw iti maysa a suli, nga isursurutna dagiti matmata na kadagiti ar-aramiden ni Juli, innalana ti tampipi a yan dagiti ar-aruaten na, inasitganna a si-isem nga mapan immagep iti ima na. Daydi lakay binendisiunanna nga awan sao na uray maysa. Ni Juli kinayatna ti nagangaw:
—Inton sumangpet ni ama, ibagayunto kenkuana a napanak idiay kolejio; ti apok a lakay ammuna ti tao ti kastila. Iso dayta ti kolejio a kalakaan a masarakan.
Ket idi nakitana a dagiti matmata ni apona a lakay namsekda iti lua, inawitna ti tampipi na ket dinarasna ti immulog. Dagiti sinsinelas na naipakupakda a kasta unay ragsak kadagiti pangpangal ti agdan a kayo.
Ngem idi intaliawna ti rupa na, ta kitaenna pay maminsan daydi balay da, daydi balay a nagpukawan dagiti maudi a tagtagainep ti kinaubing na ken nagpakitaan met dagiti immuna a parparmata ti kinabalasang na; idi nakitana a sililiday, waywayas, napanawan, dagiti tawtawa na nga apagbingngi, awan an-ania da, ket nasipnget a kas kadagiti matmata ti maysa a natay; idi nangngegna ti apagapaman nga anasaas dagiti kawkawayan ket nakitana ida nga in-indayunen ti nalamiis a puyupoy ti agsapa a kasda la itay kunkuna kenkuana: “!Dios ti kumuyog!”, ison, nagpukawen ti garatigit na, nagsardeng, namsek dagiti matmata na iti lua, naipatugaw iti puon ti maysa a kayo a natuang iti igid ti dalan, ket nagsangit a di man naliwliwaan.
Nabayag bassiten a pimmanaw ni Juli ket ti init nakatangkayagen a nalaing. Ni lakay Selo manipod iti tawa inna kitkitaen dagiti tattao nga aglabas a sikakawesda nga agpaili a mapan makimisa iti maudi. Istay isuda amin adda kibkibinenda wenno ububbaenda nga ubing a lalaki wenno babai a naaruatanda a kasla mapan makirambak.
Ti aldaw ti Paskua sadi Pilipinas, kas kuna dagiti lallakay, iso ti piesta dagiti ububbing; dagiti ubbing, nalabit, saan a kasta ti pamanunutan da, ket mabalin a kunaen a kabutengda pay ket di. Pudno, ta masapada a mariing, maidamrusanda, maaruatanda ket ikapetda amin a baro, nangina ken napateg a kawes da, sapatos a seda, kallugong a dadakkel, aruaten a lana, seda, wenno tersiopelo, santo pay la uppat wenno lima nga eskapularyo a babassit a nakailanadan ti
