Daydi dakes a napasamak nagdinamag iti ilin-ili, addada sineknanna ket addada met dagiti isuna la nga inngatuda
dagiti ab-abaga da. Awan ti akinbasol ket awan ti kasla nabantutan ti puso na.
Ti teniente ti guardia sibil di pay nangan-ano; inawatna a bilin a maummong amin a ig-igam ket tinungpalna ti annongna; no la ket mabalinanna, inna met kamaten dagiti agararang ket idi tiniliw dagitoy ni Kabesang Tales, dinagdagusna ti nangibaon iti napan nagkamat ket insangpetda iti ili, a naparautan a nagdekket dagiti siksiko na, ti lima wenno innem a taga taitalon a inpagarupda a nakaaatap, ket no di rimuar ni Kabesang Tales, awan sabali a gapo na no di ti kaawan na iti supot wenno iti babaen ti kudil dagiti natiltiliw, a nawagwag a nagagara.
Ti padi-uldog (lego) nga agay-wan iti asyenda inngatuna dagiti ab-abaga na. Iso awan bibiang na!: aramid la ti tulisan! ket iso, isuna la a tungpalenna ti annong na. Pudno a no saan kuma nga immasog, nalabit dida met kuma inummong dagiti ig-igam ket daydi nakakaasi a kabesas di met kuma natiltiliw; ngem iso, ni Fray Clemente, masapol a kitaenna met ti talged ti bagi na ket ni daydi Tales, sabali ti panagkitkita na, ta kasna la itay pilpilien iti bagi daydi praile ti nasayaat a inna paltugan. Naikasigod ti panagsarapa. No adda da agar-arang, saan a daydi praile ti akinbasol, dina annong ti mapan mangkamat kadakuada: dayta, annong ti Guardia Sibil. No ni Kabesang Tales nagbati kuma iti balayna, a di ket napan nanglawlawlaw kadagiti taltalonna, saan kuma a nakayawan. Kamaudiananna, daydi a naaramid, maysa a panusa ti langit kadagiti sumupsupiat iti kayat ti gimongda a praile.
Ni ermana Penchang, daydi mananglualo a baket a yan ni Juli, a patagabo, naammuanna, namindua wenno namitlo a nagsusmariusep!, nagugis, sana innayon:
—Iti kaaduan na, ibaon ka datao ni Apo Dios dagita a banbanag gapo ta managbasultayo wenno gapo ta addada ka
