Se̿ng-géng/Mǎ-tuo̿i Hŭ-éng/20
Di̿ 20 Cióng
[edit]- 1 Tíng gǒ su̿-siōng cì-ciă gá-cṳ̌, cǎu-tê chṳ̌ ko̤̿ gu̿ nêng hā gṳ̀ bǔ-dǎu hṳ̂ing-di̿ ca̿ dī.
- 2 Iáu ca̿ dī gâ̤ nêng gǒ̤ng diāng-gú cì góng cì cîng ngê̤ng, ciū hǎng gṳ̀ ko̤̿ bǔ-dǎu hṳ̂ing.
- 3 Bu̿ing-de̿-chîng gá-cṳ̌ ǐ ko̤̿, chū-gi̿ng gu̿ iǔ nêng gṳè hā gái-diǒ̤-di̿ hí;
- 4 Ciū iáu gṳ̀ uā, Nì uā ko̤̿ bǔ-dǎu hṳ̂ing, e̿ng-gái dǎ̤ gâ̤ góng-cîng uòi ciū ŏ̤ nǎ nì. Iǒ̤ng nêng ciū dī ko̤̿.
- 5 Dó̤ng-de̿ iáu bu̿ing-de̿-làu gâ̤ sî-hē , gá-cṳ̌ ǐ chṳ̌ ko̤̿ iǎ sī iǒ̤ng-gǎ̤-sǐ ca̿.
- 6 Chá-bú-dó̤ o̤̿ng-bíng-ciě , gá-cṳ̌ ǐ chṳ̌ ko̤̿, chū-gi̿ng gū iǔ nêng gṳè-diū ǔ-di̿ hí, ciū iáu gṳ̀ uā, Nì ca̿-sū-dī cì góng da̿u ō̤ng gṳè hā iǒ̤ng-di̿ hí nī?
- 7 Gṳ̀ uā, Éng-ṳē mǎu nêng gu̿ uòi ca̿ dī. Gá-cṳ̌ uā, Nì iǎ ko̤̿ bǔ-dǎu-hṳ̂ing.
- 8 Da̿u o̤̿ng-bíng-ciě, hṳ̂ing-dóng-gá iáu lǐ-dī gâ̤ nêng uā, Hǎng ca̿-dī gâ̤ nêng giǎng-ce̿ng lâ̤, nà góng-cîng nǎ gṳ̀, giǎng hē-mṳě lâ̤ gâ̤ nà kǐ, da̿u sáing lâ̤ di̿ cǐ.
- 9 Chá-bú-dó̤ o̤̿ng-bíng-ciě gu̿ lâ̤ gâ̤ nêng giǎng-ce̿ng lâ̤, gǒ̤ nêng dú dǎ̤ cì cîng ngê̤ng.
- 10 Sáing gu̿ lâ̤ gâ̤ nêng iǎ giǎng-ce̿ng lâ̤, gṳ̀ siǒng ga̿ing ŏ̤ dǎ̤ dǎ̤ cāi: gǒ̤ nêng iǎ lâ̤ dǎ̤ cì cîng ngê̤ng .
- 11 Dǎ̤-diō̤ làu, ciū uā gá-cṳ̌ gâ̤ ǎing dī,
- 12 Uā, Uòi cì góng da̿u o̤̿ng nǎ mì-tê pū ca̿-dǎ̤ cèng kǔ, ǔ hē-mṳě lâ̤ gâ̤ bǔ-gua̿ lâ̤ ca̿ bu̿ing-ciǎ sî-sěng gâ̤ dī; nì gu̿ nà gṳ̀ iáu uòi ǐ-búing.
- 13 Gá-cṳ̌ a̿ing gṳ̀ dǐ-bíng cì-ciă nêng uā, Bǎing-iǔ-huǎ, uòi mài nà nì iè-kṳ́, nì sī iáu uòi gǒ̤ng-gua̿ làu cì cîng ngê̤ng, ēng sī?
- 14 Nì nà nì gâ̤ góng-cîng dé ko̤̿; uòi o̿ nǎ iǒ̤ng hē-mṳě lâ̤ gâ̤ , su̿-siōng nǎ nì ǐ-búing.
- 15 Uòi gâ̤ mî-dī běng uòi o̿ gōng-ciōng sǎ̤, í nì uā gǒ̤ng, ēng gǒ̤ng ? uòi ca̿ hǎu gâ̤ dī, nì mì-ciú tu̿-lu̿ kǐ lâ̤ chū?
- 16 Iǒ̤ng-gǎ̤-sǐ giâ-gíng da̿u bò-hē gâ̤ , hē-lǎi ŏ̤ da̿u tê-chîng ; da̿u tê-chîng gâ̤ , hē-lǎi ŏ̤ da̿u bò-hē
- 17 Iǎ-Sú iǒ̤ng Iǎ-lū-sǎ-lǎing gâ̤ sî-hē , da̿u diō̤-di̿ càng-càng-di̿ iáu-diū sí-nī-ciǎ hǎ-sáing câi cì-dó giǎng, iáu gṳ̀ uā,
- 18 Uôi-huōi-nêng giâ-gíng iòng Iǎ-lū-sǎ-lǎing; nêng gâ̤ :Gṳ̌ing ŏ̤ nǎ nêng gáu nǎ duōi ci̿-sí, iáu nāng-sṳ́ nêng l iǒ̤ng duói nêng ŏ̤ diāng gṳ̀ gâ̤ sǐ-cò,
- 19 Nà gṳ̀ gáu nǎ biē-gǒ-nêng, iǒ̤ng nêng ciū ŏ̤ diě gṳ̀, nà bíng mà gṳ̀ , nà gṳ̀ da̿ings-ǐ da̿u sí-cī-ga̿ : di̿ sáng góng gṳ̀ ciū ŏ̤ hǔ-sáng kǐ lâ̤.
- 20 Ǔ-cì-sî Sái-bǐ-tuo̿i gâ̤ nǎi iáu gṳ̀ liòng-ciǎ gṳ̌ing hā Iǎ-Sú-di̿ lâ̤ ba̿i gṳ̀ , o̿ giǔ cì-iōng dī.
- 21 Iǎ-Sú uā. Nì o̿ sū-mū dī ? Gṳ̀ uā , O̿ nì gáu-dō nǎ uòi iǒ̤ng liòng-ciǎ gṳ̌ing da̿u nì gǒ-di̿, cì-ciă cō da̿u nì iū-bíng , cì-ciă cō da̿u nì cǒ̤-bíng.
- 22 Iǎ-Sú a̿ing uā, Nì giǔ gâ̤, nì cù-cī dú ēng dǎ̤-dí sī sū-mū dī. Uòi tǎu niōng iè gâ̤ ǔ cì é nì iǔ-bǒ̤ng-sū iè mǎu?
- 23 Iǎ-Sú uā, Uòi iè gâ̤ ǔ cì é, nì cǒng ŏ̤ iè: lâ̤-sī cō da̿u sū nêng o̿-do̿ gâ̤, ciū nǎ sū nêng.
- 24 Ǔ sí-ciǎ hǎ-sáing tia̿ng-nī-gi̿ng iǒ̤ng dī̤, séng-dǐ nǎu-nū ǔ liòng-ciǎ hiáng-dī.
- 25 Iǎ-Sú hǎng hǎ-sáing giǎng-ce̿ng lâ̤, uā, Biē-gǒ-nêng uǎng-di̿ gǔing-dǎ̤ gṳ̀ ngǐng, gṳ̀ gâ̤ duōi gúing iǔ gṳ̌ing-ba̿ng di̿-hū gṳ̀, iǒ̤ng sī nì dǎ̤-dí gâ̤.
- 26 Lâ̤-sī nì ēng gǒ̤ng iǒ̤ng-gǎ̤-sǐ nì-huōi-nêng dǐ-bíng suq nêng o̿ ca̿ duo̿i, ciū niōng te̿-hē nì;
- 27 Sū nêng o̿ ca̿ tê-ciě, ciu niōng ca̿ nì gâ̤ nû-gě.
- 28 Su̿-siōng nêng gâ̤ Gṳ̌ing lâ̤, ēng sī nǎ nêng te̿-hē, sī te̿-hē biē-nêng, gu̿ niōng nà cù-cī gâ̤ sáng-miāng ce̤̿ng ga̿-cîng, chiǔ cèng cāi nêng da̿u-tê.
- 29 Chṳ̌ Iǎ-lī-gó̤. sêng gâ̤ sî-hē cèng cāi nêng gáing Iǎ-Sú ko̤̿.
- 30 Iǔ liòng-ciǎ hǎi-ciě cō hā diō̤ bíng, tia̿ng-nī-gi̿ng Iǎ-Sú giǎng gua̿, ciū hǎng kǐ lâ̤ , uā, Cṳ̌ à, Duōi-pǐ gâ̤ gṳ̌ing-só̤ng, kǒ̤-lǐng uòi.
- 31 Iǎ-Sú ciū děng káu, hǎng gṳ̀ lâ̤ , mōng gṳ̀ , uā, Nì o̿ uòi ta̿i nì ca̿ sū dī?
- 32 Hǎi-ciě uā, Cṳ̌ à, o̿ uòi mì-ciú ŏ̤ guáng kǐ lâ̤. Iǎ-Sú kǒ̤-lǐng gṳ̀, mó̤ gṳ̀ gâ̤ mì-ciú ; mì-ciú ciū chū-dǎ̤-gi̿ng, gṳ̀ liōng nêng ciū gáing Iǎ-Sú ko̤̿.