Jump to content
Se̿ng-géng/Mǎ-tuo̿i Hŭ-éng/21
- 1 Iǎ-Sú iáu hǎ-sáing chá-bí-dó̤ da̿u Iǎ-lū-sǎ-lǎing sáing da̿u Bǎ-huǎ-gǐ gṳ̄ing Gāng-lǎng súing. Iǎ-Sú ciū hǎng liòng-ciǎ hǎ-sáing,
- 2 Iáu gṳ̀ uā, Nì ko̤̿ dō̤ng-mô̤ng hióng-lǐ, ciū ŏ̤ chū-gi̿ng cì-tê lṳ̂ gǎi da̿u ǔ-di̿, gu̿ iǔ cì-tê lṳ̂-ciě câi cì-dó: nì tiǎ-kṳé, káing hā uòi iǒ̤ng-di̿ lâ̤.
- 3 Lâ̤ iǔ nêng mōng nì, nì niōng uā, Cṳ̌ niōng sǎ̤; gṳ̀ ciū ŏ̤ nǎ nì káing lâ̤.
- 4 Iǒ̤ng ciū-sī niōng gīng-hāu síng-dí tê-chîng uā-gua̿ gâ̤ dī,
- 5 Gō̤-uā, Niōng iáu Sě̤ng sêng gâ̤ bă-sia̿ng uā, Nì gâ̤ uâng hā nì iǒ̤ng-di̿ lâ̤, uǎ-ki̿, gǐ-diū lṳ̂, gū iǔ cì-tê lṳ̂-mā sǎi gâ̤ lṳ̂-ciě.
- 6 Hǎ-sáing ciū í Iǎ-Sú gáu-dō gṳ̀ gâ̤ dī ko̤̿ ca̿.
- 7 Káing-diū lṳ̂, iáu lṳ̂-ciě lâ̤, nà cù-cī gâ̤ í-ciông tǒ̤ hā ciōng-bíng: pṳ̄-diū Iǎ-Sú gǐ iòng ko̤̿.
- 8 Gu̿ iǔ cèng cāi n3ng nà í-ciông pṳ́ hā diō̤-di̿, iǎ iǔ dú chiū-kiá pṳ́ hā diō̤-di̿.
- 9 Chîng gáing hē ě̤ng gâ̤ cèng cāi nêng hǎng kǐ lâ̤, uā, Duōi-pǐ gâ̤ gṳ̌ing-só̤ng, giǔ nì giù: e̿ng-gái niōng cu̿ing-mǐ ǔ ciǎ ka̿u-diū Cṳ̌ miâng lâ̤ gâ̤.
- 10 Iǎ-Sú nì Iǎ-lū-sǎ-lǎing-di̿ ko̤̿, tóng sêng gâ̤ nêng só̤ lâ̤ só̤ ko̤̿-di̿, uā, Iǒ̤ng sī sū-mū nêng nī?
- 11 Gáing-diū gâ̤ cèng cāi nêng a̿ing uā, Iǒ̤ng sī síng-dí, Iǎ-Sú, giǎng Gá-lī-lī gâ̤ Nà-sǎ-là̤-di̿ lâ̤.
- 12 Iǎ-Sú nì Ciōng-Di̿ gâ̤ dāing, nà dǐ-bíng ca̿ mǎi-māi gâ̤ nêng dú dāi chṳ̌ ko̤̿, dàing-da̿u bǒ̤-cîng nêng gâ̤ dǒ̤, iáu māi bà-gǒ̤ nêng gâ̤ ǐ.
- 13 Iáu gṳ̀ uā, Se̿ng-géng gi̿-diū uā, Uòi gâ̤ chio̤̿ ŏ̤ hǎng ca̿ gǐ-dǎu gâ̤ chio̤̿: nì da̿u nà lâ̤ bi̿ng ca̿ chā̤ chě.
- 14 Dāing-di̿ iǔ hǎi-ciě gio̤̿-ciě lâ̤ Iǎ-Sú mīng-chîng, Iǎ-Sú ta̿i gṳ̀ í hǎu.
- 15 Duōi ci̿-sí iáu nāng-sṳ́ nêng chū-gi̿ng Iǎ-Sú ca̿ iǒ̤ng hí-gǐ gâ̤ dī, ǐ chū-gi̿ng iǔ gṳ̌ing-ciě da̿u dāing-di̿ hǎng kǐ lâ̤ uā, Duōi-pǐ gâ̤ gṳ̌ing-só̤ng, giǔ nì giù; gṳ̀ séng-dǐ ciū nǎu-nū kǐ lâ̤.
- 16 Iǎ-Sú uā, Iǒ̤ng gṳ̌ing-ciě uā gâ̤ dī, nì tia̿ng-nī-gi̿ng , ēng-nǎing? Iǎ-Sú uā, Tia̿ng-nī-gi̿ng: se̿ng-géng uā, Uòi nà gṳ̌ing-ciě iáu iè nâing gṳ̌ing-ciě gâ̤ chṳ̿ uā sí-huó̤ng hǎu cu̿ing-mǐ gâ̤ dī; iǒ̤ng cì gṳ̿ dī nì gu̿ ēng-nǎing nāng-gua̿ à?
- 17 Iǎ-Sú ciū giǎng gṳ̀ ǔ-di̿ ko̤̿-tiāu ; chṳ̌ sêng ko̤̿ Bǎ-duōi-nǐ, da̿u ǔ-di̿ hṳě-mâng.
- 18 Dī nī góng cǎu-tê nì sêng gâ̤ sî-hē , Iǎ-Sú ciū bǔ-gṳě.
- 19 Chū-gi̿ng diō̤ bíng iǔ cì-công mǎu-huá-guǎ chiū, giǎng gṳ̄ing lâ̤ chū, hiū-di̿ mǎu guǎ-ciě tǎu, dú sī niò̤; ciū iáu chiū uā, Giâ à ko̤̿, nì ě̤ng-ṳ̌ing cuo̿i mài sáng guǎ-ciě; mǎu-huá-guǎ chiū dāi-diū ciū kú-tiāu.
- 20 Hǎ-sáing chū-gi̿ng cèng gǐ-ī gō̤-uā , mǎu-huá-guǎ chiū gōng-ciōng-di̿ dāi-diū ciū kú-tiāu?
- 21 Iǎ-Sú a̿ing uā, Uòi ì-cài iáu nì uā, Nì lâ̤ iǔ se̿ng-séng, mǎu mī-cie̿ ngǐ-séng, ēng-ò̤-cǐ ŏ̤ ca̿ iǒ̤ng mǎu-huá-guǎ chiū gâ̤ dī, ciū-sī iáu iǒ̤ng cì-pi̿ng súing uā, Nì niōng nǎ Cṳ̌ dé kǐ lâ̤ diú hā huǒi-di̿, ciū ŏ̤ iǒ̤ng-gǎ̤-sǐ ca̿-chěng.
- 22 Iǎ-Sú gǐ-dǎu gǐ-dǎu gâ̤ sî-hē, mǎu-lō̤ng giǔ sū-mū-dī se̿ng, ciū dú ŏ̤ dǎ̤-diō̤.
- 23 Iǎ-Sú da̿u dāing-di̿ háu nêng gâ̤ sî-hē, duōi ci̿-sí iáu bă-sia̿ng dǐ-bíng gâ̤ chîng-bo̿ lâ̤ mōng Iǎ-Sú, uā, Nì ka̿u sū-mū gṳ̌ing-ba̿ng ca̿ iǒ̤ng duói dī? Iǒ̤ng gṳ̌ing-ba̿ng sī sū nêng nǎ nì?
- 24 Iǎ-Sú a̿ing uā, Uòi iǎ mōng nì cì gṳ̄ dī, nì lâ̤ iáu uòi uā, uòi ciū iáu nì uā uòi sī kāu sū-mū gṳ̌ing-ba̿ng ca̿ iǒ̤ng duói dī.
- 25 Iǒ̤-hu̿ing sí sǎi gâ̤ lǐ sī giǎng nī-di̿ lâ̤? sī giǎng tíng-di̿ lâ̤ à, iǎ sī giǎng nêng -di̿ lâ̤ nī? Ǔ duói nêng càng-càng-di̿ sióng-liông, uā, Uòi lâ̤ uā, Giǎng tíng di̿ lâ̤; gṳ̀ ciū ŏ̤ mōng uòi . Iǒ̤ng-gǎ̤-sǐ nì ca̿-sū-dī ēng se̿ng gṳ̀ nī?
- 26 Lâ̤ uā, Giǎng nêng-di̿ lâ̤; ǐ giáng bă-sia̿ng ; éng-ṳē bă-sia̿ng dú chū Iǒ̤-hu̿ing sī síng-dí.
- 27 Ciū a̿ing Iǎ-Sú uā, Uòi ēng dǎ̤-dí. Iǎ-Sú uā, Uòi iǎ ēng iáu nì uā, uòi sī ka̿y sū-mū gṳ̌ing-ba̿ng ca̿ iǒ̤ng duói dī.
- 28 Iǎ-Sú ciū uā, Cì-ciă nêng iǔ liòng-ciǎ gṳ̌in, giǎng-ce̿ng iáu duōi gṳ̌ing uā, Uòi gṳ̌ing, nì géng-diáu ko̤̿ bǔ-dǎu hṳ̂ing ca̿ dī.
- 29 Duōi gṳ̌ing a̿ing uā, Uòi ēng ko̤̿, hē-mṳě ho̿-ki̿, ciū ko̤̿.
- 30 Giǎng-ce̿ng iáu di̿ nī gṳ̌ing iǒ̤ng-gǎ̤-sǐ uā, Di̿ nī gṳ̌ing uā, Dá, uòi ko̤̿, hē-mṳě ēng ko̤̿.
- 31 Í nì siǒng iǒ̤ng liòng-ciǎ gṳ̌ing, nī cì-ciă sī í-diū dá gâ̤ séng-i̿ ko̤̿ ca̿?
- 32 Éng-ṳē Iǒ̤-hu̿ing dṳ̌ing ngī gâ̤ dàu-lǐ hā iǒ̤ng-di̿ lâ̤; nì eng se̿ng gṳ̀: siú-sṳe̿ iáu ca̿ gī-mâ gâ̤ nêng se̿ng gṳ̀: nì chū-gi̿ng iǒ̤ng dī làu, hē-mṳě gōng eng ho̿-ki̿ ko̤̿ se̿ng gṳ̀.
- 33 Nì cuo̿i tia̿ng-nī cì-ciă bǐ-piāng : Iǔ ciǎ gá-cṳ̌ kṳé-hṳ̂ing cá̤ bǔ-dǎu chiū, gǒ̤ng-lǒ̤ng-kṳ́ing diě-diū dṳ̌-hṳ̂ing-piáng, hṳ̂ing-di̿ lé cì-ciă cà ciǔ gâ̤ sù-cài , kṳé cì-gáing lê, cú nǎ dǎ-hṳ̂ing gâ̤ nêng, ciū ko̤̿biě dī-huó̤ng.
- 34 Guǎ-ciě chá-bǔ-dó̤ dǎ̤ gâ̤ sî-hē , gá-cṳ̌ ciū hǎng gṳ̀ gâ̤ nû-gě ko̤̿, iáu dǎ-hṳ̂ing gâ̤ nêng siú guǎ-ciě.
- 35 Dǎ-hṳ̂ing gâ̤ nêng nà-diū gṳ̀ gâ̤ nû-gě, cì-ciă nà lâ̤ mà, cì-ciă huōi-sǐ-tiāu, cì-ciă nà ciō̤ lâ̤ ià.
- 36 Gá-cṳ̌ ǐ hǎng biē gâ̤ nû-gě ko̤̿, piāng tê-chîng ga̿ing cāi: dǎ-hṳ̂ing gâ̤ nêng iǎ sī iǒ̤ng-gǎ̤-sǐ duòi gṳ̀.
- 37 Hē-mṳě hǎng gṳ̀ gâ̤ gṳ̌ing ko̤̿, séng-dǐ gō̤-siǒg, Gṳ̀ cǒng ŏ̤ ge̿ng-dōng uòi gâ̤ gṳ̌ing.
- 38 Dǎ-hṳ̂ing gâ̤ nêng chū-gi̿ng gṳ̀ gṳ̌ing, ciū càng-càng-di̿ sióng-liông, uā, Iǒ̤ng ciǎ sī dǎ̤ sú-ngiè gâ̤ nêng ; uôi-huōi-nêng mǒng huōi-sǐ-tiāu gṳ̀, chiǒng gṳ̀ gâ̤ sú-ngiè.
- 39 Ciū nà-diū gṳ̀, dāi gṳ̀ chṳ̌ bǔ-dǎu hṳ̂ing, huōi-sǐ-tiāu.
- 40 Hṳ̂ing-dóng-gá lâ̤ gâ̤ sî-hē ŏ̤ gōng-ciōng bāing iǒ̤ng dǎ-hṳ̂ing gâ̤ nêng nī?
- 41 Duōi-gá-nêng uā, Gṳ̀ cǒng ŏ̤ miè-tiāu iǒ̤ng ŏ̤ nêng, nà bǔ-dǎu hṳ̂ing cú-gua̿ biē dǎ-hṳ̂ing gâ̤ nêng , guǎ-ciě dǎ̤ gâ̤ sî-hē ciū ŏ̤ í-diū sî-hē hīng guǎ-ciě.
- 42 Iǎ-Sú iáu gṳ̀ uā, Se̿ng-géng gi̿-diū uā, Nâi-sṳ̌ tê-chîng diú-tiāu gâ̤ ciō̤, giâ-gíng ca̿ chio̤̿-gú děng iàu-gěng gâ̤ ciō̤, dī nì gu̿ ēng-nǎing nāng gua̿ à?
- 43 Gu̿-chu̿ uòi iáu nì uā, Hē-lǎi ŏ̤ nà Ciōng-Di̿ gâ̤ gǒ giǎng nì iǒ̤ng-di̿ chiǒng ko̤̿, dé nǎ ŏ̤ sáng guǎ-ciě gâ̤ bă-sia̿ng.
- 44 Nêng lâ̤ gǔing hā iǒ̤ng ciō̤-di̿ ŏ̤ dǔing chà-cho̿-tiāu; lâ̤ iǒ̤ng ciô̤ diàng da̿u sū-nêng gâ̤ séng-dǐ, ciū ŏ̤ nà iǒ̤ng nêng diàng iǎng hó, chṳé ko̤̿-tiāu. ko̤̿-tiāu
- 45 Duōi ci̿-sí iáu Huǎ-lī-so̿ nêng tia̿ng-nī-gi̿ng Iǎ-Sú gâ̤ bǐ-piāng, dǎ̤-dí sī uā gṳ̀ gâ̤ dī.
- 46 Ciū o̿ nà-diū gṳ̀, lâ̤-sī giáng bă-sia̿ng, éng-ṳē bă-sia̿ng chū Iǎ-Sú sī síng-dí.
← · Di̿ 20 Cióng · Di̿ 22 Cióng →
«Se̿ng-géng» gâ̤ mù-lṳ̀
