Se̿ng-géng/Mǎ-tuo̿i Hŭ-éng/7
[ 18 ]
Di̿ 7 Cióng.
- Nì ēng niōng uā nêng iǔ cho̤̿, sǎng-dă̤ nêng iǎ uā nì iǔ cho̤̿.
- Éng-ṳē nì gōng-ciōng gă̤-sĭ uā nêng iǔ cho̤̿, nêng iǎ gōng-ciōng gă̤-sĭ uā nì iǔ cho̤̿: nì nà sū-mū gǒ̤ng-dě liông nă nêng, nêng iǎ ŏ̤ nà sū-mū gǒ̤ng-dě liông nă nì.
- Nì hiáng-dī mì-ciú-di̿ gâ̤ chi̿, nì chū-dă̤-gi̿ng, nì cù-cī mì-ciú-di̿ gâ̤ châu, da̿u ēng gă-gi̿ng, iŏ̤ng sī gōng-ciōng uā nī?
- Nì cù-cī mì-ciú-di̿ iǔ châu, gōng-ciōng ŏ̤ iáu hiáng-dī uā, Nì mì-ciú gâ̤ chi̿ nă uòi ta̿i nì bí-tiāu,
- Gǎ-hǎu gâ̤ nêng à, nì sáing niōng bí-tiāu cù-cī mì-ciú gâ̤ châu; ciū ŏ̤ chū-dă̤ chéng-chǔ bí-tiāu nì hiáng-dī mì-ciú gâ̤ chi̿.
- ¶ Eng niōng nà chéng-giĕ gâ̤ mî-dī diú nă ě, iǎ ēng niōng nà nì gâ̤ céng-cṳ́ diú nă kṳ̌, giáng-pa̿ kṳ̌ ŏ̤ nŏ̤-tiāu céng-cṳ́, ě ŏ̤ chiá-dṳ̌ing-séng gàu nì.
- Giǔ, ciū ŏ̤ nă nì: lāu, ciū ŏ̤ lāu-diō̤: mà mô̤ng, ciū ŏ̤ ta̿i nì kṳé mô̤ng.
- Éng-ṳē mǎu-lō̤ng sū nêng giǔ, ciū dă̤-diō̤; lāu, ciū lāu-diō̤; mà mô̤ng, ciū ta̿i gṳ̀ kṳé mô̤ng. [ 19 ]
- Nì dǐ-bíng sū nêng iǔ gṳ̌ing tǎu biǎng, nī-di̿ kǎing uà ciō̤ nă gṳ̀?
- Tǎu ngṳ̂. nī-di̿ kǎing nà ṳê nǎ gṳ̀?
- Nì-huo̿i-nêng mǒng làing, gu̿ dă̤-dí nà hǎu gâ̤ mî-dī nă gṳ̌ing, iŏ̤ng-gă̤-sĭ nì gâ̤ Dá da̿u tíng-ciōng ga̿ing ŏ̤ nà hǎu gâ̤ mî-dī nă giǔ gṳ̀ gâ̤ nêng.
- Gu̿-chu̿ nì mǎu-lō̤ng sū dī o̿ nêng gōng-ciōng gă̤-sĭ duòi nì, nì iǎ niōng gōng-ciōng gă̤-sĭ duòi nêng: éng-ṳē lṳ̆-huă, iáu síng-dí gâ̤ sṳ́, dú sī iŏ̤ng-gă̤-sĭ uā.
- ¶ Nì niōng nì bǎ gâ̤ mô̤ng; éng-ṳē ko̤̿ sǐ gâ̤ sù-cài, mô̤ng sī kuŏi gâ̤, diō̤ sī duōi gâ̤, ǐ iǔ cèng cāi nêng giǎng iŏ̤ng-di̿ di̿ ko̤̿.
- Ko̤̿ sáng gâ̤ sù-cài, mô̤ng sī bǎ gâ̤, diō̤ sī siǎu gâ̤, ǐ mǎu gǐ-duói nêng lāu-dă̤-diō̤.
- ¶ Nì niōng bǒ̤ng-bī gǎ gâ̤ síng-dí, gṳ̀ bā nì iŏ̤ng-di̿ lâ̤, ngṳē-bíng su̿-siōng mîng-iông, dǐ-bíng ì-cài sī cǎi-lǒ̤ng.
- Nì chū gṳ̀ sáng gâ̤ guǎ-ciě, ciū ŏ̤ dă̤-dí gṳ̀. Iǔ chi̿ gâ̤ chǎu-di̿, nī-di̿ iǔ bǔ-dǎu tǎu nī?
- Iŏ̤ng-gă̤-sĭ hǎu gâ̤ chiū sáng hǎu gâ̤ guǎ-ciě, làing gâ̤ chiū sáng làing gâ̤ guǎ-ciě,
- Hǎu gâ̤ chiū mài sáng làing gâ̤ guǎ-ciě, làing gâ̤ chiū mài sáng hǎu gâ̤ guǎ-ciě.
- Mǎu-lō̤ng sū-mū chiū mài sáng hǎu gâ̤ guǎ-ciě, ciū dǔ à lâ̤, diú hā hǒ-di̿.
- Gu̿-chu̿ nì chū gṳ̀-huo̿i-nêng sáng gâ̤ guǎ-ciě, ciū ŏ̤ dă̤-dí gṳ̀.
- Mǎu-lō̤ng sū nêng bǎng uòi uā, Cṳ̌ à, Cṳ̌ à, iŏ̤ng gâ̤ nêng mǎu ĭ-diāng dú ŏ̤ nì tíng-gŏ; cǒng-lâ̤ í uòi tíng ciōng gâ̤ Dá gâ̤ séng-i̿ ko̤̿ ca̿, iŏ̤ng nêng ciū ŏ̤ di̿ ko̤̿.
- Da̿u ŭ nì-ciě, iǔ cèng cāi nêng ŏ̤ iáu uòi uā, Cṳ̌ à, Cṳ̌ à, uòi ǎing-sî dú sī ka̿u nì gâ̤ miâng háu nêng, ka̿u nì gâ̤ miâng dāi-tiāu gṳ̌, ka̿u nì gâ̤ miâng ca̿ cèng cāi cǒ-nǎing gâ̤ dī.
- Uòi ciū dā̤ iáu gṳ̀ uā, Uòi dú ēng dă̤-dí nì, nì iŏ̤ng duói ca̿-ŏ̤ gâ̤ nêng dú ēng niōng hā uòi iŏ̤ng-di̿. [ 20 ]
- Gu̿-chu̿ mǎu-lō̤ng sū-mū nêng tia̿ng-nī uòi uā gâ̤ dī, ciū ko̤̿ ca̿, iŏ̤ng nêng bǐ-piāng cì-ciă chóng-měng gâ̤ nêng, da̿u ciō̤-ngâng ciōng-bíng-di̿ kṳé chio̤̿.
- Pōng-diō̤ hóng chṳé, hṳ̄ ŭ, sṳ̌ ce̿ng; dú mài diàng-tiāu: éng-ṳē dī-gí da̿u ciō̤-ngâng ciōng-bíng.
- Mǎu-lō̤ng sū-mū nêng tia̿ng-nī uòi uā gâ̤ dī, ēng ko̤̿ ca̿, iŏ̤ng nêng bǐ-piāng cì-ciă háng gâ̤ nêng, da̿u suói ciōng-bíng-di̿ kṳé chio̤̿.
- Pōng-diō̤ hóng chṳé, hṳ̄ ŭ, sṳ̌ ce̿ng; iŏ̤ng chio̤̿ ciū diàng-tiāu: hǎing diàng-dǎ̤ gua̿-dă̤-kia̿u.
- ¶ Iǎ-Sú iŏ̤ng duói dī uā làu, ŭ cèng cāi nêng siǒng gṳ̀ háu gâ̤ dī cèng gǐ-guo̿i.
- Éng-ṳē gṳ̀ háu nêng su̿-siōng iǔ gṳ̌ing-ba̿ng gâ̤ nêng, mài su̿-siōng gṳ̀ dǐ-bíng gâ̤ nāng-sṳ́ nêng.