Il carneval moura

by Gian Fadri Caderas

[ 64 ]

Il carneval moura.

L'ais morent! el moura, moura!
Al clinger del plain magiöl,
Tres il fraid e la nosch' ora,
D'üna tabe mour' il vegl;
Sper il led dad el sun quia
Il dalet e l'allegria.

L'allegria, sa figlia chera,
Ais afflicta, crida zuond,
II dalet cun greiva tschera,
Bain demuossa led profuond.
Povers orfens sainza tet,
Vos vegl bap s'abbandunet !

[ 65 ]

Giuvintschella, giuvintschella;
Rösa zarta della val,
Vain il temp d'la lungurella,
Mort ais uoss' il carneval!
Ün bel craunz per el prepara
D'fluors ornescha sia bara.

Penitenza hoz cumainza;
Pü giuns e gias nun od;
Be ans resta l'algordaunza
Da concerts, teaters, sot.
Tuot glivret! A bun ans vair,
L'an chi vain, cun nouv plaschair!