Jv/Alkitab/Pangentasan/39

^39:1 ꧊ꦧꦺꦗ꦳ꦭꦺꦲꦺꦭ꧀ꦭꦤ꧀꧊ꦄꦲꦺꦴꦭꦶꦪꦧ꧀ꦒꦮꦺꦱꦤ꧀ꦝꦁꦔꦤ꧀ꦱꦶꦁꦲꦺꦤ꧀ꦢꦃꦲꦺꦤ꧀ꦢꦃꦱꦏꦧꦼꦤꦁꦧꦶꦫꦸ꧈​ꦮꦸꦔꦸꦭꦤ꧀ꦲꦧꦁꦱꦶꦁꦢꦶꦲꦼꦁꦒꦺꦴꦢꦺꦤꦶꦁꦥꦫꦲꦶꦩꦩ꧀ꦱꦩꦱꦔ꧀ꦭꦢꦺꦤ꧀ꦤꦶꦲꦶꦁꦱꦱꦤꦱꦸꦕꦶ꧉​ꦱꦤ꧀ꦝꦁꦔꦤ꧀ꦤꦶꦁꦲꦶꦩꦩ꧀ꦏꦁꦒꦺꦴꦲꦫꦸꦤ꧀ꦢꦶꦗꦲꦶꦠ꧀ꦏꦪꦱꦶꦁꦮꦶꦱ꧀ꦢꦶꦝꦮꦸꦃꦲꦏꦺꦄꦭ꧀ꦭꦃꦩꦫꦁ꧊ꦩꦸꦱ꧉​

^39:2 ꦮꦺꦴꦁꦮꦺꦴꦁꦩꦲꦸꦥꦝꦒꦮꦺꦲꦺꦥ꦳ꦺꦴꦢ꧀ꦱꦏꦏꦲꦶꦤ꧀ꦭꦺꦤꦲꦭꦸꦱ꧀꧈​ꦧꦶꦫꦸ꧈​ꦮꦸꦔꦸꦭꦤ꧀ꦲꦧꦁ꧈​ꦱꦂꦠꦧꦼꦤꦁꦩꦱ꧀꧉​

^39:3 ꦮꦺꦴꦁꦮꦺꦴꦁꦩꦲꦸꦥꦝꦤꦶꦥꦶꦱ꧀ꦱꦏꦺꦧ꧀ꦭꦺꦧꦺꦏ꧀ꦏꦤ꧀ꦩꦱ꧀꧈​ꦧꦚ꧀ꦗꦸꦂꦢꦶꦫꦗꦁꦢꦢꦶꦧꦼꦤꦁꦲꦭꦸꦱ꧀꧈​ꦤꦸꦭꦶꦢꦶꦠꦼꦤꦸꦤ꧀ꦏꦫꦺꦴꦏꦲꦶꦤ꧀ꦭꦺꦤꦲꦭꦸꦱ꧀ꦭꦤ꧀ꦧꦼꦤꦁꦧꦶꦫꦸ꧈​ꦮꦸꦔꦸꦱꦂꦠꦲꦧꦁ꧉​

^39:4 ꦲꦸꦒꦥꦝꦒꦮꦺꦠꦭꦶꦤꦺꦥꦸꦤ꧀ꦝꦏ꧀ꦏꦁꦒꦺꦴꦲꦺꦥ꦳ꦺꦴꦢ꧀ꦱꦶꦁꦢꦶꦥꦱꦁꦲꦶꦁꦥꦶꦁꦒꦶꦂꦫꦺ꧈​ꦱꦸꦥꦪꦏꦼꦤꦢꦶꦠꦭꦺꦏ꧀ꦏꦏꦺ꧉​

^39:5 ꦱꦧꦸꦏ꧀ꦏꦺꦱꦏꦠꦼꦤꦸꦤ꧀ꦤꦤ꧀ꦲꦭꦸꦱ꧀꧈​ꦧꦏꦭ꧀ꦭꦺꦥꦝ꧈​ꦢꦶꦥꦱꦁꦢꦢꦶꦱꦶꦗꦶꦏꦫꦺꦴꦲꦺꦥ꦳ꦺꦴꦢ꧀ꦏꦪꦱꦶꦁꦮꦶꦱ꧀ꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃꦩꦫꦁ꧊ꦩꦸꦱ꧉​

^39:6 ꦮꦺꦴꦁꦮꦺꦴꦁꦩꦲꦸꦥꦝꦔ꧀ꦒꦺꦴꦱꦺꦴꦏ꧀ꦲꦏꦶꦏ꧀꧈​ꦧꦚ꧀ꦗꦸꦂꦢꦶꦥꦱꦁꦲꦶꦁꦥ꧀ꦭꦶꦱꦶꦂꦩꦱ꧀꧉​ꦗꦼꦤꦼꦁꦔꦺꦥꦫꦥꦸꦠꦿꦤꦺ꧊ꦪꦏꦸꦧ꧀ꦫꦺꦴꦭꦱ꧀ꦤꦸꦭꦶꦢꦶꦲꦸꦏꦶꦂꦲꦤꦲꦶꦁꦮꦠꦸꦮꦠꦸꦩꦲꦸ꧈​

^39:7 ꦧꦚ꧀ꦗꦸꦂꦥꦝꦢꦶꦥꦱꦁꦲꦶꦁꦱꦧꦸꦏ꧀ꦧꦲꦸꦤꦺꦲꦺꦥ꦳ꦺꦴꦢ꧀ꦩꦶꦤꦁꦏꦮꦏꦶꦭ꧀ꦭꦶꦁꦏ꧀ꦭꦺꦴꦩ꧀ꦥꦺꦴꦏ꧀꧊ꦆꦱꦿꦲꦺꦭ꧀ꦫꦺꦴꦭꦱ꧀꧈​ꦏꦪꦱꦶꦁꦮꦶꦱ꧀ꦢꦶꦝꦮꦸꦃꦲꦏꦺꦄꦭ꧀ꦭꦃꦩꦫꦁ꧊ꦩꦸꦱ꧉​

^39:8 ꧊ꦧꦺꦗ꦳ꦭꦺꦲꦺꦭ꧀ꦭꦤ꧀꧊ꦄꦲꦺꦴꦭꦶꦪꦧ꧀ꦥꦝꦒꦮꦺꦠꦸꦠꦸꦥ꧀ꦝꦝ꧈​ꦧꦏꦭ꧀ꦭꦺꦥꦝꦏꦫꦺꦴꦲꦺꦥ꦳ꦺꦴꦢ꧀꧈​ꦱꦸꦭꦩ꧀ꦩꦤ꧀ꦤꦺꦲꦶꦪꦥꦝ꧉​

^39:9 ꦮꦸꦗꦸꦢ꧀ꦢꦺꦥꦼꦱꦒꦶꦢꦶꦠꦼꦏꦸꦏ꧀ꦢꦢꦶꦭꦺꦴꦫꦺꦴ꧈​ꦲꦩ꧀ꦧꦭꦤ꧀ꦢꦮꦤꦺꦥꦝ꧈​ꦪꦏꦸꦮꦶ22ꦱꦺꦤ꧀ꦠꦶꦩꦺꦠꦼꦂ꧉​

^39:10 ꦲꦶꦁꦠꦸꦠꦸꦥ꧀ꦝꦝꦢꦶꦥꦱꦁꦔꦶꦲꦏꦶꦏ꧀ꦥꦠꦁꦭꦫꦶꦏ꧀꧈​ꦲꦶꦁꦭꦫꦶꦏ꧀ꦏꦤ꧀ꦏꦥꦶꦱꦤ꧀:ꦮꦠꦸꦢ꧀ꦭꦶꦩ꧈​ꦠꦺꦴꦥꦱ꧀ꦱꦂꦠꦧꦲꦶꦢꦸꦫꦶꦱꦼꦥꦃ;

^39:11 ꦲꦶꦁꦭꦫꦶꦏ꧀ꦏꦤ꧀ꦏꦥꦶꦤ꧀ꦝꦺꦴ:ꦗ꦳ꦩꦿꦸꦢ꧀꧈​ꦮꦠꦸꦤꦶꦭꦩ꧀ꦭꦤ꧀ꦲꦶꦤ꧀ꦠꦼꦤ꧀;

^39:12 ꦲꦶꦁꦭꦫꦶꦏ꧀ꦏꦤ꧀ꦏꦠꦼꦭꦸ:ꦮꦠꦸꦭꦗ꦳ꦸꦮꦂꦢꦶ꧈​ꦲꦏꦶꦏ꧀ꦭꦤ꧀ꦮꦠꦸꦏꦼꦕꦸꦧꦸꦁ;

^39:13 ꦲꦶꦁꦭꦫꦶꦏ꧀ꦏꦤ꧀ꦏꦁꦏꦥꦶꦁꦥꦠ꧀:ꦮꦠꦸꦥꦶꦫꦸꦱ꧀꧈​ꦪꦏꦸꦠ꧀꧈​ꦱꦂꦠꦉꦠ꧀ꦤꦕꦼꦩ꧀ꦥꦏ꧉​ꦏꦧꦺꦃꦩꦲꦸꦢꦶꦥꦱꦁꦲꦶꦁꦥ꧀ꦭꦶꦱꦶꦂꦩꦱ꧀꧉​

^39:14 ꦮꦠꦸꦫꦺꦴꦭꦱ꧀ꦩꦲꦸꦱꦶꦗꦶꦱꦶꦗꦶꦤꦺꦢꦶꦲꦸꦏꦶꦂꦗꦼꦤꦼꦁꦔꦺꦥꦸꦠꦿꦤꦺ꧊ꦪꦏꦸꦧ꧀ꦩꦶꦤꦁꦏꦮꦏꦶꦭ꧀ꦭꦶꦁꦏ꧀ꦭꦺꦴꦩ꧀ꦥꦺꦴꦏ꧀꧊ꦆꦱꦿꦲꦺꦭ꧀ꦫꦺꦴꦭꦱ꧀꧉​

^39:15 ꦩꦼꦁꦏꦺꦴꦤꦺꦴꦲꦸꦒꦧꦚ꧀ꦗꦸꦂꦢꦶꦒꦮꦺꦫꦤ꧀ꦠꦺꦫꦤ꧀ꦠꦺꦱꦏꦩꦱ꧀ꦩꦸꦂꦤꦶꦱꦶꦁꦢꦶꦲꦼꦤꦩ꧀ꦏꦪꦠꦭꦶ꧉​

^39:16 ꦧꦚ꧀ꦗꦸꦂꦢꦶꦒꦮꦺꦏ꧀ꦏꦏꦺꦲꦭꦶꦲꦭꦶꦩꦱ꧀ꦭꦺꦴꦫꦺꦴꦢꦶꦥꦱꦁꦲꦶꦁꦥꦸꦕꦸꦏ꧀ꦭꦺꦴꦫꦺꦴꦭꦺꦴꦫꦺꦴꦤꦺꦱꦶꦱꦶꦃꦤ꧀ꦝꦸꦮꦸꦂꦠꦸꦠꦸꦥ꧀ꦝꦝꦩꦲꦸ꧉​

^39:17 ꦫꦤ꧀ꦠꦺꦩꦱ꧀ꦭꦺꦴꦫꦺꦴꦩꦲꦸꦢꦶꦱ꧀ꦭꦺꦴꦧꦺꦴꦏ꧀ꦏꦏꦺꦲꦶꦁꦲꦭꦶꦲꦭꦶꦭꦺꦴꦫꦺꦴ꧈​

^39:18 ꦥꦸꦕꦸꦏ꧀ꦏꦺꦥꦝꦢꦶꦠꦭꦺꦏ꧀ꦏꦏꦺꦲꦶꦁꦥ꧀ꦭꦶꦱꦶꦂꦭꦺꦴꦫꦺꦴ꧈​ꦱꦶꦱꦶꦃꦔꦉꦥ꧀ꦢꦶꦠꦭꦺꦏ꧀ꦏꦏꦺꦲꦶꦁꦠꦭꦶꦤꦺꦧꦲꦸꦤꦺꦲꦺꦥ꦳ꦺꦴꦢ꧀꧉​

^39:19 ꦧꦚ꧀ꦗꦸꦂꦥꦝꦒꦮꦺꦲꦭꦶꦲꦭꦶꦩꦱ꧀ꦭꦺꦴꦫꦺꦴꦭꦶꦪꦤꦺꦱꦶꦁꦢꦶꦲꦼꦠꦿꦥ꧀ꦥꦏꦺꦲꦶꦁꦠꦸꦠꦸꦥ꧀ꦝꦝꦱꦶꦱꦶꦃꦔꦶꦱꦺꦴꦂ꧈​ꦲꦶꦁꦠꦼꦏꦸꦏ꧀ꦏꦤ꧀ꦱꦶꦱꦶꦃꦚ꧀ꦗꦼꦫꦺꦴꦱꦶꦁꦠꦼꦩꦸꦩ꧀ꦥꦁꦲꦺꦥ꦳ꦺꦴꦢ꧀꧉​

^39:20 ꦧꦚ꧀ꦗꦸꦂꦥꦝꦒꦮꦺꦲꦭꦶꦲꦭꦶꦩꦱ꧀ꦭꦺꦴꦫꦺꦴꦩꦼꦤꦺꦃꦱꦶꦁꦢꦶꦥꦱꦁꦲꦶꦁꦠꦭꦶꦲꦺꦥ꦳ꦺꦴꦢ꧀ꦥꦺꦫꦁꦔꦤ꧀ꦔꦉꦥ꧀ꦱꦶꦱꦶꦃꦔꦶꦱꦺꦴꦂ꧈​ꦕꦼꦝꦏ꧀ꦠꦼꦏꦸꦏ꧀ꦏꦤ꧀꧈​ꦲꦶꦁꦱꦤ꧀ꦝꦸꦮꦸꦂꦫꦶꦁꦱꦧꦸꦏ꧀ꦱꦏꦠꦼꦤꦸꦤ꧀ꦤꦤ꧀ꦲꦭꦸꦱ꧀꧉​

^39:21 ꦏꦪꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃꦩꦫꦁ꧊ꦩꦸꦱ꧈​ꦮꦺꦴꦁꦮꦺꦴꦁꦩꦲꦸꦥꦝꦔ꧀ꦒꦤ꧀ꦝꦺꦁꦲꦭꦶꦲꦭꦶꦠꦸꦠꦸꦥ꧀ꦝꦝꦏꦫꦺꦴꦲꦭꦶꦲꦭꦶꦤꦺꦲꦺꦥ꦳ꦺꦴꦢ꧀ꦔꦁꦒꦺꦴꦠꦭꦶꦧꦶꦫꦸ꧈​ꦔꦤ꧀ꦠꦶꦠꦸꦠꦸꦥ꧀ꦝꦝꦩꦲꦸꦲꦤꦲꦶꦁꦤ꧀ꦝꦸꦮꦸꦂꦱꦧꦸꦏ꧀ꦭꦤ꧀ꦲꦺꦴꦫꦧꦏꦭ꧀ꦲꦸꦕꦸꦭ꧀꧉​

^39:22 ꦗꦸꦧꦃꦱꦶꦁꦢꦶꦲꦼꦁꦒꦺꦴꦲꦶꦁꦱꦤ꧀ꦝꦸꦮꦸꦂꦫꦶꦁꦲꦺꦥ꦳ꦺꦴꦢ꧀꧈​ꦏꦧꦺꦃꦱꦏꦧꦼꦤꦁꦧꦶꦫꦸ꧉​

^39:23 ꦒꦸꦭꦺꦴꦤꦺꦢꦶꦏꦸꦮꦠ꧀ꦠꦶꦔꦁꦒꦺꦴꦥꦶꦁꦒꦶꦂꦫꦤ꧀ꦱꦶꦁꦢꦶꦠꦼꦤꦸꦤ꧀꧈​ꦱꦸꦥꦪꦲꦺꦴꦫꦒꦩ꧀ꦥꦁꦱꦸꦮꦺꦏ꧀꧉​

^39:24 (39:24-26)ꦲꦶꦁꦥꦶꦁꦒꦶꦂꦫꦤ꧀ꦱꦶꦱꦶꦃꦔꦶꦱꦺꦴꦂꦢꦶꦥꦱꦁꦔꦶꦉꦉꦁꦒꦤ꧀ꦫꦸꦥꦮꦺꦴꦃꦢ꧀ꦭꦶꦩꦱꦏꦏꦲꦶꦤ꧀ꦭꦺꦤꦲꦭꦸꦱ꧀꧈​ꦭꦤ꧀ꦧꦼꦤꦁꦧꦶꦫꦸ꧈​ꦮꦸꦔꦸꦱꦂꦠꦲꦧꦁ꧈​ꦢꦶꦱꦼꦭꦁꦱꦼꦭꦶꦁꦏꦫꦺꦴꦭꦺꦴꦚ꧀ꦕꦺꦁꦩꦱ꧀꧈​ꦏꦪꦱꦶꦁꦮꦶꦱ꧀ꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃꦩꦫꦁ꧊ꦩꦸꦱ꧉​

^39:25 (39:24)

^39:26 (39:24)

^39:27 ꦮꦺꦴꦁꦮꦺꦴꦁꦩꦲꦸꦥꦝꦒꦮꦺꦏꦼꦩꦺꦗꦤ꧀ꦏꦁꦒꦺꦴꦲꦫꦸꦤ꧀ꦭꦤ꧀ꦲꦤꦏ꧀ꦲꦤꦏ꧀ꦏꦺ꧈​

^39:28 ꦩꦼꦁꦏꦺꦴꦤꦺꦴꦲꦸꦒꦱꦼꦂꦧꦤ꧀꧈​ꦏꦺꦴꦥꦾꦃ꧈​ꦕ꧀ꦭꦤꦕꦼꦏꦏ꧀ꦱꦏꦭꦺꦤ꧈​ꦱꦧꦸꦏ꧀ꦱꦏꦏꦲꦶꦤ꧀ꦭꦺꦤꦲꦭꦸꦱ꧀꧈​ꦧꦶꦫꦸ꧈​ꦮꦸꦔꦸꦭꦤ꧀ꦲꦧꦁ꧈​ꦢꦶꦉꦁꦒꦔꦁꦒꦺꦴꦱꦸꦭꦩ꧀ꦩꦤ꧀꧈​ꦏꦪꦱꦶꦁꦮꦶꦱ꧀ꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃꦩꦫꦁ꧊ꦩꦸꦱ꧉​

^39:29 ꦱꦂꦠꦱꦧꦸꦏ꧀ꦱꦏꦏꦲꦶꦤ꧀ꦭꦺꦤꦲꦭꦸꦱ꧀꧈​ꦧꦶꦫꦸ꧈​ꦮꦸꦔꦸꦭꦤ꧀ꦲꦧꦁ꧈​ꦢꦶꦉꦁꦒꦔꦁꦒꦺꦴꦱꦸꦭꦩ꧀ꦩꦤ꧀꧈​ꦏꦪꦱꦶꦁꦮꦶꦱ꧀ꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃꦩꦫꦁ꧊ꦩꦸꦱ꧉​

^39:30 ꦲꦶꦪꦢꦶꦒꦮꦺꦧ꧀ꦭꦺꦧꦺꦏ꧀ꦏꦤ꧀ꦱꦏꦩꦱ꧀ꦩꦸꦂꦤꦶꦱꦶꦁꦢꦢꦶꦠꦤ꧀ꦝꦪꦺꦤ꧀ꦮꦺꦴꦁꦮꦺꦴꦁꦩꦲꦸꦮꦶꦱ꧀ꦢꦶꦥꦶꦗꦶꦏꦒꦼꦩ꧀ꦒꦸꦱ꧀ꦠꦶꦄꦭ꧀ꦭꦃ꧉​ꦲꦶꦁꦧ꧀ꦭꦺꦧꦺꦏ꧀ꦏꦤ꧀ꦩꦱ꧀ꦩꦲꦸꦲꦤꦲꦸꦏꦶꦂꦲꦸꦏꦶꦂꦫꦤ꧀ꦠꦼꦠꦼꦩ꧀ꦧꦸꦁꦔꦤ꧀:"ꦢꦶꦥꦶꦗꦶꦏꦒꦼꦩ꧀ꦒꦸꦱ꧀ꦠꦶꦄꦭ꧀ꦭꦃ꧉"​

^39:31 ꦧ꧀ꦭꦺꦧꦺꦏ꧀ꦏꦤ꧀ꦩꦱ꧀ꦩꦲꦸꦢꦶꦥꦱꦁꦲꦶꦁꦱꦼꦂꦧꦤ꧀ꦱꦶꦱꦶꦃꦔꦉꦥ꧀꧈​ꦩꦤꦸꦠ꧀ꦝꦮꦸꦃꦲꦺꦄꦭ꧀ꦭꦃꦩꦫꦁ꧊ꦩꦸꦱ꧉​

^39:32 ꦮꦸꦱꦤꦤꦺꦱꦏꦺꦃꦲꦶꦁꦥꦼꦒꦮꦺꦪꦤ꧀ꦏꦸꦱꦶꦁꦏꦁꦒꦺꦴꦒꦮꦺꦏꦺꦩꦃꦥꦊꦁꦒꦃꦲꦤ꧀ꦤꦶꦁꦄꦭ꧀ꦭꦃꦮꦶꦱ꧀ꦫꦩ꧀ꦥꦸꦁ꧉​ꦮꦺꦴꦁ꧊ꦆꦱꦿꦲꦺꦭ꧀ꦲꦼꦁꦒꦺꦴꦤꦺꦔ꧀ꦒꦫꦥ꧀ꦏꦧꦺꦃꦩꦲꦸꦏꦪꦱꦶꦁꦢꦶꦝꦮꦸꦃꦲꦏꦺꦄꦭ꧀ꦭꦃꦩꦫꦁ꧊ꦩꦸꦱ꧉​

^39:33 ꦏꦺꦩꦃꦥꦊꦁꦒꦃꦲꦤ꧀ꦤꦶꦁꦄꦭ꧀ꦭꦃꦢꦭꦃꦱꦥꦶꦫꦤ꧀ꦠꦶꦤꦺꦏꦧꦺꦃꦤꦸꦭꦶꦢꦶꦲꦠꦸꦂꦫꦏꦺꦩꦫꦁ꧊ꦩꦸꦱ꧈​ꦪꦲꦶꦏꦸ:ꦏꦺꦩꦃ꧈​ꦕꦤ꧀ꦛꦺꦭ꧀ꦭꦤ꧀ꦤꦺ꧈​ꦧ꧀ꦭꦤ꧀ꦢꦂꦱꦶꦁꦩꦭꦁ꧈​ꦕꦒꦏ꧀ꦕꦒꦏ꧀ꦲꦥꦢꦺꦤꦺꦲꦸꦩ꧀ꦥꦏ꧀ꦏꦺ꧈​

^39:34 ꦠꦸꦠꦸꦥ꧀ꦱꦏꦭꦸꦭꦁꦮꦼꦝꦸꦱ꧀ꦧꦺꦫꦺꦴꦏ꧀ꦭꦤꦁꦱꦶꦁꦢꦶꦥꦸꦭꦱ꧀ꦲꦧꦁ꧈​ꦠꦸꦠꦸꦥ꧀ꦱꦏꦭꦸꦭꦁꦲꦭꦸꦱ꧀꧈​ꦒꦺꦴꦂꦝꦺꦤ꧀ꦱꦶꦁꦤꦸꦠꦸꦥ꧀ꦥꦶꦱꦱꦤꦩꦲꦱꦸꦕꦶ;

^39:35 ꦥꦼꦛꦶꦥꦽꦗꦚ꧀ꦗꦶꦪꦤ꧀ꦱꦶꦁꦲꦶꦱꦶꦤꦺꦥꦥꦤ꧀ꦮꦠꦸꦭꦺꦴꦫꦺꦴꦏꦫꦺꦴꦥꦶꦏꦸꦭ꧀ꦭꦤ꧀ꦱꦂꦠꦠꦸꦠꦸꦥ꧀ꦥꦺ꧈​

^39:36 ꦩꦺꦗꦱꦲꦺꦴꦱ꧀ꦱꦤ꧀ꦫꦺꦴꦠꦶꦱꦥꦶꦫꦤ꧀ꦠꦶꦤꦺꦏꦧꦺꦃ꧈​

^39:37 ꦥꦼꦢꦩꦂꦫꦤ꧀ꦱꦏꦩꦱ꧀ꦩꦸꦂꦤꦶ꧈​ꦢꦩꦂꦢꦩꦂꦱꦥꦶꦫꦤ꧀ꦠꦶꦤꦺ꧈​ꦊꦔꦏꦁꦒꦺꦴꦢꦩꦂ꧈​

^39:38 ꦩꦼꦱ꧀ꦧꦺꦃꦱꦏꦩꦱ꧀꧈​ꦊꦔꦗꦼꦧꦢ꧀꧈​ꦢꦸꦥꦮꦔꦶ꧈​ꦒꦺꦴꦂꦝꦺꦤ꧀ꦭꦮꦁꦔꦶꦁꦏꦺꦩꦃ꧈​

^39:39 ꦩꦼꦱ꧀ꦧꦺꦃꦠꦼꦩ꧀ꦧꦒꦏꦫꦺꦴꦗꦭꦤꦺꦱꦶꦁꦱꦏꦠꦼꦩ꧀ꦧꦒ꧈​ꦥꦶꦏꦸꦭ꧀ꦭꦤ꧀ꦏꦁꦒꦺꦴꦔꦸꦱꦸꦁꦭꦤ꧀ꦥꦶꦫꦤ꧀ꦠꦶꦤꦺꦏꦧꦺꦃ꧈​ꦥꦢꦱ꧀ꦱꦤ꧀ꦏꦁꦒꦺꦴꦮꦶꦱꦸꦃꦭꦤ꧀ꦭꦩ꧀ꦧꦂꦫꦤ꧀ꦤꦺ꧈​

^39:40 ꦒꦺꦴꦂꦝꦺꦤ꧀ꦒꦺꦴꦂꦝꦺꦤ꧀ꦏꦁꦒꦺꦴꦥꦒꦼꦂꦫꦶꦁꦥ꧀ꦭꦠꦂꦫꦤ꧀ꦱꦂꦠꦕꦒꦏ꧀ꦕꦒꦏ꧀ꦱꦲꦸꦩ꧀ꦥꦏ꧀ꦏꦺ꧈​ꦒꦺꦴꦂꦝꦺꦤ꧀ꦏꦁꦒꦺꦴꦭꦮꦁꦔꦶꦁꦥ꧀ꦭꦠꦂꦫꦤ꧀ꦱꦂꦠꦠꦭꦶꦠꦭꦶꦤꦺ꧈​ꦧ꧀ꦭꦤ꧀ꦢꦂꦫꦶꦁꦏꦺꦩꦃ;ꦏꦧꦺꦃꦥꦿꦧꦺꦴꦠ꧀ꦱꦶꦁꦢꦶꦲꦼꦁꦒꦺꦴꦲꦶꦁꦱꦗꦿꦺꦴꦤꦶꦁꦏꦺꦩꦃ;

^39:41 ꦭꦤ꧀ꦱꦤ꧀ꦝꦁꦔꦤ꧀ꦏꦸꦱꦸꦱ꧀ꦱꦶꦁꦏꦸꦢꦸꦢꦶꦲꦼꦁꦒꦺꦴꦢꦺꦤꦶꦁꦥꦫꦲꦶꦩꦩ꧀ꦲꦶꦁꦱꦱꦤꦱꦸꦕꦶꦱꦂꦠꦱꦤ꧀ꦝꦁꦔꦤ꧀ꦝꦶꦤꦼꦱ꧀ꦏꦁꦒꦺꦴꦲꦶꦩꦩ꧀ꦲꦫꦸꦤ꧀ꦭꦤ꧀ꦥꦸꦠꦿꦥꦸꦠꦿꦤꦺ꧉​

^39:42 ꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦮꦶꦱ꧀ꦤꦶꦤ꧀ꦢꦏ꧀ꦏꦏꦺꦱꦏꦺꦃꦲꦶꦁꦥꦼꦒꦮꦺꦪꦤ꧀ꦏꦸꦩꦲꦸꦏꦪꦱꦶꦁꦢꦶꦝꦮꦸꦃꦲꦏꦺꦄꦭ꧀ꦭꦃꦩꦫꦁ꧊ꦩꦸꦱ꧉​

^39:43 ꧊ꦩꦸꦱꦧꦚ꧀ꦗꦸꦂꦤ꧀ꦭꦶꦠꦶꦏꦧꦺꦃꦩꦲꦸꦱꦂꦠꦔꦼꦂꦠꦶꦪꦺꦤ꧀ꦮꦺꦴꦁꦮꦺꦴꦁꦮꦶꦱ꧀ꦔ꧀ꦒꦫꦥ꧀ꦱꦫꦸꦥꦤꦶꦁꦥꦼꦒꦮꦺꦪꦤ꧀ꦏꦸꦕꦺꦴꦕꦺꦴꦒ꧀ꦏꦫꦺꦴꦱꦶꦁꦮꦶꦱ꧀ꦢꦶꦝꦮꦸꦃꦲꦏꦺꦄꦭ꧀ꦭꦃ꧉​꧊ꦩꦸꦱꦧꦚ꧀ꦗꦸꦂꦩ꧀ꦧꦼꦂꦏꦃꦲꦶꦮꦺꦴꦁꦮꦺꦴꦁꦩꦲꦸ꧉​