Jv/Alkitab/Pangentasan/6

^6:1 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ꧊ꦩꦸꦱ꧈​"ꦱꦲꦶꦏꦶꦏꦺꦴꦮꦺꦧꦏꦭ꧀ꦮꦼꦫꦸꦃꦲꦥꦱꦶꦁꦧꦏꦭ꧀ꦢꦏ꧀ꦠꦶꦤ꧀ꦢꦏ꧀ꦏꦏꦺꦩꦫꦁꦱꦁꦥꦿꦶꦔꦺꦴꦤ꧀꧉​ꦝꦺꦮꦺꦏ꧀ꦏꦺꦧꦏꦭ꧀ꦢꦏ꧀ꦥꦼꦏ꧀ꦱꦔ꧀ꦭꦶꦭꦤꦶꦲꦸꦩꦠ꧀ꦏꦸꦧꦸꦝꦭ꧀꧉​ꦱꦼꦗꦠꦶꦤꦺ꧈​ꦝꦺꦮꦺꦏ꧀ꦏꦺꦧꦏꦭ꧀ꦢꦏ꧀ꦥꦼꦏ꧀ꦱꦲꦺꦁꦒꦭ꧀ꦲꦺꦁꦒꦭ꧀ꦔ꧀ꦭꦸꦔꦏ꧀ꦏꦏꦺꦲꦸꦩꦠ꧀ꦏꦸꦱꦏꦤꦼꦒꦫꦲꦶꦏꦶ꧉"​

^6:2 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ꧊ꦩꦸꦱ꧈​ꦥꦔꦤ꧀ꦢꦶꦏꦤꦺ꧈​"ꦲꦏꦸꦲꦶꦏꦶꦄꦭ꧀ꦭꦃ꧈​

^6:3 ꦏꦁꦔꦼꦠꦶꦔꦭ꧀ꦩꦫꦁ꧊ꦄꦧꦿꦲꦩ꧀꧈​꧊ꦆꦱ꧀ꦏꦏ꧀ꦭꦤ꧀꧊ꦪꦏꦸꦧ꧀꧈​ꦄꦭ꧀ꦭꦃꦏꦁꦩꦲꦏ꧀ꦮꦱ꧈​ꦤꦁꦔꦶꦁꦲꦏꦸꦢꦸꦫꦸꦁꦚꦸꦩꦸꦫꦸꦥ꧀ꦥꦏꦺꦪꦺꦤ꧀ꦲꦱ꧀ꦩꦏꦸꦄꦭ꧀ꦭꦃ꧈​ꦏꦁꦱꦸꦕꦶ꧉​

^6:4 ꦏꦫꦺꦴꦢꦺꦤꦺꦲꦏꦸꦲꦶꦪꦮꦶꦱ꧀ꦗꦚ꧀ꦗꦶꦏꦫꦺꦴꦊꦭꦸꦲꦸꦂꦩꦸ꧈​ꦪꦺꦤ꧀ꦲꦉꦥ꧀ꦩꦫꦶꦁꦔꦏꦺꦤꦼꦒꦫ꧊ꦏꦺꦤꦲꦤ꧀꧈​ꦱꦶꦁꦧꦶꦪꦺꦤ꧀ꦥꦝꦢꦶꦲꦼꦁꦒꦺꦴꦤ꧀ꦤꦶꦤꦭꦶꦏꦢꦢꦶꦮꦺꦴꦁꦤꦼꦤꦼꦏ꧉​

^6:5 ꦥꦼꦱꦩ꧀ꦧꦠ꧀ꦠꦺꦮꦺꦴꦁ꧊ꦆꦱꦿꦲꦺꦭ꧀ꦱꦶꦁꦢꦶꦲꦁꦒꦼꦥ꧀ꦧꦸꦝꦏ꧀ꦢꦺꦤꦶꦁꦧꦁꦱ꧊ꦩꦺꦱꦶꦂ꧈​ꦮꦶꦱ꧀ꦢꦏ꧀ꦫꦸꦔꦸ꧈​ꦱꦂꦠꦲꦏꦸꦏꦺꦔꦼꦠ꧀ꦠꦤ꧀ꦩꦫꦁꦗꦚ꧀ꦗꦶꦏꦸ꧉​

^6:6 ꦩꦸꦭꦏꦤ꧀ꦝꦏ꧀ꦤꦩꦫꦁꦧꦁꦱ꧊ꦆꦱꦿꦲꦺꦭ꧀꧈​ꦪꦺꦤ꧀ꦲꦏꦸꦔꦤ꧀ꦢꦶꦏꦩꦫꦁꦝꦺꦮꦺꦏ꧀ꦏꦺ꧈​‘ꦲꦏꦸꦲꦶꦏꦶꦄꦭ꧀ꦭꦃ;ꦲꦏꦸꦧꦏꦭ꧀ꦤꦸꦭꦸꦁꦔꦶꦏꦺꦴꦮꦺꦏꦧꦺꦃꦱꦂꦠꦔ꧀ꦭꦸꦮꦂꦫꦶꦏꦺꦴꦮꦺꦱꦏꦥꦤꦶꦤ꧀ꦝꦼꦱ꧀ꦱꦺꦧꦁꦱ꧊ꦩꦺꦱꦶꦂ꧉​ꦲꦏꦸꦧꦏꦭ꧀ꦔꦒꦼꦩ꧀ꦥꦔ꧀ꦮꦱꦏꦸꦏꦁꦒꦺꦴꦔꦸꦏꦸꦩ꧀ꦧꦁꦱ꧊ꦩꦺꦱꦶꦂꦏ꧀ꦭꦮꦤ꧀ꦥꦲꦸꦏꦸꦩ꧀ꦩꦤ꧀ꦱꦶꦁꦲꦧꦺꦴꦠ꧀;ꦢꦺꦤꦺꦏꦺꦴꦮꦺꦧꦏꦭ꧀ꦢꦏ꧀ꦱ꧀ꦭꦩꦼꦠ꧀ꦠꦏꦺꦏꦧꦺꦃ꧉​

^6:7 ꦏꦺꦴꦮꦺꦏꦧꦺꦃꦧꦏꦭ꧀ꦢꦏ꧀ꦢꦢꦺꦏ꧀ꦏꦏꦺꦲꦸꦩꦠ꧀ꦏꦸꦱꦂꦠꦲꦏꦸꦧꦏꦭ꧀ꦢꦢꦶꦲꦭ꧀ꦭꦃꦩꦸ꧈​ꦱꦶꦁꦔ꧀ꦭꦸꦮꦂꦫꦶꦱꦏꦥꦤꦶꦤ꧀ꦝꦼꦱ꧀ꦱꦺꦮꦺꦴꦁ꧊ꦩꦺꦱꦶꦂ꧉​

^6:8 ꦏꦺꦴꦮꦺꦧꦏꦭ꧀ꦢꦏ꧀ꦲꦶꦫꦶꦢ꧀ꦏꦧꦺꦃꦩꦼꦚꦁꦲꦶꦁꦠꦤꦃꦱꦶꦁꦢꦏ꧀ꦗꦚ꧀ꦗꦺꦏ꧀ꦏꦏꦺꦔꦁꦒꦺꦴꦱꦸꦩ꧀ꦥꦃꦩꦫꦁ꧊ꦄꦧꦿꦲꦩ꧀꧈​꧊ꦆꦱ꧀ꦏꦏ꧀ꦭꦤ꧀꧊ꦪꦏꦸꦧ꧀꧉​ꦠꦤꦃꦩꦲꦸꦧꦏꦭ꧀ꦢꦏ꧀ꦥꦫꦶꦁꦔꦏꦺꦢꦢꦶꦢꦸꦮꦺꦏ꧀ꦩꦸꦝꦺꦮꦺ꧈​ꦲꦏꦸꦲꦶꦏꦶꦄꦭ꧀ꦭꦃ꧉’"​

^6:9 ꦱꦏꦺꦃꦲꦺꦥꦔꦤ꧀ꦢꦶꦏꦤꦺꦄꦭ꧀ꦭꦃꦏꦸꦮꦶꦢꦶꦠꦼꦫꦸꦱ꧀ꦱꦏꦺ꧊ꦩꦸꦱꦩꦫꦁꦧꦁꦱ꧊ꦆꦱꦿꦲꦺꦭ꧀꧈​ꦤꦁꦔꦶꦁꦮꦺꦴꦁꦮꦺꦴꦁꦩꦲꦸꦥꦝꦲꦺꦴꦫꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺ꧈​ꦩꦼꦂꦒꦲꦠꦶꦤꦺꦱꦼꦩ꧀ꦥ꧀ꦭꦃ꧈​ꦲꦮꦶꦠ꧀ꦱꦏꦥꦤꦶꦤ꧀ꦝꦼꦱ꧀ꦱꦶꦁꦲꦧꦺꦴꦠ꧀ꦧꦔꦼꦠ꧀꧉​

^6:10 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ꧊ꦩꦸꦱ꧈​

^6:11 "ꦱꦺꦴꦮꦤ꧀ꦤꦱꦁꦥꦿꦶꦔꦺꦴꦤ꧀ꦭꦤ꧀ꦩꦠꦸꦂꦫ꧈​ꦱꦸꦥꦪꦔ꧀ꦭꦶꦭꦤꦶꦧꦁꦱ꧊ꦆꦱꦿꦲꦺꦭ꧀ꦭꦸꦔꦱꦏꦤꦼꦒꦫꦤꦺ꧉"​

^6:12 ꦤꦁꦔꦶꦁ꧊ꦩꦸꦱꦩꦠꦸꦂ꧈​"ꦠꦶꦪꦁ꧊ꦆꦱꦿꦲꦺꦭ꧀ꦏꦺꦩꦮꦺꦴꦤ꧀ꦩ꧀ꦧꦺꦴꦠꦼꦤ꧀ꦥꦸꦫꦸꦤ꧀ꦩꦶꦉꦁꦔꦏꦼꦤ꧀ꦏꦮꦸꦭ꧈​ꦩꦼꦤꦥꦩꦭꦶꦃꦱꦁꦥꦿꦶꦔꦺꦴꦤ꧀꧉​ꦏꦮꦸꦭꦩ꧀ꦧꦺꦴꦠꦼꦤ꧀ꦱꦒꦼꦢ꧀ꦕꦤ꧀ꦠꦼꦤ꧀ꦤꦤ꧀꧉"​

^6:13 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦝꦮꦸꦃꦩꦫꦁ꧊ꦩꦸꦱꦭꦤ꧀ꦲꦫꦸꦤ꧀꧈​"ꦏꦤ꧀ꦝꦏ꧀ꦤꦩꦫꦁꦧꦁꦱ꧊ꦆꦱꦿꦲꦺꦭ꧀ꦭꦤ꧀ꦩꦫꦁꦱꦁꦥꦿꦶꦔꦺꦴꦤ꧀꧈​ꦪꦺꦤ꧀ꦲꦏꦸꦮꦶꦱ꧀ꦤ꧀ꦝꦮꦸꦃꦲꦏꦺꦏꦺꦴꦮꦺꦔꦶꦫꦶꦢ꧀ꦧꦁꦱ꧊ꦆꦱꦿꦲꦺꦭ꧀ꦩꦼꦠꦸꦱꦏꦲꦶꦁꦠꦤꦃ꧊ꦩꦺꦱꦶꦂ꧉"​

^6:14 ꧊ꦫꦸꦧꦺꦤ꧀꧈​ꦥꦼꦩ꧀ꦧꦉꦥ꧀ꦥꦺ꧊ꦪꦏꦸꦧ꧀꧈​ꦢꦸꦮꦺꦲꦤꦏ꧀ꦭꦤꦁꦕꦕꦃꦲꦺꦥꦥꦠ꧀꧈​ꦪꦏꦸꦮꦶ:꧊ꦲꦺꦤꦺꦴꦏ꧀꧈​ꦥꦭꦸ꧈​꧊ꦲꦺꦱꦿꦺꦴꦤ꧀ꦭꦤ꧀꧊ꦏꦂꦩꦶ꧉​ꦲꦶꦪꦮꦺꦴꦁꦮꦺꦴꦁꦲꦶꦏꦶꦊꦭꦸꦲꦸꦂꦫꦺꦠꦊꦂ꧊ꦫꦸꦧꦺꦤ꧀꧉​

^6:15 ꧊ꦱꦶꦩꦺꦪꦺꦴꦤ꧀ꦢꦸꦮꦺꦲꦤꦏ꧀ꦭꦤꦁꦤꦼꦩ꧀꧈​ꦪꦏꦸꦮꦶ:꧊ꦪꦺꦩꦸꦮꦺꦭ꧀꧈​꧊ꦪꦩꦶꦤ꧀꧈​꧊ꦎꦲꦢ꧀꧈​꧊ꦪꦏꦶꦤ꧀꧈​꧊ꦗ꦳ꦺꦴꦲꦂꦭꦤ꧀꧊ꦱꦲꦸꦭ꧀꧈​ꦲꦶꦧꦸꦤꦺꦮꦺꦴꦁꦮꦢꦺꦴꦤ꧀꧊ꦏꦺꦤꦲꦤ꧀꧉​ꦪꦏꦸꦮꦶꦊꦭꦸꦲꦸꦂꦫꦺꦠꦊꦂ꧊ꦱꦶꦩꦺꦪꦺꦴꦤ꧀;ꦏꦸꦭꦮꦂꦒꦲꦶꦏꦶꦢꦶꦲꦫꦤ꧀ꦤꦶꦩꦤꦸꦠ꧀ꦗꦼꦤꦼꦁꦔꦺ꧉​

^6:16 ꧊ꦭꦺꦮꦶꦢꦸꦮꦺꦲꦤꦏ꧀ꦭꦤꦁꦠꦼꦭꦸ꧈​ꦪꦏꦸꦮꦶ:꧊ꦒꦺꦂꦱꦺꦴꦤ꧀꧈​꧊ꦏꦺꦲꦠ꧀ꦭꦤ꧀꧊ꦩꦺꦫꦫꦶ;ꦮꦺꦴꦁꦮꦺꦴꦁꦲꦶꦏꦶꦊꦭꦸꦲꦸꦂꦫꦺꦠꦸꦫꦸꦤ꧀ꦭꦺꦮꦶ;ꦏꦸꦭꦮꦂꦒꦲꦶꦏꦶꦲꦶꦪꦢꦶꦲꦫꦤ꧀ꦤꦶꦩꦤꦸꦠ꧀ꦗꦼꦤꦼꦁꦔꦺ꧉​꧊ꦭꦺꦮꦶꦲꦸꦩꦸꦂꦫꦺ137ꦠꦲꦸꦤ꧀꧉​

^6:17 ꧊ꦒꦺꦂꦱꦺꦴꦤ꧀ꦢꦸꦮꦺꦲꦤꦏ꧀ꦭꦤꦁꦭꦺꦴꦫꦺꦴ꧈​ꦪꦏꦸꦮꦶ:꧊ꦭꦶꦧ꧀ꦤꦶꦭꦤ꧀꧊ꦱꦶꦩꦺꦲꦶ;ꦮꦺꦴꦁꦮꦺꦴꦁꦏꦸꦮꦶꦠꦸꦫꦸꦤ꧀ꦤꦺꦲꦏꦺꦃ꧉​

^6:18 ꧊ꦏꦺꦲꦠ꧀ꦢꦸꦮꦺꦲꦤꦏ꧀ꦭꦤꦁꦥꦥꦠ꧀꧈​ꦪꦏꦸꦮꦶ:꧊ꦄꦩꦿꦩ꧀꧈​꧊ꦪꦶꦗ꦳꧀ꦲꦂ꧈​꧊ꦲꦺꦧꦿꦺꦴꦤ꧀ꦭꦤ꧀꧊ꦈꦗ꦳ꦶꦪꦺꦭ꧀꧉​ꦲꦸꦩꦸꦂꦫꦺ꧊ꦏꦺꦲꦠ꧀ꦔꦤ꧀ꦠꦶ133ꦠꦲꦸꦤ꧀꧉​

^6:19 ꧊ꦩꦺꦫꦫꦶꦢꦸꦮꦺꦲꦤꦏ꧀ꦭꦤꦁꦭꦺꦴꦫꦺꦴ꧈​ꦪꦏꦸꦮꦶ:꧊ꦩꦃꦲ꧀ꦭꦶꦭꦤ꧀꧊ꦩꦸꦱꦶ꧉​ꦲꦶꦏꦶꦠꦊꦂ꧊ꦭꦺꦮꦶꦩꦶꦠꦸꦫꦸꦠ꧀ꦱꦼꦗꦫꦃꦲꦺꦝꦺꦮꦺꦝꦺꦮꦺ꧉​

^6:20 ꧊ꦄꦩꦿꦩ꧀ꦲꦺꦴꦩꦃꦲꦺꦴꦩꦃꦏꦫꦺꦴ꧊ꦪꦺꦴꦏꦺꦧꦺꦢ꧀꧈​ꦲꦝꦶꦤꦺꦮꦢꦺꦴꦤ꧀ꦧꦥꦏ꧀ꦤꦺ꧈​ꦢꦺꦤꦺꦲꦤꦏ꧀ꦏꦺꦪꦏꦸꦮꦶ:ꦲꦫꦸꦤ꧀ꦭꦤ꧀꧊ꦩꦸꦱ꧉​ꦲꦸꦫꦶꦥ꧀ꦥꦺꦔꦤ꧀ꦠꦶ137ꦠꦲꦸꦤ꧀꧉​

^6:21 ꧊ꦪꦶꦗ꦳꧀ꦲꦂꦢꦸꦮꦺꦲꦤꦏ꧀ꦭꦤꦁꦠꦼꦭꦸ꧈​ꦪꦏꦸꦮꦶ:꧊ꦏꦺꦴꦫꦃ꧈​꧊ꦤꦺꦥ꦳ꦺꦒ꧀ꦭꦤ꧀꧊ꦗ꦳ꦶꦏꦿꦶ꧉​

^6:22 ꧊ꦈꦗ꦳ꦶꦪꦺꦭ꧀ꦲꦶꦪꦢꦸꦮꦺꦲꦤꦏ꧀ꦭꦤꦁꦠꦼꦭꦸ꧈​ꦪꦲꦶꦏꦸ:꧊ꦩꦶꦱꦲꦺꦭ꧀꧈​꧊ꦌꦭ꧀ꦱꦥ꦳ꦤ꧀ꦭꦤ꧀꧊ꦱꦶꦠꦿꦶ꧉​

^6:23 ꦲꦫꦸꦤ꧀ꦤꦶꦏꦃꦏꦫꦺꦴ꧊ꦌꦭꦶꦗ꦳ꦺꦧ꧈​ꦲꦤꦏ꧀ꦏꦺꦮꦢꦺꦴꦤ꧀꧊ꦄꦩꦶꦤꦢꦧ꧀;ꦲꦶꦪꦱꦼꦢꦸꦭꦸꦂꦫꦺꦮꦢꦺꦴꦤ꧀꧊ꦤꦲꦱꦺꦴꦤ꧀;ꦢꦸꦮꦺꦲꦤꦏ꧀꧊ꦤꦢꦧ꧀꧈​꧊ꦄꦧꦶꦲꦸ꧈​꧊ꦌꦭꦺꦪꦗ꦳ꦂꦭꦤ꧀꧊ꦆꦠꦩꦂ꧉​

^6:24 ꧊ꦏꦺꦴꦫꦃꦢꦸꦮꦺꦲꦤꦏ꧀ꦭꦤꦁꦠꦼꦭꦸ꧈​ꦪꦏꦸꦮꦶ:꧊ꦄꦱꦶꦂ꧈​꧊ꦌꦭ꧀ꦏꦤꦭꦤ꧀꧊ꦄꦧꦶꦪꦱꦥ꦳꧀꧉​ꦲꦶꦏꦸꦥꦝꦢꦢꦶꦊꦭꦸꦲꦸꦂꦫꦺꦠꦸꦫꦸꦤ꧀ꦏꦺꦴꦫꦃ꧉​

^6:25 ꧊ꦌꦭꦺꦪꦗ꦳ꦂꦲꦤꦏ꧀ꦏꦺꦭꦤꦁꦲꦫꦸꦤ꧀꧈​ꦤꦶꦏꦃꦏꦫꦺꦴꦥꦸꦠꦿꦤꦺ꧊ꦥꦸꦠꦶꦪꦺꦭ꧀꧈​ꦢꦸꦮꦺꦲꦤꦏ꧀꧊ꦥꦶꦤꦺꦲꦱ꧀꧉​ꦪꦲꦶꦏꦶꦱꦫꦱꦶꦭꦃꦲꦺꦏꦸꦭꦮꦂꦒ꧊ꦭꦺꦮꦶꦱꦂꦠꦩꦶꦠꦸꦫꦸꦠ꧀ꦒꦺꦴꦠꦿꦃꦲꦺ꧉​

^6:26 ꦲꦶꦪꦲꦫꦸꦤ꧀ꦭꦤ꧀꧊ꦩꦸꦱꦲꦶꦏꦶꦱꦶꦁꦢꦶꦝꦮꦸꦃꦲꦶꦒꦸꦱ꧀ꦠꦶꦄꦭ꧀ꦭꦃꦔꦶꦫꦶꦢ꧀ꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦩꦼꦠꦸꦱꦏꦲꦶꦁꦠꦤꦃ꧊ꦩꦺꦱꦶꦂ꧉​

^6:27 ꦮꦺꦴꦁꦭꦺꦴꦫꦺꦴꦏꦸꦮꦶꦱꦶꦁꦔꦠꦸꦂꦫꦶꦱꦁꦥꦿꦶꦔꦺꦴꦤ꧀ꦱꦸꦥꦪꦩ꧀ꦧꦺꦧꦱ꧀ꦱꦏꦺꦮꦺꦴꦁ꧊ꦆꦱꦿꦲꦺꦭ꧀꧉​

^6:28 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ꧊ꦩꦸꦱꦲꦶꦁꦠꦤꦃ꧊ꦩꦺꦱꦶꦂ꧈​

^6:29 ꦝꦮꦸꦃꦲꦺ꧈​"ꦲꦏꦸꦲꦶꦏꦶꦥꦔꦺꦫꦤ꧀ꦄꦭ꧀ꦭꦃ꧉​ꦲꦥꦮꦲꦺꦱꦶꦁꦮꦶꦱ꧀ꦢꦏ꧀ꦝꦮꦸꦃꦲꦏꦺꦩꦫꦁꦏꦺꦴꦮꦺ꧈​ꦲꦠꦸꦂꦤꦩꦫꦁꦱꦁꦥꦿꦶꦔꦺꦴꦤ꧀꧉"​

^6:30 ꦤꦁꦔꦶꦁ꧊ꦩꦸꦱꦩꦠꦸꦂ꧈​"ꦒꦸꦱ꧀ꦠꦶ꧈​ꦥꦚ꧀ꦗꦼꦤꦼꦁꦔꦤ꧀ꦩꦶꦂꦱꦧꦶꦭꦶꦃꦏꦮꦸꦭꦩ꧀ꦧꦺꦴꦠꦼꦤ꧀ꦥꦶꦤ꧀ꦠꦼꦂꦒꦶꦤꦼꦩ꧀ꦩꦤ꧀;ꦏꦢꦺꦴꦱ꧀ꦥꦸꦤ꧀ꦢꦶꦱꦒꦼꦢ꧀ꦢꦶꦥꦸꦤ꧀ꦱꦁꦥꦿꦶꦔꦺꦴꦤ꧀ꦩꦶꦉꦁꦔꦏꦼꦤ꧀ꦲꦠꦸꦂꦏꦮꦸꦭ?"