ungud-ungod ngan kinmita didá han mga matá han
bagyo nga nagrurumpat didto ha sakób, nakasantop nga,
waray palad, an iginsisinumat matuod ngayan. Waray
anay mahapagyakán hin pirá kadali ngan katima mag-
paarak han mga basol.
-Hay!-nganiya; ako nga nagsaad kan imo itay hin pagmangno ha imo, hin papagtuón basi ka maginabogado! Gin-ilob ko an karaway bisan anó makag-arám ka la. Waray na ako kakadto han panggingge nga may pusta nga manalapi, didto na la ako kakadto han mangurtiyo, gin-ilob ko an kabahó ngan han mahugaw nga baraha! Kitaa hinin akong bado nga sinursihan! Waray na ako pumalit hin bag-o kay ginasto ko an kuwarta ha mga pamisa ngan mga regalo kan San Sebastian, bisan kun diri ako duro nga natuod han iya gahóm nga iginsinumat han padi ha dinalidali ngan padalagan, ngan iní nga santos uraura pa hin kabag-o, diri pa maaram magmilagro, ngan diri man ngani kahoy nga batikulón. kundi laniti... Hay! Ano in isisiring ha akon ni imo itay kun mamatay ako ngan akon igkita?
Ngan an makaluluoy nga babayi naghaharóy, nagtatangis; hi Placido nadugang hin kamasubó ngan nangagawás tikang ha iya dughan in mga di-mapugngan nga mga panhayhay.
-Ano akon makukuha hin kaabogado?- nabatón.
-Ano la in aabután mo?- nagpapadayon an iróy nagbibindito han mga kamót;-pagngangaranan ka nga pilibistiero ngan pagbibitayon ka! Daan ta ikaw gintugon nga magpasensya ka, magpaubós ka! Di ko karuyag sidngon nga humarók ka han kamót han mga kura. kay maaram ako nga nadiri ka hin maraot nga baho, sugad ka kan imo itay nga diri nakaon han keso ha Europa... Kundi kinahanglan kita mag-ilob, diri hin saba, sumiring nga oo ha bisan ano... Mag-aanó kitá. An ngatanán aadá ha mga prayle; diri ngani hirá maruyag waray nagigin-abogado, sugad man kamediko... Pagpasyensya, intoy, pagpasyensya!
Hi Ginhaupana Andang nagpadayon la han iya mga panhinganugon. Diri niya kinahanglan nga magakiprayle gud, hiya diri man liwát ngani; sayod hiyá kaupay nga kun may uusá nga maupay may nanapulo nag maraot nga nakuha han salapi han mga kablas ngan nagpapahalin han mga manggaran. Kundi kinahanglan nga umukóy la, magantos ngan mag-ilob; waray
