ibá nga mahihimo. Ngan iya nginangaranan adto ngan
ini nga senyor nga tungód han kapaciencioso ngan
kaubós la bisan kun didto ha sakób han iya kasing-kasing
nadiri hiya han iya mga agaron, tikang ha kasuruguon
han mga prayle pinmaabot ha ka-promotor piskal
ngan adton hi Fulano nga yaná manggaran na ngan
makakahimo na pagbuhat hin mga katinuyawán kay
may ada na mga kasangkayan nga magbabawi ha iya ha
sakób han balaod, sakristan la anay nga makaluluoy,
ubós ngan masinugtanon, nga nakaasawá hin usa nga
mahusay nga daraga ngan an ira anák pinanganák han
padi ha pagbunyag...
Hi Ginhaupana Andang waray kauubsi han iya mga pananglitan hin mga Pilipino nga ubós ngan pacienciosos sugad han iya siring ngan iya nginangaranan in iba nga waray pagpasensya pinanakop ngan pinanhalin ngan amo na an kan Placido pagpasangil hin gutiay nga tuyo, linmusad ngan maglinakat han kakalsadahan.
Ginsudoy niya an Sibakong, Tondo, San Nicolas, Santo Cristo, libáng ngan maraot an buot, waray la aabat han kapasó han adlaw sugad man han uras ngan didá na han paggutuma ngan pagsabót nga waray ngayan kuwarta kay iya inubos ha mga panagtawo ngan aragmot, inmuli ha iya baláy. Naglalaom nga diri na igkakakita kan iya inay kay amo an iya hin-aaraan kun napakanhi ha Manila kay hito nga uras aadto ha panggingge didá hin harani nga baláy. Kundi hi Ginhaupana Andang naghihinulat ha iya kay karuyag sumatan han iya proyekto: mapakadto hiyá han prokurador han mga agustinos basi la an iya anak mahabalik ha maupay nga kaburut'on han mga dominiko. Pinut-od hiya ni Placido hin usa nga kilos.
Siyahan maambak ako ha dagat,-nagsiring, kun diri man magtutulisan ako ugsa bumalik ha Universidad.
Ngan tungod kay hi iya inay nagtikang hin pagwali mahatungod han pagpasyensya ngan pagpaubós, hi Placido, waray kaunkaon, linmusad liwat ngan mapakadto ha mulye nga dinuduungan han mga bapór.
Han pakakitá hin usa nga bapor nga nagbubutong han angkla kay ngadto ha Hong-Kong inalpan hin panhunahuna: an pagpalagiw ngadto ha Hongkong basi didto makasalapi, magriko ngan unina gubaton an mga prayles. An panhunahuna han Hongkong nagpukaw
