natag an iya mga bienes, bahin ha Sta. Clara, may ha
Santo Papa, ha Arzobispo, ha mga Corporaciones Religiosas,
ngan hin kakaruhaan kapisos nga para matrikula han
mga estudyantes nga kablas. Ini nga bahin nahabutáng
ha testamento kay sagdon ni P. Irene tungod kay hiya
umurugop han mga batan'on nga magtinuunon. Ginkuha
ni Kapitan Tiyago in usa nga paghatag hin karuhaan kaglimá
kapisos kan Basilio tungód han kabungalos nga pamatasan
nga ginsunód han batan'on han urhi nga mga
adlaw, kundi iginbalik ni P. Irene ngan nagpasabót nga
didto na la niya kukuhaa ha kalugaringon nga bursa nga
hukas ha kasingkasing.
Didto ha baláy han namatay, nga ginkadto han mga kilala ug kasangkayan han kabuwás nga adlaw, ginkakarukayakan hin diduro in usa nga milagro. Sinisiring nga hadto nga uras han naghihingutás na, an kalág ni Kapitan Tiyago inmulpot didto han mga monghas ginlilibutan hin maranggat nga kapawa. Gintalwas hiya sa Dios. tungód han kadam'an nga mga pamisa nga ginlimós ngan han mga diniyusnon nga hatag didto han iya testamento. An sumat ginhihiruhimangraw, ginhihimohimo, nagtitikasangkap nga sumat ngan waray na nagruruhaduha. Iginasoy an sul-ot nga panapton ni Kapitán Tiyago nga, kaiyá daw la, prak, an limugmugan nabutol tungód han gupa, patí an hungsoy han apyan waray gud hingalimti sugad man an hinigutan nga manók. An sakristan mayor nga nakadá nahatatambong nagdidig-on gud han ulo pagtangdo ngan nakahunahuna nga kun hiyá in mamatay madungtol hiyá dará an iya usa katasa nga tahú kay, para ha iya, mawaráy ngani adto nga marasa nga pamahawón, waray niya kalibutan kun tipaunano an kahimayaan ha langit sugad man ha tuna. Ini nga himangrawon, tungód kay diri man nakakagkarukayakan bahín han mga hinabó, han kakulóp nga adlaw ngan tungod kay nakadá in himuláng ginkasarabutan hin magpakairipa nga panhunahuna, ginbabanabana kun ayaton ba ni Kapitán Tiyago hi San Pedro hin usa nga soltada, kun angay ba nga mamay-pustahay, kun an mga manók mamaydayon ba nga kinabuhi, kun angay ba panultan hin buláng, nga didá hini, hino man an sentensyador, hino in magdadaóg ug ibá pa, mga balingkutay iní nga ayón hadton namamagtukod hin kinaadman, mga panhunahuna, mga paagi nga sinanggi ha mga basahán nga ibinabantog nga waray paghilisá, igin-
