nagmugo hi P. Irene ha talinga ni Ben Zayb; —damo
na in naasdang ha iya pagsiplat!
Panulay ini nga padi! Iya na adto gin-iiluluwas.
—Tsiko,— hinmuring ha iya kasapit an nagngaran hin tawutawo kan don Timoteo. —Kinmita ka hiton saya?
—Uy! an mga kortina ha Palasyo!
—Saba! Matuod gud man! Ta, uubuson pagdara. Kaduwas himuon nga abngo in usa nga alkumbra!
—Ito nagpapakilala nga may ada hinbabaruan ngan maaram magpanapton!— nagsiring an bana, nagsaway han iya asawa hin usa kasiplat; —an kababayin’an angay managhirot hin dako nga gasto!
Inuul-ulan pa adto nga diyos han iya ginbaydan han modista.
' —Iho! tagi ako hin mga kortina nga tagpulo kagduha kapisos an bara ngan kikitaon mo kun sumul-ot pa ba ako hint nga mga hinisan!— binmaton an naurit nga diyusa;—Hesus! Magyayakan ka ba kun an imo mga kag-anak sugad kamaaram gumasto!
Hadto nga uras, ha atubangan han balay, hi Basilio nga nahasasakot han kadam’an nga mga usyuso, nag-iinihap han mga tawo nga nagpapanhawas dida han mga kotse. Han pakakita han damo nga tawo nga maglipayon, waray kahihirutan; han pakakita han kinasal nga magpadis, nga binubunyugan han mga mangurupod nga mga huboy pa ngan maghinlo nga mga daragahay, ngan han pakahunahuna nga adto ngatanan igkikita didto hin makalilisang nga kamatayon, nahakaluoy hiya ngan inmabat nga nagtitikaiban an iya kadurumton.
Nakaisip hin paggawas han kadam’an nga waray labot; naghunahuna hiya hin pagsurat, pagpasabot han mga punuan; kundi inmabot in usa nga kotse ngan dida nagkahawas hira P. Salvi ngan hi P. Irene, ngaduha maglipayon ngan, sugad hin lumalabay nga dampog nawara an iya mag-upay nga mga tuyo.
—Baga saho ko man!— nagsiring; —say an mga buutan magtubos han mga salaan!
Ngan iya pa dugangan pagbagi han iya mga pagaralngan:
—Diri ako tigsumbong, diri ako magkakarag han confianza nga itinapod ha akon. Darudako an utang ko ha iya kay ha ira ngatanan; hiya an nagkutkot han
