linubngan han akon iroy; ini hira amo an pinmatay.
Ano akon labot ha ira? Binuhat ko an ngatanan basi
la ako magmaupay, mahimurulsan; gintalinguha ko an
kalimot ngan pagpasaylo; gin-antos ko an ngatanan nga
kakurian ngan an pinangaro ko la nga pabay’an ako
ha mamingaw nga pag-ukoy! Waray ako pagsasamok
bisan kanay.... Ano an binuhat ha akon? Igkalpad
an ira mga lawas nga utud-utod ngadto ha kahanginan!
Igo na adto nga amon gin-antos!
Katima hikit’an niya hi Simoun nga nahawas nakakakugos han makaharadlok nga kingke, iya hinkit’an nga nalagos dida ha sirong ngadto pagsaka hin hinayhmay itinutungok an ulo sugad hin daw namumurubuot. Hi Basilio inmabat nga an iya kasingkasing mahinay an dagukdok, nga an iya mga karnot ug mga tiil nanhahagkot ngan an maitom nga lambong ni Simoun namamay-ada inkantuhanon nga mga lirik nga libot hin laga bin kalayo. Didto ha ubos han hagdan nahunong hi Simoun ngan daw nagruruhaduha; hi Basilio waray giginhawa. Nadaliay la an pag-alang; hi Simoun inmalsa han ulo, sinmaka hin dalidali han mga balitang ngan nawara.
Dida hini an estudyante nakasiring nga an balay diri maiha magbubuto ngan an mga puto, mga parol, mga kumbidado, an atop, mga bintana, an orkesta magkakalpad ngadto ha panganuron daw iginsabrag nga baga tikang dida han impyemo nga nagbubugto; sinmiplat paluyuluyo ngan nakasiring nga ginlilibutan hiya hin kamiminatyan. diri kay mga usyuso; iya kinikita nga mga kundt, nga an hangin naglalalaga, kundi an mahayag niya nga pamurubuot say naghadi didto hadto nga iya kalipngaw nga dalikyat nga tingali dara han gutom, ngan nagsiring:
—Hamtang diri lumusad waray kaharadlukan. Waray pa abot an Kapitan Heneral!
Ngan nagtalinguha hin pagpamuhaypuhay, iya ginpugngan an pangurog han iya mga tuhod ngan nagpalibanglibang han panhuanhuna hin iba nga butang. May ada nagtitiaw ha iya didto ha iya sakob nga nasiring:
—Kun yana ikinukurog ka na nga waray pa an uras han kalalaki, maunano ka na daw la adto kun makakita ka nga maglalasaw na an dugo, masusunog na an mga balay ngan manhuhuni na an magpapanlabay nga mga bala?
