Han pagtikang han mga lingganay hin pagrupiki pagpasabot han misa ha magkatutnga, ngan an naawil han pagkaturog baga saho kun ano nga mga piyesta ug mga seremonyas an mahinabo, napipirit hin paghimangno ngan magnginurutob kontra han kamaaringasa ngan kamarugyaw, hi Basilio linmusad hin hilit dida ha iya balay, linmibot nakaduha o nakatuld dida hin pira nga kalsada ngan, han pagsabot nga waray ha iya nagsisinunod o nag-iininaw, sinmulsog han dalan nga talagsa la agian tipakadto han kilala na nga kagurangan han mga Ibarra nga napalit ni Kapitan Tiyago han pagsubastahan tima imbarguha ha mga Ibarra.
Tungod kay hadto nga tuig an Pasko iginkakaigo nga pakatingalon, masirom didto hin duro. An rupike naukoy na, say na la hinbabatian dida han kahilom han gab-i an patalagsa nga tawagtawag nga natahos dida han ngurob han mga sanga nga binabay-og han harupoy, ngan han sinukol nga daguhob han mga balod han harani nga danaw, daw makatarag-ob nga hangos han kalibutan nga hinmumuukan hin katurog.
Tungod kay inalpan han kamamingaw han lugar ngan han panahon hi Basilio natamod paglakat daw an may karuyag hikit’an dida han kasisidman. Ha patalagsa danay humangad ha pagbiling han mga bituon dida han mga kagihaan han magrabong nga kahoy han kagurangan ngan unina nagpapadayon han lakat, nagbubuhay dida han mga kahuy-kahoy ngan danay magrabot pag-utod han mga balagon basi la makaagi. Danay magbinalikbalik, an iya tiil danay hasagapot dida han mga puno han kabalagnan, napudol dida hin usa nga dalid o batang. katapos hin tunga hin uras inmabot hiya ngadto hin usa nga sapa, ngan didto ha tabok nga sagni may uusa nga tayod nga, ha kasisidman, masugad kadako hin bukid. Hi Basilio nakatabok han sapa, nagpanlakadlakad dida han mga bato nga nangagataw dida han mabusag nga salaming han tubig, nagsagka hin usa nga tayod ngan napasingadto hin usa nga kasurukan nga ginlilibutan hin mga dumog na nga mga kuta. Dinaop niya an kahoy nga dalakit nga natubo dida han butnga, dako, urusahon, talahuron, nagkakapuro la gamot nga nagsasakd, naglulusad, daw sugad hin lawas
